OPEN HEAVENS

MATALA LE LAGI MO LE ASO GAFUA 2 MATI 2026

(tusia e Pastor EA Adeboye)

Manatu Autu: Faagalo ae tausisi ma agai i luma (Forget and press forward)

Tauloto Tusi Paia: Filipi 3:13-14 “Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i. ‘Ou te tausisi atu i le fa‘ailoga, ‘ia maua ai le taui na vala‘auina ai a‘u mai lugā e le Atua ‘iā Keriso Iesu.”

Faitauga - Tusi Paia: Kenese 50:15-21

E faigofie ona galo iai tatou mea matagofie ua faia e le Atua, o le mafuaaga lea e tele ai fuaitau o le Tusi Paia o loo faamanatu mai iai tatou, ‘aua nei galo’. I le Teuteronome 8:11, na lapatai e Mose le fanauga a Isaraelu ia aua nei galo iai latou lo latou Atua.  Fai mai le Salamo 103:2, e aua nei galo se tasi o ana meaalofa. E faapena foi le Salamo 78:7, o loo lapatai mai e aua nei galo iai tatou ana galuega. Peitai e ui o le finagalo o le Atua e aua nei galo iai tatou mea uma ua ia faia, o loo ia faatonuina foi i tatou e aua le tumau ai i le tuanai. 

I le tauloto mai le Tusi Paia o le asō, na faamatala e Paulo i le Ekalesia i Filipi o se tasi o mea e na te faia o le faagalogalo i mea ‘ua tuana‘i, ‘ae momo‘e punou a‘i fo‘i i mea o lumana‘i, ona ia lapatai lea iai latou ia manatunatu faapea, e pei ona tusia i le fuaiupu 15. E iai tagata ua uu mau i manuia o le tuanai, e talanoa i ala na faaaogaina ai i latou e le Atua ma latou maua vavega tetele i aso ua tuanai. Peitai e leai ni fua i o latou olaga i le taimi nei e latou te iloa le Atua. E tumu i latou i le loto ita, loto lē faamagalo, loto leaga ma isi fua o le tino. O kerisiano e talanoa ma viia le Atua i mea tetele ua faia i le tuanai e aunoa ma le fiaai e siitia mea e faia, e latou te lē maua le faauuga fou mai ia te ia. E fou lona alofa mutimutivale i taeao uma (Failauga 3:23), o lona uiga o soo se kerisiano e tumau i mea ua tuanai, o le a ia misia le siitia o le agalelei ma le alofa mutimutivale o le Atua. E atoa i le asō le 84 o ou tausaga, i le alofa tunoa o le Atua, o loo ou faia pea mea tetele mo lona malō aua ua aoaoina au e aua le tumau i manuia o le tuanai ae ou te faalagolago i lona alofa mutimutivale e fou i taeao uma. 

Le au pele e, o le faagalogalo o mea ua tuanai e fesoasoani ia te oe e momoe punouai i mea matagofie i le lumanai. O le faagalogalo o mea faigata na ui mai ai e oo i mea na manaumalo ai, o le a fesoasoani ia te oe e ausia faamanuiaga fou ua saunia e le Atua. Ana le faagalo e Iosefa le tigā o mea leaga na faia e ona uso, semanu e saisaitia pea o ia e le loto ita. E pei ona tatou vaai i le faitauga mai le Tusi Paia o le asō, na ia fai i ona uso e ui o latou mea na faia sa fuafuaina e faaumatia ai o ia, ae na liua e le Atua mo lona lelei. 

E iai ea se mea i lou tuanai e tatau ona e faagalogalo ina ia mafai ona alu i luma i mea tetele e sili atu? Ole atu i le Atua e faaali atu ia te oe ma faamalosi ia te oe ina ia e lafoai iai. Ao e faia, ou te tatalo ia susulu pea ou ala, i le suafa o Iesu. 

Tatalo, 

Tamā, ia e faamanuia ia Pastor EA Adeboye i lona aso soifua, ma ia e siitia pea o ia ma ana galuega e faia mo oe, i le suafa o Iesu, Amene.