OPEN HEAVENS

MATALA LE LAGI MO LE ASO SA 22 MATI 2026

(tusia e Pastor EA Adeboye)

Manatu Autu:  E mamana au upu (Your words are powerful)

Tauloto Tusi Paia: Faataoto 18:21 “O le oti ma le ola, o lo‘o i le pule a le laulaufaiva ia; o ē manana‘o i ai latou te ‘a‘ai i lona fua.”

Faitauga - Tusi Paia: Galuega 5:1-11

Ua faailoa mai e le fuaiupu tauloto o le asō ia I tatou, o le ola ma le oti o loo I le pule a le laulaufaiva. Ua ta’u mai fo’i i le tusi o Salamo 107:20; e faapea, ua auina atu e le Atua lana Afioga e faamalolō ma laveaiina le fanauga a Isaraelu i lo latou malaia. E mafai e upu ona faamalolō ma fa’asa’oloto, peita’i e pei ona o tatou faitau i le faitauga mai le Tusi Paia o le asō, e mafai fo’i e upu ona fasioti ma faaumatia. O Anania ma Safaira na maliliu lava i le taimi na faalogo ai i upu na tautala atu ai Peteru le auauna a le Atua ia i laua. 

E i ai le mana mata’utia i le upu folafola a le Atua. O le upu a le Atua e mamana tele, fai mai le Tusi Paia o lo o ola ma galue (Eperu 4:12). A ō faatasi le upu ola ma le faatuatua ola o se atalii po o se afafine o le Atua, e leai se tapula’a o vavega e mafai ona tutupu.

I nai tausaga ua mavae na sau ai i le ofisa tutotonu o le RCCG i Lagos Nigeria se tagata sa ma’i tigaina. Sa gasegase o ia i le toto maualuga ma le tele o isi ma’i. Ina ua amata le aoga Aso Sa na faapea mai le faiaoga, “o le asō o le a o tatou su’esu’eina ai le sopoia o le sami ‘ula’ula. O le a o tatou vaai i le mana o lē na te mafai ona fa’aliliuina le sami e avea ma aisa. O le a o tatou vaai i le mana o lē e mafai ona fai atu i matagi uma e fifilemu.” Ina ua faalogo le tagata i lea faamatalaga a le faiaoga, na iloa e le tamaloa i le taimi lea ua auina mai e le Atua le upu mo lona faamalologa e ala faapitoa mai i le fofoga o le faiaoga aoga Aso Sa. Na faapea ifo i lona loto, “A!! ua oo mai lo’u aso!” Na matua’i mautinoa lava le tamaloa, na amata ona tagi i lona fiafia. Peita’i na ia iloa o le aoga Aso Sa e le na o le talanoaina o le tala i le sami ‘ula’ula. Na ia iloa o le taimi ua saunia mo lona faamalologa. Na malolo le alii lenei a o le’i uma le lesona a le aoga Aso Sa. O lona faatuatua ola ua tu’u faatasi ma le upu ola a le Atua e faataunuu ai lona faamalologa.

A e fia iloa se kerisiano o i ai le faatuatua i le upu a le Atua, e te iloa i ana upu. A o tautatala pea isi i le lē mafai ona o tulaga faigata o siomia i latou, e ta’utino pea lea uso ma talitonu i le upu a le Atua. A fai mai tagata ua faavaivai ona o ni tulaga lē lelei ma faanoanoa na ui ai, o le a folafola ma le loto mautinoa le uso faapea; e i’u i le lelei ma le fa’aeaina (Iopu 22:29). E le pine ae tupu ma faataunuuina e pei o le ta’utinoga a le uso kerisiano.

Le au pele e, tautala ma folafola le upu a le Atua i luga o faafitauli i lou olaga ma le loto faatuatua. O au upu e mamana, e iai le pule e fa’amālōlō ma fa’asa’oloto pe a folafola i le faatuatua ia Iesu Keriso. I le suafa o Iesu, Amene.