Selevramos el Día Internacional de la Musher. La musher sefardí, arte en la vida i en la literatura oy. Ofresemos un programa selevrando a todas las musheres, en espesial kompartimos informasiones sovre presonalitades de musheres sefardim en el mundo del arte poétiko kontemporáneo, ansí komo kantes en las bozes de kantaderas. En Istoria, investigasiones de Matilda Gini Barnatán, ke mos komparte su temátika "La musher sefardí, su fuerza en el rol de transmisora de kultura i lingua" i "La fuerza de la musher desde los manaderos Bíblikos a la tradisión de kaza", mos adentramos en el mundo de la musher komo presonaje en la konservasión de la lingua i tradisiones en verso las djenerasiones del avenir. La poesía en este programa es dedikada a la poeta sefardí Rita Gabbai. El Patrimonio muzikal se engalana kon kantes en sefardí sovre musheres i sus estapas "A la una yo nací" kante del siklo de la vida por la kantadera sefardí Esther Ackermann, el kante de bodas "Eskogiendo Novia" de los sefardim de Oriente i un kante dedikado a la musher "Clara sos como el sol" en la boz de Ángel Carril. Kontinuamos kon kantes kontemporáneos onde se reflekta la valor de la musher "Las Tijas" de Flory Jagoda i "La Novia" de Viviana Rajel Barnatán. Kurunamos el programa kon la boz de unotra musher, la kantadera Marga Grajer ke interpreta el kante sefardí "La Canariera".

Esta semana selevramos Purim. La fiesta de la Reina Ester ke reprezenta la valentía i la salvasión. Una festividad ke mos rekodra la fuerza de la identidá i de la musher, ke se reprezenta en la reina Ester, Purim se selevra el 2 i 3 de Marzo. Vos kontamos sovre el orijín istóriko de Purim. Es kostumvre disfrazarse, i trokar platikos entre la famyia i amigos, komo simbol de la unión i meldar el Livro de Ester (Torá) en la Sinagoga i en las moradas. Kuzina de Purim: se aparejan en kaza i gostan dulsurias ke se yaman "Orejas de Amán" kon toda su diversitá de savores. Una fiesta alegre ke da fin kon un bankete ke rekodra el bankete de alegría por la reushitá de la vedrá i de la salvasión. Ofresemos Teatro Sefardí de Salónica de 1932, se trata de una ovra en lingua sefardí ke reprezenta la istoria de Purim i de la Reina Ester: aktos i kantes de la ovra "Los Cantes de Ester", gravasiones dokumentales ke amostran la rikeza de la lingua en unión kon el desvelopamiento de la istoria de Purim. Sentimos una kompla de Purim tradisional ke se kanta en la festividad, de los djudiós sefardim de Oriente, en este kavso de orijín en Salónica, Grecia "Alabar quero al Dió" a kapela. Kurunamos el programa de Purim kon la kompla festiva de la Comunidad Sefardí de Tetuán, “Esta noche de Purim” en la versión del grupo Voices of Sepharad, Purim alegre a la famyia sefardí i a todos los oyentes.

Ofresemos el testimonio de la superviviente de orijin franzés Denise Papo ke da una eksplikasión sovre komo reusheron eyia, i su famyia a salvarse de terminar sus vidas en kampos de eksterminio. Denise Papo es una superviviente franzesa sefardí de la Shoá, Holocausto, nasida en París en 1937 ofresió su testimonio en el Acto Ofishial del Día Internacional de Memoria del Holocausto y Prevención de Crímenes contra la Humanidad en el Senado el pazado 27 de Enero. Estos testimonios son de gran valor istóriko. Su relato detalyado mos yeva a su vida desde su nasimiento injunto a su ermana djemela Agnes, ke malorozamente ya murió, i komo fueron eskondidas en una kaza de una maestra kon gran pelikoro de ser deskuvertas, dempués de pasar por Milán i París, reushen salvar sus vidas injunto a la de sus padres, malgrado gran parte de su famyia fue muerta en los kampos de eksterminio nazis. La dezisión de su madre, kontra todo el pelikoro de kedarse kon sus ijas, dunke eyia sí yevava la J de djudía en su pasaporte, marka a una presona i madre ke metió l'amor por endriva de todo, i esta dezisión markó la diferensia. Kon estos testimonios se da valor a la istoria para nunka ulvidar i ke las djenerasiones de oy i del avenir puedan konoser lo ke akontesió, dunke munchos supervivientes de la Shoá ya no están en vida. Kurunamos el programa kon el kante tradisional "Arvolés yoran por luvias" interpretado por Isaac Levy.

