من وقت للتاني الواحد بيحتاج ياخد جنب وينعزل شوية.. مع مراعاة إن مش كل عزلة معناها رفض، أو إن الواحد استغنى أو هيفضل كده للأبد، أو إنه مش طايق حبايبه!.. فيه عزلة ترتيب أوراق، ولملمة ذات.. عزلة تعب.. عزلة أخد نَفس عشان الواحد يرجع أقوى تانى في خناقته مع الدنيا.. عزلة إعادة تقييم للأخطاء اللي فاتت عشان ماتتكررش.. مش كل عزلة معناها غربة، أحياناً بنتولد تاني بعد شوية عزلة.. فيه جملة عبقرية بتقول: (يا صاحبي إنِ ارتخت يدي، لا تُفلتها.. إنه ارتخاء تعب، لا استغناء).

حاجتين لازم يتعملوا في كل وقت. بدون تفكير ولا أى حسابات تانية. "الدعاء"، و"السعي".. رغبتك في الدعاء هي إشارة باعتهالك ربك اللي عايز يستجيب لك.. ألهمك بالدعاء لإنه عايزك تطلب فيستجيب.. باب الرزق اللي طل قدامك ظهر عشان تخبط عليه وتفتحه مش تستصغره، ولا تقف تتفرج عليه من بره.. محدش عارف أنهي لقمة في الرغيف هي اللي هتشبعه، ولا أنهي دعوة بالذات هي اللي هتستجاب.

المجهود هو الفيصل في أى حاجة.. بسببه بتنجح علاقات كتير، وبغيابه بتتفشكل علاقات أكتر.. اللي مايديش أمارة إنه شارى ويبذل مجهود ولو بسيط في سبيل المحافظة عليك في أى علاقة إنسانية يبقى قِلته أحسن حتى لو روحك فيه.. مفيش نتيجة حلوة ماسبقهاش معافرة وتعب..الموضوع عامل زى شوية سكر بترميهم في كوباية الشاى بدون تقليب وأنت فاكر إن القصة انتهت لما اتحطوا مع بعض!.. لحظة!.. فين التقليب؟.. فين المجهود اللي هيكمل الصورة؟.. العمر الإفتراضى بتاع أى حاجة مرهون بشوية المجهود اللي بيتعملوا عشانها وهما برضه اللي بيدوها طعم.

الشيء اللي بتشوفه سهل وارد يكون بيقطم ضهر غيرك، والموقف اللي أنت مقتنع إنه مايستحقش الزعل هتلاقيه مبهدل حد ماتعرفوش نفسياً.. والسبب؟.. إحنا مختلفين.. نظرتنا للأمور وحكمنا عليها مختلفة، قدرة تحملنا مختلفة، تعاملنا مع المواقف مختلف، تأثير الظروف علينا مختلف، وردود أفعالنا مختلفة..فيه اللي بيستحمل مليون خبطة، وفيه اللي من خبطة بينخ.. لا الأولاني بطل خالي من الخدوش رغم اللي مر بيه، ولا التاني خيخة وضعيف ومش هيرجع بكره قوى.. مش مطلوب من الكل للكل غير شوية "لُطف" و"استيعاب" يهونوا الأمور، ويسهلوا الصعب، ويساعدوهم يكملوا.

الحقيقة إنك بمنتهى الحياد والإنصاف لو أخدت خطوتين لـ ورا، وتابعت الفصول اللي فاتت من حياتك بنظرة موضوعية بحتة هتلاقي إن ولا حاجة من اللي كنت هتموت عليها زمان بقت فارقة معاك دلوقتي لما هديت، وشوفتها على حقيقتها!.. وقعنا وكملنا، وهنقع تاني وهنكمل تاني.. هي دي سنة الحياة.. المهم إنك تكون متأكد في كل لحظة إن أقدار ربنا دايماً في صالحك.. رب الخير لا يأتي إلا بالخير.. الحمدلله على كل نهاية كانت نهايتها تمهيد لبداية جديدة أفضل.

الإنشغال بالنفس ده شيء عظيم.. فكرة إن أكبر اهتماماتك يكون تطوير ذاتك وإزاى تكون أفضل على كل المستويات يوم عن التاني هي أهم حاجة المفروض تشغل البال.. اللي مالوش شغلانة غير إنه يتكلم عن غيره بالسوء من وراه بيعمل كده لإنه وراه فعلاً سواء في الأخلاق أو القيمة أو المقام.. كل واحد مشغول بنفسه هو إنسان سوي ومتزن، ومفيش حد مشغول بنفسه هيشغلها بغيره.