A pioneira da aviación galega, Elisa Patiño, logrou en 1913, na praia de Baltar, (Sanxenxo), algo que probablemente moitas outras soñaran, pero ningunha fixera: voar. Se temos en conta que o primeiro voo dos irmáns Wright tivo lugar en 1903, é dicir, só dez anos antes, a figura de Elisa Patiño emerxe coma a dunha pioneira ignorada nas crónicas da aviación española, que ben merece ocupar un lugar á beira de mulleres icónicas coma a francesa Raymonde de Laroche, que en 1910 se converteu na primeira muller en conseguir a licenza de pilotaxe, ou a americana Harriet Quimby, que cruzou a canle da Mancha en 1911 nun voo con motor. A investigadora Milagros Bará rescata a súa fascinante historia e mostra por primeira vez unha escolma de fotografías inéditas cedidas pola familia.