Í Konsert í kvöld förum við á tónleika með ensku sveitinni Editors í Lausanne í Hollandi og heyrum líka nokkur lög með Vök frá Iceland Airwaves 2017. Editors er rokkband af gamla skólanum, gítarar, bassi, trommur, hljómborð og söngur. Sveitin var stofnuð árið 2002 í Birmingham á Englandi og hét fyrst Pilot the Pride og síðar Snowfield áður en nafið Editors varð fyirir valinu. Hann heitir Tom Smith söngvarinn sem spilar líka á gítar. Russell Leetch spilar á bassa og syntha, Ed Lay á trommur og slagverk, Justin Lockey á gítar, og Elliott Williams á hljómborð. Fyrsta platan þeirra heitir The Back Room og kom út 2005. Þar eru lög eins og Blood og Munich sem gerðu það nokkuð gott og platan var tilnefnd til Mercury tónlistarverðlaunanna. Önnur platan; An End Has a Start, fór beint á topp breska vinsældalistans þegar hún kom út í júní 2007 og fyrir hana var Editors tilnefnd til Bresku tónlistarverðlaunnan í flokknum hljómsveit ársins. Þriðja platan - In This Light and on This Evening, kom út í október 2009 og fór á topp breska listans eins og platan á undan. Fjórða platan; The Weight of Your Love, kom út í júlí 2013, sú fimmta, In Dream, í október 2015 og sjötta platan; Violence, kom út í fyrra. Editors hefur lengi þótt gott tónleikaband og það hefur verið uppselt á tónleika þeirra árum saman og sveitinni verið líkt við sveitir eins og Echo & the Bunnymen, Joy Division, Interpol, The Chameleons og U2. Og á síðasta túr, síðasta haust, spilaði íslenska hljómsveitin Vök með þeim á slatta af tónleikum í Evrópu. En Editors hafa verið að fylgja eftir nýjustu plötunni sem kom út í fyrra og EBU tók upp tónleikana þeirra í Lausanne í Apríl í fyrra og við ætlum að heyra þá í kvöld. En síðustu mínúturnar í þættinum á hljómsveitin Vök sem er þessa dagana í enn einum Evróputúrnum, er einmitt að klára í bili í kvöld í Poznan í Póllandi. Sveitin verður svo með útgáfutónleika í Iðnó 22. mars og á Græna Hattinum á Akureyri 23. mars, en það er að koma ný breiðskífa frá Vök núna í mars og þar verður að finna hittarana sem við höfum verið að spila á Rás 2 undanfarið. Vök hefur sent frá sér hvern smellinn á fætur öðrum síðustu mánuði. Við heyrum í þættinum nokkur lög frá tónleikum með Vök úr Hofi á Akureyri frá Airwaves 2017, en það var bein útsending frá Hofi.