Re thuša motheeletši wa mosadi yowe a tlogilego bogadi a boela gae. Mosadi yo o be a lla ka go tsenatsena ga dikgadi ka lapeng la gagwe le mogatšagwe, le go palelwa ga mogatšagwe go kgala bana ba gabo. Ga bjale mosadi yo o fapane le monna ka go ya ga gabo, mme ka go re yalo lenyalo la bona le kotšing ya go phuhlama ka ge mosadi a gana go boa gae.

Moeng wa rena wa monna o botšiša gore a dire eng ka seemo sa gagwe sa go phela le mosadi yowe a robalago le banna ba bangwe ka nepo ya go dira letseno go hlokomela ngwana wa bona. Monna o re taba ye mosadi o e dira phatlalatša ka morago ga gore a lahlegelwe ke mošomo eupswa ge a be a sa šoma o be a e dira ka go fihla. Dr Spaumer o a mo eletša.

Re bolela le monna le mosadi bao ba dutšego mengwaga ye 36 ba ratana ebile ba dula mmogo eupšwa ba sa nyalana. Mosadi ke yena a tlilego ka ngongorego ye ya gore monna ga a mo nyale. Batho ba ba na le lapa le bana ba ba golo mmogo eupšwa monna ga a nyale, sa gagwe ke go reka difatanaga a sa fetše. Monna o feleleditše a itlamile lenaneong gore o tlo nyala mosadi owe ka kgwedi ya Manthole ngwaga wo(2026).

Re boledišana le moswa yo a re go o godile a se na tatagwe go fihla ge a tlo kopana le yena a bala grade 11 ka morago ga gore a mo nyake. Ge a fetša mphato wa marematlou o kgopetše tatagwe go mo iša sekolong eupšwa tatagwe o a palelwa le ge a šoma, ebile o sa tšwelapele ka go mo hlokomologa.  Bjale re be re botsisa potsiso ya gore naa ge motswadi a sa ba karolo ya bophelo bja ngwana go fihla ge ngwana a tlo kopana le yena a godile, naa motswadi o swanetše a dire eng go kgona go tswalela sekgoba seo se hlolegilego sa ge a be a se gona bophelong bja ngwana?

Re boledišana le basadi bao ba ilego ba ratana le banna mme banna bao ba be ba sa šome, eupšwa ka morago ga go hwetša mešomo banna bao ba ba tšhabela. Re be re botšiša basadi bao gore naa ge mosadi a ratana le monna a sa šome naa seo se bolela eng ?

Happiness Maake o boledišana le ditsebi tša manyalo go tlo sekaseka mekgwa ewe basadi ba re go ba ikwa ba ratwa ge banna ba ba rata ka gona. Ka lehlakoreng la banna re be re botšiša gore naa banna bona ba thabela go rata basadi ka mokgwa mang ?