[audio:http://blogs.dickinson.edu/archive/images/PrudentiusPeristeph14.67ff.mp3]

Vt uidit Agnes stare trucem uirum

mucrone nudo, laetior haec ait:

`exulto, talis quod potius uenit,

uaesanus, atrox, turbidus, armiger,

quam si ueniret languidus ac tener

mollisque efybus tinctus aromate,

qui me pudoris funere perderet.

Hic, hic amator iam, fateor, placet;

ibo inruentis gressibus obuiam

nec demorabor uota calentia:

ferrum in papillas omne recepero

pectusque ad imum uim gladii traham.

Sic nupta Christo transiliam poli

omnes tenebras aethere celsior.’

. . .

Sic fata Christum uertice cernuo

supplex adorat, uulnus ut inminens

ceruix subiret prona paratius.

Ast ille tantam spem peragit manu,

uno sub ictu nam caput amputat,

sensum doloris mors cita praeuenit.

Subscribe with iTunes