【詩名】：逗逗仔

【作者】：凃妙沂

【詩文】：

囡仔的目睭愛留乎天頂的色緻

囡仔的鼻仔愛留乎花蕊的芳味

囡仔的手愛留乎樹皮的皺紋

囡仔的聲音愛留乎詩歌

囡仔的耳空愛留乎野鳥

囡仔的跤愛留乎土地

囡仔的心，愛留乎伊家己

世間的父母攏愛囡仔緊大漢

我向望你有一條逗逗仔行的路

我陪伴你去四界行踏

斑芝花的小路， 有尾蛺咧飛

四月的苦楝樹，有青笛仔咧唱歌

秋天的深山林內，有牛屎龜咧散步

我亦將走縱的跤步停落來

聽土地教咱的智慧

我將世間上祕密的鎖匙交乎你

獨立自由的心

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。