Aðventan er oft yndislegur tími, kertaljós og kósý, smákökur og jólalög. Aðventan einkennist hins vegar einnig oft af löngum verkefnalista sem bætist við okkar daglegu verkefni og því á jólastressið oft til að taka yfir. Í þættinum förum við aðeins yfir aðventuna, jólastressið og veltum því fyrir okkur hvort við raunverulega þurfum að keyra okkur út í að klára þennan langa verkefnalista sem hangir oft yfir okkur fyrir jólin.

Í þessum stutta þætti verður farið yfir fimm atriði sem þú átt aldrei að skammast þín fyrir.

Í þessum þætti verður farið yfir það hversu mikilvægt það er að stilla aðeins hugarfarið á erfiðum tímum og reyna að sjá erfið tímabil út frá öðru sjónarhorni. Hvernig ætlar þú að minnast ársins 2020? Verður það ömurlega Covid árið eða verður þetta árið þar sem þú fórst að sjá hvað það er sem virkilega skiptir þig máli í lífinu?

Hefur þér einhvern tíman liðið eins og þú sért ekki nógu góð móðir? Eða borið þig saman við aðrar mæður og liðið eins og þú sért ekki með allt á hreinu?  Í þessum þætti verður farið yfir hugtakið blekkingarheilkenni (e. impostor syndrome) hvað það er og af hverju það er algengt að fólk finni fyrir þessu. Það verður farið sérstaklega yfir það hvernig  þetta blekkingarheilkenni birtist í móðurhlutverkinu og hvað þú getur gert ef þetta er að hafa áhrif á þig.

Í þessum þætti verður farið yfir fæðingarorlofið og fimm atriði sem gott er að hafa í huga á meðan þú ert heima að sinna ungbarni en þessi fimm atriði geta komið í veg fyrir að þú brennir út eða týnir sjálfri þér í þessu stóra og krefjandi hlutverki.

Í þessum þætti verður fjallað um móðurhlutverkið og hvernig samfélagið og samfélagsmiðlar geta haft þau áhrif á mæður að þær myndi óraunhæfar væntingar og kröfur til móðurhlutverksins. Litið verður á nokkur atriði sem kom íslenskum mæðrum á óvart við móðurhlutverkið og að lokum verður farið yfir það hvernig þessar væntingar verða til og af hverju það er eðlilegt að móðurhlutverkið verði ekki eins og búið var að sjá fyrir sér.

Í þessum þætti verður farið yfir meðgöngu, fæðingu og fæðingarorlof á tímum Covid. Litið verður á reynslu og upplifun íslenskra kvenna sem hafa eignast barn á þessum skrýtnu tímum og farið yfir bæði jákvæða og neikvæða þætti sem fylgja samkomutakmörkunum.  Að lokum er litið á hvaða reynslu og lærdóm mætti draga af þessum erfiðu tímum sem og farið stuttlega yfir hugtakið eitruð jákvæðni (e. toxic positivity). Þáttastjórnandi er Fanney Skúladóttir.

Í þessum fyrsta þætti verður farið yfir það að setja mörk þegar kemur að heimsóknum fyrstu dagana og klukkutímana eftir fæðingu, þá verða lesnar nokkrar sláandi reynslusögur frá íslenskum konum og farið yfir það hvernig þú getur brotið ísinn á þessari umræðu við þína nánustu.