Re tsweletsa go lena batheeletsi ba Moremogolo taba ya ge monna a nyetse basadi ba babedi. Setso sa segageso ga e sita le bodumedi go ya ka ditumelo tse dingwe di dumelelana le lenyalo la segadikane. Presidente Jacob Zuma ke mohlala wa kgauswi ka mono Afrika Borwa wa go nyala makga a mahlano ka lenyalo la segadikane. Magosi a rena le ona a tle a gapeletswe ke tshepediso ya setso ya gore le ge ba ka ikgethela balekani, eupswa ge e le mosadi wa setshaba yena o swanetse goba gona go tswa lapeng le lengwe la bogosi. Bjale tlhobaboroko ke ye ka lenyalo la segadikane. Malapa a banna bao ba nyetsego ka segadikane a tle a feletse a sa kwane le go tsenelana. Mabaka ao a hlolago taba ye a tsebja kudu ke basadi, banna le bana bao ba le go ka gare ga lenyalo la segadikane. A mangwe mabaka ao rena re a phopholeditsego ge re be re botsolosa taba ye ke a gore, ge monna a nyetse ka lenyalo la segadikane mme a thoma go palelwa ke go swara nmalapa ao ka tekatekano, lelapa leo le bonago le hlokomologwa le tlo hloya le lengwe. Lebaka le lengwe leo re le hweditsego ebile la gore lapa leo le bitswago le le nnyane ke lona le thomago go bona e ke le a hlokomologwa mme se se hlolwa ke ge monna a tla ba a bontsha gore o hlompha kudu lapa la mathomo goba le le golo