Informamos sovre la entrada de Calatayud en la Red de Juderías de España. Entrevista a José Manuel Aranda, alcalde de Calatayud. Kon él avlamos sovre el orijin de la Djudería, ke era la Sigunda en importansia de Patrimonio Real de Aragón, sovre su entrada en la Red de Juderías de España, la viesha Djudería i dempués Aljama, su istoria i desvelopamiento i su rikeza patrimonial djudeo-espanyola. Ofresemos investigasiones istórikas: La prezensia djudía en Calatayud es destakada basho dominasión musulmana, malgrado no se troka en Aljama asta fines del S XI. La mayor parte de datos ke se konservan son de dempués de la konkista de Calatayud en 1120 por Alfonso I el Batallador. En la Alta y Plena Edad Media los Reyes aragoneses keren atraer a kristianos, mudéjares o djudiós, para morar en tieras konkistadas. La komunidad djudía kontinuó en su mezmo kartier, en la parte alta i fortifikada de la sivdad, injunto i pegada al kastiyo de Don Álvaro o Doña Martina, ansimezmo afamado komo Castillo de la Judería. El kartier kontava kon una parte de entrada prinsipal traverso un arko de medio punto, desde la plaza de San Andrés, i suvía por la kuesta de Santa Ana. La Djudería se topava dispartida por panyos de muraya i la propia orografía, ke uvligó a sus moradores a praktikar diversas puertas i trenkes. Te kontamos kuantas Sinagogas topava esta importante Djudería de Calatayud, ke destakó por sus médikos djudiós espanyoles. La Djudería de Calatayud topava varias Sinagogas, asigún investigadores 7 Sinagogas. Las Sinagogas más importantes eran tres: la Mayor, la Menor i la ke se fragua kon apoyos de Juce Abencabra. Todas eyas fueron refraguadas o reformadas a finales del S.XIV kon mano de ovra mudéjar. La Sinagoga Mayor es el sentro de los enkontros de la Aljama. Dempués de la ekspulsión de los djudiós de Sefarad en 1492 fue trokada en eklisa bajo la advokasión de Santa Catalina de Sena, oy es la Ermita de la Consolación. Unas anyadas atrás fue restaurada su fachada en piedra siyar, kon sus dos puertas de entrada de arkos apuntados. Toda la informasión sovre la istoria, las Sinagogas i el pazado i prezente de esta Djudería la konosemos en palavras de su alcalde. Kurunamos el programa kon el kante tradisional "Una matika de ruda" interpretado por la kantadera Fortuna. "Emisión Sefarad: La alma de Sefarad se topa okulta en kartiers de las Djuderías, ke guadran sus memorias".

Programa dedikado a la Casa de Sefarad en Córdoba, Museo, Sentro Kultural i Biblioteka. Entrevistamos a su Direktor Sebastián de la Obra, gran lavorador, difusor de la kultura i patrimonio material i inmaterial de Sefarad. Casa de Sefarad en Córdoba aresivió el Premio Mem Guimel 2026. Konversamos kon Sebastián de la Obra sovre el Galadrón Mem Guimel, la importansia de la konservasión de la lingua i Patrimonio Sefardí, el Museo i sus mueve salas, la rika koleksión i la diversa aktividad ke yeva este Sentro de Kultura i Istoria en Córdoba: Tayeres, Konferensias, Konsiertos, Prezentasiones, Seminarios i muncho más, todo lo konosemos en palavras de su Direktor. Casa de Sefarad es un Museo y Sentro Kultural, de karákter partikolar, su buto es restaurar i rekuperar la memoria i el patrimonio djudeo-espanyol, sefardí. Casa de Sefarad se topa en el korasón mezmo de la Djudería de Córdoba, en la Calle de los Judíos. Komo Sentro kultural bivo desvelopa una variada aktividad alrededor de su patio i de las diversas salas y espasios de ekspozisiones, indemás esta Kasa, konta kon elementos patrimoniales de finales del siglo XIV, un referente museístiko eksepsional en Andalucía. Konta kon una Biblioteka i Sentro de Dokumentasión avierto a investigadores. A su koleksión bibliográfika, emerográfika i dokumental se suma su mediateka, kon un ancho katalogó onde topamos rejistros de la dokumentasión ke se guadra en este Museo i Sentro Kultural. Esta semana selevramos Tu Bisbat en el Kalendario Evreo (fiesta de los arvolés, flores i frutos) los pazados días 1 i 2 de Febrero. Kurunamos este programa kon la kompla sefardí festiva de Tu Bishbat "El debate de las flores" aresivida por la informante Clarita Benahim, (CJM) versión interpretada por Viviana Rajel Barnatán.

