Dda Ḥemmu, ṭamen n udrum n  Iḥiducen, ɣas akken zrin fell-as 65 n iseggasen, yeţban am ilemẓi. Yeṛwa  aman n temẓin. Ilul di 20 yebrir 1952 ihi dɣa yeţzuxxu s wazemz n  tlalit-is. Yeqqaṛ-asen i yilmeẓyen n taddart-is, nek d Amaziɣ s wudem  amezwer. Ɣas akken ugar n uzgen n tudert-is yewwet-iţ di Fṛansa, tutlayt  n teqbaylit ur ţ-yeţu ara. Mačči am wid irezzun ar tmura n umalu  tagara-agi. Akken yeqqaṛ Atmani, wa yuɣal d aɛrab, wayeḍ d aṛumi.

Dda  Ḥemmu, iḥemmel ad d-yeffeɣ ar tejmaɛit yal tameddit. Ibiri deg idis,  tafelwit n uselkem gar ifassen-is. Deqs i yeɣilen d aselkim aziraz  ameẓyan. Da ḥemmu yezga yeqqaṛ-asen, ala, tagi qaṛṛen-as tafelwit n  uselkem. Teţeddu s yiwen n unagraw n wammud isem-is Android. Llant  tfelwiyin-nniḍen n Apple qqaren-asent iPAD, acu kan teddunt s unagraw  iOS. Dda Ḥemmu yezga yessefham deg-sen, acu kan ahbuh. Gullen ur gezzun  tigert. Ḥatan ihi, yerna-d Dda Lwennas ɣur-s. Dda Lwennas, ɣas akken ur  yeɣri ara, acu kan igezzu timsal imir imir. Ur s-teţunefk ara tegniţ ad  yeddu ar uɣerbaz am neţa am wiyaḍ. Imi yekker-d d agujil deg tallit-nni n  tegrawla mgal Fṛansa.