قبل الزواج بفترة، وببعض المجتمعات الأكثر تحفظاً.. بتبلش البنت تتحضر، الجهاز والتياب والأشياء الحلوة كلها، وبتبلش الأم تعلم بنتها الأمور الأكتر اهمية بالبيت، وأهم شي طبعا.. الطاعة.. طاعة الزوج.. اسمعي كلام زوجك، لا تردي بوشه، تعليمات النضافة والقطافة والتفاصيل الجنسية بالسرير كلها مطلوب تعرفها البنت لتحصل على الطاعة والرضى من الزوج بأفضل طريقة.. طاعة المرأة للزوج هيي استمرار لطاعة الوالد، والأخ بالبيت، فالبنت بكتير مجتمعات ما ممكن تمسك زمام حياتها إلا من خلال طاعة الرجال ضمن العيلة.. سواء أب او اخ أو حتى الزوج..

الحريات الفردية متلها متل الحريات العامة محدودة، وهالشي منقدر نشوفه بشكل متفاوت بالمجتمع بمختلف خلفياته الدينية والطائفية، وبمناطق المعارضة أو بمناطق النظام، وأكيد أكيد بنسب متفاوتة.. حرية الاعتقاد هيي وحدة من أهم الحريات الفردية اللي بتكفلها حقوق الإنسان بالعالم، ولكن بسوريا الأمر مختلف.. دينك دينك اليوم عن حرية الاعتقاد.. الإلحاد وكيف منشوفه بعيون السوريين..

السوريين بيشبهوا بعض، متل كل الشعوب، نحنا منتبضع من نفس الأسواق، ومنلبس ماركات قريبة لبعضها، ويمكن باستثناء موضوع الحجاب فما فيك تعرف المسيحي من المسلم من الدرزي وقت منكون ماشيين جنب بعض بالشوارع.. بس في أسرارصغيرة بالتياب، أو بالجسم، أو بالشكل بيحرص البعض أنه يضيفها على حاله ليورجي هويته الدينية بشكل واضح.. الرموز الدينية بسوريا.. رح نحكي عنها وعن معانيها.. اليوم.. ب دينك دينك .. خليكم معنا

بتعرفوا 29 أكتوبر هو اليوم العالمي للتضامن مع ضحايا جرائم الشرف؟ طيب بتعرفوا انه هاد اليوم تم اقراره تكريماً لذكرى صبية سورية اسمها زهرة العزو، واللي كان عمرها 16 سنة وقت قتلها أخوها بدعوى الشرف، وطلع بحكم محكمة قريب من البراءة رغم كل شيء.. هل فعلا تم إلغاء العمل بالقوانين اللي الها علاقة بما يسمى "جرائم الشرف".. خليكم معنا لنحكي أكتر.. دينك دينك

عندك فكرة أنو قضية الميراث هيي من أكثر القضايا تمييزاً ضد المرأة بالقوانين السورية؟ طيب هل بتعرف أنه هاد التمييز مانه محصور بدين واحد؟ وانه كل الأديان بسوريا.. كلها كلها بتميز بين الرجل والمرأة وبتظلم المراة بموضوع توزيع الميراث؟ طيب.. ببودكاست دينك دينك اليوم من راديو روزنة رح نحكي عن الميراث وتوزيع الحصص بسوريا.. بكل الأديان وبالقانون وبالمجتمع كمان.. دينك دينك.. خليكم معنا!

السحر والشعوذة، كتابة الحجابات وقراءة الطالع والتبرك بالمزارات، (قراءة سريعة من هنا ) والمشايخ والجن والشياطين والطلاسم على الأوراق! كلها أمور بيآمن فيها بعض السوريين من مختلف الأديان والطوائف.. وغالباً بتتورط بهي الأمور نساء كتار ولأسباب رح نحكيها بعد شوي.. لتعرفوا اكتر عن علاقة السوريين بالسحر والخرافات اسمعونا بحلقة اليوم من بودكاست .. ديني دينك

بسوريا في خمس طوائف إسلامية معترف فيها، وأكثر من 11 طائفة مسيحية، وخلفيات اثنية مختلفة عن بعضها، وسبع محاكم، كل وحدة فيهم الها سلطة النظر بقضايا الزواج والطلاق وبتختلف احكامها وقوانينها بحسب المذهب الديني اللي بتتبع اله.. عم تقول الموضوع معقد؟ أي والله معقد! .. الموضوع معقد.. كونوا معي اليوم بدينَك دينِك.. رح احكيلكم عن زواج الطوائف، ونسمع قصص ملفتة لتلت أشخاص من طوايف وخلفيات مختلفة مروا بتجارب مختلفة! دينك دينك!

المجتمع السوري بشكل عام بيشوف الإجهاض بطريقة مريبة.. وبيربطه بالعلاقات الغير شرعية... بالكفر! وبمخالفة تعاليم الأديان والقتل ومخالفة القوانين والشرائع السماوية والمدنية بنفس الوقت! كونوا معنا اليوم ببودكاست دينَك دينِك من راديو روزنة لتعرفوا أكتر عن الإجهاض وعلاقة الأديان بسوريا بها الموضوع!.. وأكتر!