Í Konsert í kvöld heyrum við tónleika með hljómsveitinni Calexico sem fram fóru í E-Werk í Erlangen í þýskalandi 15. ágúst sl. Calexico er í raun tveggja manna hljómsveit. Þeas þeir eru tveir sem semja lögin og eru Calexico, þeir Joey Burns og John Convertino. Sveitin gerir út frá Tucson í Arizona og Calexico er einskonar Amerciana - Tex Mex - indí-rokkband, ef það segir eitthvað. Þeir Burns og Convertino voru áður saman í hljómsveitinni Giant Sand sem gerði út frá Los Angeles til að byrja með en svo flutti hljómsveitin til Tucson í Arizona 1994. Þeir Burns og Convertini smullu saman, spiluðu saman á bassa og trommur með hinum og þessum sem vantaði bassa og trommuleikara, en fóru svo að gera músík saman undir nafninu Calexico og fyrsta platan þeirra; Spoke, kom út 1995. Þeir Burns og Convertino gerðu plötu ásamt Lisu Germano og Howe Gelb úr Giant Sand undir nafninu OP 8 árið 1997, plötuna Slush. Önnur plata Calexico kom svo ´98, platan The Black light sem fékk gríðarlega góða dóma úti um allt. Í dag eru stúdíóplötur Calexico orðnar 9 talsins og sú nýjasta kom út í janúar á þessu ári. Hljómsveitin var að fylgja henni eftir þegar hún spilaði í Erlangen í þýskalandi í sumar, tónleikana sem þýska ríkisútvarpið, Bayerischer Rundfunk hljóðritaði og við ætlum að heyra í Konsert kvöldsins.