Desde Emisión Sefarad konmemoramos la Memoria de la Shoá, (Holocausto). Mos topimos prezentes este Martes 27 de Enero de 2026 en el Akto Ofishial de Conmemoración del Día de la Memoria del Holocausto, en el Senado, kon el asendido de velas por parte de los supervivientes, kon la orasión por los muertos en la Shoá, 6.000.000 de djudíos, entre eyios 1.500.000 de ninyos djudiós, indemás de gitanos, jazinos i omoseksuales, i la orasión por las víktimas: "El male Rajamim", por Moisés Amselem, Rabino Principal de la Comunidad Judía de Torremolinos, es dever rekodrar para ke nunka más se torne a repetir, ofresemos partes de este importante akto de konmemorasión: Palavras de D. Pedro Rollán, Presidente del Senado, palavras de D. José Thovar Direktor de Centro Sefarad-Israel, D. David Ovadiá, Presidente de la Federación de Comunidades Judías de España, Amara Montoya, Coordinadora de la Fundación de Instituto de Cultura Gitana, Concepción Díaz Berzosa, Vicepresidenta del Amical de Mauthausen y otros campos de exterminio. Testimonio de Denise Papo superbiviente del Holocausto. El akto dió fin kon palavras de D. Ángel Víctor Torres, Ministro de Política Territorial y Memoria. Melodias instrumentales akompanyan el programa ke kurunamos kon "Kol Nidrei" orasión evraika i melodía kompuesta por Max Bruch. Interpretasión en piano Perla Gonilski, chelo Marcelo Bru.

Ofresemos un programa muy savurido kon un día en la Kuzina de Emisión Sefarad: rechetas sefardim i kantes gastronómikos. Kompartimos kon los oyentes rikas rechetas en la kuzina sefardí desde la manyana, mediodía, tadre i nochada i muy kolay de azer. Entre las rechetas ke aparejamos oy en "La Kuzina de Emisión Sefarad" eskojimos la recheta de "Enchusa de berendjena" una recheta kon base en la berendjena, una vedrura ke partaja munchas rechetas de orijín sefardí, kontinuamos kon una freska "Salata de kuchundurya" (remolacha) para shabat, kumidikas en famyia i kualker selevrasión. Para yegar a la tadre i nochada vos ofrsemos un riko kavé kon mezés i dulsurias ke no pueden mankar en la mesa sefardí "Roskitas de Koko", unas roskitas muy savuridas ke adornan i engalanan muestra mesa. Siempre para los oyentes lo mijor en la kuzina i en la múzika sefardí. Los kantes gastronómikos ke akompanyan el programa son "La komida la manyana" en la interpretasión de Marlène Samoun, "Los guisados de la berenjena" en la boz de Marga Grajer i "Ajada" una salsa sefardí ke mos konta este kante, en la boz de Mónica Monasterio. Kurunamos el programa sintiendo el kante umorístiko gastronómiko sefardí "Pescado frito" en la versión de Paco Díez i Raúl Olivar.

Ofresemos un programa sovre la istoria de la Inkizisión, komo se krea una Inkizisión moderna, las Bulas Papales i los rikos konversos ke de adjuntaron kon el buto de matar a los inkisidores en Sevilla. Kompartimos importantes investigasiones sovre la istoria de la Inkizisión en Sefarad, ya en el s XV, en España no se topava nada klaro, dempues de las konversiones forzosas de 1391, topando el provlema es su mayor puntu en medio el reinado de Enrique IV ken pidió al Papa ke nomvrara dos eklesiastikos para Castiilla La Nueva i Andalucía i unotros dos para Castilla La Vieja kon el kargo de inkisidores, kon aporvasión del Rey. En 1475 basho reinado de los reyes Católicos Nicola Franco por medio de la bula “Cum sicut non sine displisentia”, avía ke aktuar kontra el “provlema konverso”. Vos meldamos un "dokumento orijinal" sovre el kastigo a los djudaizantes, ansimezmo investigasiones del investigador Juan Blázquez Miguel. Las Bulas Papales: los Reyes piden autorizasión al Papa Sixto IV para poder krear una Inkizisión moderna kon la kuala komvatir este pelikoro i es ansí ke el 1 de noviembre de 1478 el Papa promulga la bula “Exigit sincerae devotionis affectus” por la kuala fue kreada la Inkizisión espanyola. En Patrimonio muzikal ofresemos kantes i romanses komo "Primavera en Salonico", en la boz de Mara Aranda i "Diego León" en la versión de Joaquín Díaz. Kurunamos el programa kon el romanse tradisional "También de la madrugada" en la versión de Joaquín Díaz.

