OPEN HEAVENS

MATALA LE LAGI MO LE ASO TOONAI 23 ME 2026

(tusia e Pastor EA Adeboye)

Manatu Autu: Fa’amasinoina fa’aleagaga 2 (Spiritually discerned 2)

Tauloto Tusi Paia: Salamo 13:3 “Le ALI‘I lo‘u Atua, ‘ia e silasila mai ma tali mai ‘iā te a‘u; ‘ia e fa‘amalamalamaina o‘u mata, ne‘i ‘ou moe i le oti;”

Faitauga - Tusi Paia: Faamasino 16:19-21

Sa i ai se alii talavou sa avea ma failautusi I se tapuaiga faapaupau i se Iunivesite I Sauté Sisifo i Nigeria. O le isi aso na ia ofoina ai lona ola iā Keriso ma filifili e alu ese ma le tapuaiga faapaupau. O le taimi fo’i lava lea na taupulepule ai isi tagata o le tapuaiga e fasioti ia te ia auā sa ia iloa a latou mealilo. O le tasi po ina ua taunuu i lona potu mai le faletusi, sa matua’i vaivai o ia, o lea na faia ai sana tatalo faavavevave ma taoto i lona moega e moe. A o taoto o ia na faaosofia e Agaga Paia e nofo i luga ma tatalo. Sa tootuli o ia, fai le isi tatalo vave ma taumafai e toe moe, peita’i na toe faaosofia o ia e tatalo ma sa ia faapea ifo loa i lona loto, “Ua lelei o le a o’u tatalo e pei ona finagalo ai le Atua.” Sa tatalo ma a’o tu a’e o ia i luga sa ia vaaia se temoni tele faatasi ai ma faailoga i lona tino atoa o savali mai i totonu o lona potu e ui o loo loka le faitoto’a. Sa agai atu le temoni ia te ia ma sa fetu’u e le alii talavou i le suafa o Iesu. Na alu ese lemū le temoni mai le potu. Ina ua faamatala mai e le alii lenei ia te a’u le mea na tupu, na ou fesili ia te ia, “E te mautinoa e le o sau miti?” Na tali mai, “Sa o’u manatu fo’i o sa’u miti; peita’i ona o lo’u leotele i le tuliga o le temoni, na ala ai le tama aoga ma te potu faatasi, sa moe, ma tau lona vae i le temoni a’o solomuli agai i fafo. O le vae o le tama aoga lea na tau i le temoni, na matua’i fufula faatoluina le lapoa masani o le vae, ma e atoa le tausaga o tau togafiti.” O le malamalama i agaga e mafai ona avea ma eseesega i le va o le ola ma le oti.

E pei ona o tatou faitau i le tala iā Palaamo i le aso ananafi, o le lē usitai I fa’atonuga a le Atua, e mafai ona taofia se kerisiano mai lona lagonaina o mea fa’aleagaga. E i ai ni fa’atonuga na avatu e le Alii e te faia? Aua e te taumafai e fa’afinau lou auala e te ‘alo ese ai mai le usitai atoatoa i le Alii. Usitai i faatonuga a le Atua e lē aunoa, auā e faigofie ai ona e lagonaina Ia. O le taalo i le agasala e faavalevalea ai fa’aleagaga le kerisiano. E le’i iloa e Samasoni le taimi na sele ai lona lauulu auā na fa’apogisāina ia e le agasala. Na moe gase Samasoni ma ia le iloa ai ua o’o ia te ia puapuaga seia o’o ina fafagu ia e Talila. Ina ua ala a’e i luga, na mana’o e tau ma le ‘au Filisitia e pei ona ia masani ai, peita’i na te le’i iloa ua afio ese le Atua ma ia.

Le au pele e, sola ese mai le lē usita’i ma le agasala ia e tumau ai pea i le faamasinoina fa’aleagaga. Ia aua ne’i e o’o i le faavalevalea fa’aleagaga ma le moe i le moe a le oti, i le suafa o Iesu.

Tatalo

Tamā, faamolemole fesoasoani mai ia te a’u ia ou usitai ia te oe i taimi uma ina ia aua lava nei ou lē iloa mea faaleagaga, i le suafa o Iesu, Amene.