OPEN HEAVENS

MATALA LE LAGI MO LE ASO SA 24 ME 2026

(tusia e Pastor EA Adeboye)

Manatu Autu: Fa’amasinoina fa’aleagaga 3 (Spiritually discerned 3)

Tauloto Tusi Paia: Isaia 30:21 “E fa‘alogo fo‘i o ‘outou taliga i le ‘upu i o ‘outou tua, pe a ‘outou afe ane i le itū taumatau pe afe ane i le itū tauagavale, e fa‘apea mai, “O le ala lava lenei,” ‘ia ‘outou sāvavali ai.”

Faitauga - Tusi Paia: Kenese 26:1-6

O le mafai ona faamasinoina faaleagaga e matua taua i soo se kerisiano, aemaise pe a faia ni faaiuga taua i le olaga, e pei o le filifili o le toalua, le atunuu e nofo ai faapea ma uo. O nisi kerisiano ua faaipoipo atu ini tagata amio leaga e foliga mai o ni agelu o le malamalama ona e lē iloa faamasino faaleagaga. Ua latou opogi ni Iesepela ma Napalu, o tagata e ifo i tupua ma valea e taitai ese ai i latou mai le Alii ma faaleaga i o latou olaga. 

E manaomia e tagata faatuatua ona iloa lelei le tagata e tatau ona faaipoipo iai. Mo se faataitaiga, ina ua manao Aperaamo e filifili se toalua o Isaako, na ia faatonu maoti lana auauna i le ituaiga tamaitai e agavaa mo lona atalii ma fetaui lelei ma le feagaiga ua maea ona la faia ma le Atua (Kenese 24:1-8). Na ia faatonu lana auauna e alu i lona nuu ma lona aiga e filifili mai ai se toalua o Isaako. O le tapulaa muamua o le filifiliga a se kerisiano mo sona toalua, e tatau ona ia faaipoipo atu i seisi o le auuso kerisiano aua o lo tatou nuu o kerisiano o le lagi. O nisi kerisiano faatuatua ua faatuatuanai i lenei tapulaa ma ua oo ina latou fano ai. 

E lē gata e tatau ona faaipoipo atu i seisi kerisiano, e matua taua le ole atu i le Atua e faasino atu le tagata tonu mai le anoanoai o lana fanau. O nisi tamaitai kerisiano ua seetia i upu malie a isi kerisiano ua latou le ole atu i le Atua pe fetaui ma agavaai  o ia. E faapena foi i alii kerisiano, ua latou filifili i tamaitai ona o le toaga i galuega a le Ekalesia ua lē lagona ai e i latou le siufofoga o le Atua o loo faailoa atu lana amio. A oo loa i le mataupu o le faaipoipoga, e lē tatau i se kerisiano ona seetia i mea o loo vaaia ma misia ai le taitaiga a Agaga Paia. Afai e lei faia sou toalua, ou te tatalo ia e faataga le Alii, ae lē o ou lagona, foliga vaaia, iloiloga faale tagata e taitaia oe i lau filifiliga, i le suafa o Iesu. 

O le nofoaga e te lua nonofo ai e taua foi e manaomia le faamasinoina faaleagaga. I le Kenese 13:10-13, e lei fesili atu Lota i le Atua ae lei faia lana filifiliga e faatu lona faleie agai i Sotoma. Ua nofo i le ogatotonu o tagata faapaupau ma amioleaga ma na iu ina leai sona fale ina ua faaumatia e le Atua Sotoma ma Komoro ona o le agasala a ona tagata. Na o tagata e mafai ona faamasino faaleagaga e latou te iloa pe finagalo le Atua e o atu i seisi atunuu pe leai. 

Le au pele e, aua e te faia faaiuga e aafia ai lou olaga ma lou aiga e fua i lau faamasinoga ma le malamalama. Saili le finagalo o le Atua ma tumau i le faamasinoina faaleagaga ina ia e iloa poo le a le tulaga o loo ia finagalo e te faia. 

Tatalo

Le Alii e, faamolemole fesoasoani mai ia te a’u ia aua lava nei ou lē faalogo i lau taitaiga, i le suafa o Iesu, Amene.