Baada ya wazazi kuwaunganisha mvulana na msichana wanaopaswa kuoana na kuhakikisha kwamba wamejuana, wazee kutoka upande wa mvulana walianza mchakato wa kuelekea katika aila ya binti anayeozwa ili kujitambulisha rasmi na kuanza mazungumzo ya kuunganisha familia hizi mbili. Shughuli hii ilikuwa mwanzo wa msururu wa shughuli nyingi za sherehe ya harusi iliyotambulika kama Oboko. Ili kuhakikisha kwamba posa lako limekubalika, upande wa aila ya mvulana anayetafuta mke walipaswa kupeleka mbuzi wanne kwa boma la binti huyu,kwa kufuata mfumo maalum. Mbuzi wawili kati ya wanne waliopelekwa walipaswa kuliwa katika hafla ya kuzikutanisha familia hizi mbili, na kisha kuendelea kwa sherehe hii ya harusi hadi tamati. Mbuzi waliosalia kati ya wale wannne waliopelekwa kwa boma la binti anayeolewa walipaswa kuchinjwa na kurejeshwa katika boma la mvulana wakiandamana na ugali wa wimbi, ambao ulikuwa ishara ya kusimika mahusiano kati ya familia hizi mbili. Iwapo una malalamishi yoyote kuhusiana na Makala haya Wasiliana nasi, au uwasiliane na John Waicua kwa barua pepe [email protected]

Katika jamii ya Abagusii, mwongozo wa tamaduni ulielekeza kwamba wazazi walikua na jukumu la kumtafuta mchumba kwa mwana wao. Wazazi wa mvulana hivyo basi walianza jukumu hili punde tu walipohisi kwamba mwana wao amefikia umri wa kuoa. Kwa mujibu wa mmoja wa waelekezi wetu katika makala haya mzee Amenya Minchira, wazazi wa mvulana na msichana huyu walitumia ishara na mazungumzo yasiyo ya wazi ili kuweza kuwakutanisha wawili hawa. Baada ya kufikisha ujumbe huu na kupokelewa vizuri, mchakato wa kuelekea akikatika boma la msichana ulianza mara moja, mzee huyu mwenye mvulana akiandamana na wazee wenzake pamoja na wavulana wengine ili kuanza makubaliano kuhusu wawili hawa na jinsi ya kulipa mahari. Iwapo una malalamishi yoyote kuhusiana na Makala haya Wasiliana nasi, au uwasiliane na John Waicua kwa barua pepe [email protected]

Katika jamii yoyote ile humu nchini, kulikua na mfumo maalum, uliotumiwa kama ishara kwamba mwanajamii amevuka katika daraja la utu uzima na kuacha kufanya mambo ya kitoto. Katika jamii ya Abagusii, daraja hili lilitiwa chapa kwa kupitia tohara iliyotekelezwa kwa wanajamii wote wa kiume kati ya miaka 10 hadi 14. Baada ya kuvunja ungo na kuanza kubaleghe, mvulana katika jamii hii alianza kutuma ujumbe kwa wazee kwamba amefikisha umri wa kupashwa tohara, wazee hawa walidadisi ujumbe huu, kisha kuamua iwapo mvulana huyu amehitimu kupelekwa jandoni au la. Katika makao haya mapya, Moto mkubwa uliwashwa, moto ambao haukufaa kuzimika hadi watakapotoka na kuanza kutagusana tena na wanajamii. Wasimamizi waliokuwa na jukumu la kuwatunza pia walikuwa na jukumu la kuutunza moto huu kwani kulikuwa na madhara ambayo yangetokea iwapo  ungezimika. Iwapo una malalamishi yoyote kuhusiana na Makala haya Wasiliana nasi, au uwasiliane na John Waicua kwa barua pepe [email protected]

Mama mjamzito alijifungua nyumbani kwa msaada wa wakunga ambao mara kwa mara walikua kina Nyanya. Katika miaka ya kale, mfumo wa elimu unaotambuliwa na kuzingatiwa kwa sasa haukuwako, hivyo basi watoto walipata mafunzo yao moja kwa moja kutoka kwa wanajamii wengine, kwa kuzingatia jinsia zao. Watoto wa kiume walitangamana sana na wazee na hasa babu zao ili waweze kufahamu jinsi ya kuishi kama wanaume. Watoto wa kike nao walitangamana na nyanya, shangazi na kina mama wengine na kupokea mafunzo yao kuhusu jamii. Mafunzo pia yalitolewa kwa kusikiliza hadithi, vitendawili na mafumbo methali pamoja na kuimba nyimbo. Iwapo una malalamishi yoyote kuhusiana na Makala haya Wasiliana nasi, au uwasiliane na John Waicua kwa barua pepe [email protected]

Mwongozo wa desturi za Abagusii uliheshimu sana familia kama kituo cha muhimu Zaidi katika jamii, huku wanaume wakiwa na uwezo wa kuoa Zaidi ya mke mmoja. Kutokana na kiwango kikubwa cha heshima kati ya wanaume na wanawake, mke wa kwanza alikuwa na jukumu la kumtafuta mke wa pili kwa mumewe na kumleta kwenye boma lao. Mke huyu mdogo alimheshimu mke mkubwa kwa kila hali na alichukuliwa kama mmoja wa familia hii, akipewa heshima na mumewe na pia wanajamii wengine. Taasubi za kiume pia zilishuhudiwa kwa kiwango kikubwa katika tamaduni za jamii hii, kwani kila mwanaume alikuwa na Fahari kuwa na Watoto wa kiume, ambao wangesaidia katika kulinda rasilimali za jamii, na pia kuendeleza tamaduni za familia. Watoto wa kike kwa upande mwingine nao walionekana kama ishara ya utajiri na ukwasi kwa familia, kwani familia iliyokuwa na wana wengi wa kike ilipata kupata mifugo wengi kutokana na mahari iliyoletwa wakati wana wale walifikia umri wa kuolewa. Iwapo una malalamishi yoyote kuhusiana na Makala haya Wasiliana nasi, au uwasiliane na John Waicua kwa barua pepe [email protected]

Jamii ya Abagusii, ni kabila la Wabantu ambao wanaishi katika Kaunti ya Kisii kusini-magharibi mwa Kenya. Jamii ya Abagusii ni mojawapo ya jamii zenye idadi kubwa sana ya watu katika taifa la Kenya. Katika ramani ya taifa la Kenya, jamii ya Abagusii inapatikana kwa kiwango kikubwa katika maeneo ya Kaskazini magharibi na huunganishwa na ukanda wa Nyanza mara kwa mara. Wao ndio kabila kubwa zaidi katika Kaunti ya Kisii, na lugha yao, ambayo pia huitwa Kisii au Ekegusii, ni lahaja ya familia ya lugha ya Kibantu. Wanajamii wa Abagusii kama tu jamii nyingi humu nchini, wanaamini kwamba chimbuko lao lilikuwa nje ya taifa la Kenya, kabla yao kuwasili humu nchini miaka ya kale na kisha kujinyakulia mahala pao wanapoishi. Sikiliza makala haya uanze safari yako ya kuifahamu jamii hii, pamoja na mila, itikadi, tamaduni na pia desturi zao. Iwapo una malalamishi yoyote kuhusiana na Makala haya Wasiliana nasi, au uwasiliane na John Waicua kwa barua pepe [email protected]