Skeptisisme volg op Suid-Afrika se jongste Staatsrede. Beleggingsekonoom Dawie Klopper het aan Kosmos 94.1 Nuus gesê hy was weereens nie beïndruk met president Cyril Ramaphosa se toespraak nie en het dit beskryf as 'n herhaling van ou retoriek. Klopper sê baie van die toespraak het gefokus op dekades van regeringsmislukkings in basiese dienslewering. Terwyl hy toegee dat die erkenning van die probleme nodig is, voer hy aan dat die voorgestelde oplossings te veel staatmaak op die skep van nuwe komitees, in plaas daarvan om die departemente wat reeds verantwoordelik is vir dienslewering, reg te stel.