Melilla: Oy ofresemos la entrevista a Mordejay Guahnich, Presidente de la Asociación Cultural Mem Guimel, investigador de la kultura sefardí, kon él konversamos sovre la entrada este 2026 de la ciudad de Melilla en la Red de Juderías de España, Caminos de Sefarad i sovre el akto de Entrega de los Galadrones Mem Guimel, selevrado el 8 de Enero de 2026 en el Club Marítimo de Melilla, ke destakan kada anyada institusiones i presonas ke lavoran por la difusión i konservasión de la kultura sefardí. Mem Guimel lavora kada anyada kon konferensias i aktividades para difusión de la kultura i istoria sefardí. Esta anyada los galadronados son: la Red de Juderías de España, Caminos de Sefarad, Casa de Sefarad en Córdoba i D. Antonio Sierras Sánchez. Ofresemos informasión sovre la Komunidad Djudía de Melilla ke kontinúa aktiva desde sus empesijos, i avlamos sobvre su patrimonio material, su Sinagoga i su destakada istoria kon un pazado i un prezente importante en Sefarad. Rekodramos ke en 2023 Matilda Gini Barnatán, kreadora i Direktora de muestro programa asta 2019, investigadora i eskritora aresivió el Galadrón Mem Guimel 2023 por toda una vida dedikada a la difusión i konservasión del patrimonio istóriko i kultural sefardí, ansí komo a la difusión i konservasión de la lingua sefardí o djudeo-espanyola. Los Premios Mem Guímel kontan kon el buto de rekonoser el lavoro de presonas en su kompromiso i trayektoria para konservar el legado djudió en Sefarad, pujar el pazado sefardí i de los djudiós espanyoles, indemás de dar apoyo i desvelopar lavoros i aktividades kon el buto de pujar i aondar en la kultura djudía-sefardí, el turismo djudió, Djuderías tanto sus tradisiones komo kostumvres i patrimonio. Kurunamos el programa kon el kante kontemporáneo "La Novia" dedikado al Shabat, (Segundo Premio Festiladino, en Yerushalayim, Israel) autoría i interpretasión Viviana Rajel Barnatán. "Emisión Sefarad: la aktualitá en istoria i tradisiones de los djudiós espanyoles en el oy de Sefarad".

Informamos de las sesh muevas sivdades ke pasan a ser parte de la Red de Juderías de España. Dempués de un prozeso de análiza ya muevas sesh sivdades de Sefarad son parte de la Red de Juderías de España. Ansí se akodró i aprovó en la numeró 68 Asamblea General, el pazado 12 de Diciembre de 2025. Las muevas sivdades ke ya topan su rolo ofishial de membros de pleno derecho desde el 1 de enero de 2026 son: Sevilla, la Ciudad Autónoma de Melilla, Calatayud i Uncastillo en Zaragoza, Llerena, en Badajoz i Valencia de Alcántara en Cáceres estas dos últimas sivdades ke apartienen a la Comunidad Autónoma de Extremadura, eskapando ansí el prozeso de kada una de estas sivdades kon el buto de ser parte de la Red de Juderías de España.

En muestros programas kontamos kon Iñaki Echeveste, Director Gerente de la Red de Juderías de España kon ken avlamos i aondamos en el patrimonio sefardí i istóriko i material de las distintas Djuderías de Sefarad i oy kompartimos los últimos javeres sovre esta interesante Red.  El buto de la Red de Juderías es promover el turismo i la konosensia del pazado istóriko djudió, es ansí ke las sivdades kontan kon el  lavoro de difuzar la istoria del djudaísmo espanyol kon sus lugares, dokumentasión istórika i presonajes en kada una de las sivdades, un desvelopamniento de muestra kultura sefardí para ke todos puedan vishitar estas sivdades i ke amostren su patrimonio arkeolójioko, las ke lo topen i el patrimonio istóriko djudió kon la istoria de kada sivdad en partikolar traverso konferensias, konsiertos, kursos, ekspozisiones i más aktividades.

Komo siempre mos akompanyan kantes de los sefardim, en este programa sentimos el kante de bodas "Ay Senyora Novia" en la versión de Janet & Jak Esim i el romanse "Mi padre era de Francia" en la interpretasión de Isaac Levy. Kurunamos el programa kon un ermozo kante de kuna de Grecia "Nana de Salónica" en la versión de Mónica Monasterio i Horacio Lovecchio.

"Emisión Sefarad, una mueva anyada yena por entero de kultura, kantes, istoria, literaturas i gastronomía del korasón de Sefarad".