Día a Día

O Comité Internacional de Expertos do Camiño de Santiago, co apoio de Turismo de Galicia e do Concello de Tui, organiza o coloquio "O Camiño Portugués: Presente, Pasado e Futuro unha singular ruta xacobea” que mañá xoves e o venres vai ter lugar en Tui.

O Espazo Sociocultural acollerá estas dúas xornadas nas que expertos e expertas abordarán temáticas como o Camiño de Santiago, o Camiño Portugués ou os 800 anos da consagración da Catedral de Tui, entre outros.

Melchor Fernández é un dos membros do comité organizador, é profesor na Facultade de Económicas da USC, e hoxe avanzou algúns detalles do que será este coloquio.

Lembramos que a inscrición para asistir é gratuíta, enviando un correo a [email protected].

Éxito absoluto do Curso de Cogomelos que un ano máis organiza a Comunidade de Montes de Areas. As 25 prazas dispoñibles están xa completas. Celébrase este sábado 7 ás 9.30 h.

Hoxe Lito Pereira, presidente da Comunidade de Montes de Areas, daba conta de que percibe un gran interese por aprender a recolectar estes fungos. Amais, apuntaba á gran cantidade de cogomelos que hai no monte a pesar das estranas condicións climatolóxicas, ao non ter apenas chovido nas últimas semanas.

Este sábado 7 ás 20 h o Teatro Municipal de Tui acolle a Gala do Centenario do Tyde F.C. Unha cita festiva que forma parte da programación conmemorativa dos 100 anos do club. Haberá entradas dispoñibles para público en xeral esa tarde no despacho de billetes.

Na gala estrearase amais o Himno do Centenario, tal e coma hoxe apuntaron Lis Montes e José Quintana, do comité organizador.

Amais, avanzaron dúas citas máis que celebrarán este ano ao abeiro do centenario.

O padexeiro tudense Manu Garrido foi subcampión do mundo en C2 con Jaime Duro no Mundial de Maratón de Piragüismo en Arxentina. Ademais, foi quinto en C1.

Co deportista conversamos hoxe sobre estes resultados, a súa experiencia nesta primeira vez competindo en Latinoamérica e sobre o final desta temporada.

Prazas esgotadas para a cata de La Loba que o restaurante O Bartolo acolle este xoves ao abeiro do encontro Emoción dos viños, como cita paralela. Un total de 30 persoas participarán nesta actividade, tal e coma hoxe explicou Ángel García, de O'Bartolo.

Esta fin de semana terá lugar no edificio da Praza da Inmaculada de Tui Emoción dos viños, no que 30 produtores e produtoras de pequenas elaboracións presentarán os seus viños.

Hoxe martes o Cineclub Tui proxecta “Donnie Darko” no Espazo Sociocultural da rúa Camilo José Cela. Será en dobre sesión, ás 18.30 h e ás 20.45 h. Esta película é un cruce case perfecto entre o Samaín e Alicia no País das Marabillas, que conta cunha exposición bibliográfica en curso na Biblioteca Municipal de Tui.

Con este filme ábrese a súa programación de novembro, nun mes especial para o cineclub polo seu segundo aniversario. Nolo contaba hoxe Noemí Guisande.

Dequip Tui cumpre 11 anos e hoxe conversamos con Mari Lamas sobre este aniversario e a súa historia. Valorou no Espazo Comercio, en colaboración con ACITUI, os bos momentos vividos e agradeceu aos clientes e clientas a súa confianza.

Hoxe coñecemos a música e a historia de Alda, músico e produtor; e Bry M, cantante, ambos de DN7 Events.

Hoxe na sección Raíces e vangarda o chef Judicael Romero falou de gastronomía de Samaín, e deu a receita de bolos de vento recheos de marmelada de castañas.

Até o sábado está aberto o prazo de inscrición para participar no concurso de pintura Pinta Tui, que se celebra este domingo día 8. Pode facerse de xeito presencial na Oficina Municipal de Turismo, ou a través dos correos [email protected], [email protected] ou [email protected].

José Manuel Díez, de Artes Creativas Efectos, explicou hoxe os premios do concurso e os requisitos.