OPEN HEAVENS

MATALA LE LAGI MO LE ASO GAFUA 19 IANUARI 2026

(tusia e Pastor EA Adeboye)

Manatu Autu: Faamanuiaga e lē suia (Irrevesible blessings)

Tauloto Tusi Paia: Eperu 6:13-14 “Auā a o folafola mai e le Atua ‘iā Aperaamo, ‘ua lē mafaia ‘ona tautō ia i se tasi e sili ‘iā te ia, o lea na tautō ai o ia ‘iā te ia lava. ‘Ua fa‘apea mai, “E moni lava, ‘ou te matuā fa‘amanuia ‘iā te oe, ma ‘ou matuā fa‘ato‘ateleina lau fānau.”

‭‭

Faitauga - Tusi Paia: 2 Samuelu 7:1-16

I le faitauga o le Tusi Paia o le asō, na fetalai le Atua ia Tavita, ‘Tusa pe faatigā sou atalii ia te a’u pe a e oti, ou te aoai ma faatonu ia te ia ae ou te lē aveesea lo’u alofa mutimutivale mai ia te ia. Ou te fa‘atumauina ma mausalī lou nofoāli‘i e fa‘avavau, poo le a lava le mea e tupu.’. O le mafuaaga lea o Iesu, o le Tupu o Tupu, na faailoa mai o ia o le a’a ma le fanau a Tavita i le Faaaliga 22:16. O le faataitaiga lelei lea o se faamanuiaga e lē suia. A e faitau loloto i le faitauga mai le Tusi Paia o le asō, e te iloa ai, o le folafolaga a le Atua na faia ina ua faatoa maea ona faia le filifiliga a Tavita e na te fauina lona malumalu. O se mea e lei faia muamua e se tagata mo le Atua. 

I le Kenese 22:1-8, na fai e le Atua se tamai suega mo Aperaamo i le faatonu e ave lona atalii e osi ai le taulaga. Ina ua pasia le suega a Aperaamo, na tauto le Atua ia te ia lava, e faamanuia ia te ia, 

“‘ua ‘ou tautō a‘u ‘iā te a‘u; ‘ua e faia lava lenei mea, ‘ua e lē tāofia lou atali‘i, o lou atali‘i e to‘atasi; o le mea lea ‘ou te matuā fa‘amanuia ai ‘iā te oe, ma ou matuā fa‘ato‘ateleina lava lau fānau e pei o fetū o le lagi e pei o le oneone fo‘i i le matāfaga; e maua fo‘i e lau fānau faitoto‘a o ē ita ‘iā i latou. O lau fānau fo‘i e manuia ai atu nu‘u uma lava o le lalolagi auā ‘ua e usiusita‘i i la‘u ‘upu.” Kenese‬ ‭22‬:‭16‬-‭18‬

E lei manaomia ona tauto le Atua aua a fetalai loa, e taunuu lava. Peitai na tauto le Atua e faaalia o le faamanuiaga ua ia folafolaina e le toe suia. O loo faailoa mai ai iai tatou, o le maua o le faamanuiaga e lē toe suia mai le Atua, e tatau ona tatou faia se mea e pai i lona loto. E mafai ona faamanuia le Atua ia te oe e lē mafai ona toe suia pe afai tatou te faia se mea e faafiafia ai i le Atua. 

O se tasi tagata e mafai ona faia se folafolaga e lē toe suia, o lou tamā. I le Kenese 27:30-33, fai mai le Tusi Paia e lei leva ona maea ona faamanuia Isaako ia Iakopo, ae foi mai Esau sa alu e tulimanu. Ina ua iloa e le tamā e sese le tagata ua ia faamanuia iai, na ia fai atu ia Esau ua maea ona ia faamanuia ia Iakopo ma e lē mafai ona toe suia. A e faitau auiliili i ia fuaiupu mai le Tusi Paia, e te iloa ai na maua e Iakopo lea faamanuiaga ina ua maea ona ia saunia se meaai faapitoa na faafiafiaina ai lona tamā. A e faia se mea e fiafia ai lou tamā e faaosofia o ia e faamanuia ia te oe mai lona loto, ma e lē mafai ona toe suia. Ou te tatalo e foai atu e le Atua ia te oe ni faamanuiaga e lē mafai ona toe suia, i le suafa o Iesu. Ia e faia se mea taua mo lou tamā poo seisi e faatamā ia te oe i lou olaga i le asō ma ole atu te ia e faamanuia atu ia te oe, i le suafa o Iesu, Amene.