OPEN HEAVENS

MATALA LE LAGI MO LE ASO TOFI 22 IANUARI 2026

(tusia e Pastor EA Adeboye)

Manatu Autu: Faatoilalo (Subdue)

Tauloto Tusi Paia: FIlipi 2:10-11 “Ina ‘ia to‘otuli o tulivae uma lava i le suafa o Iesu, o ē o i le lagi ma ē o i le lalolagi, ma ē o i lalo o le lalolagi, ma ‘ia ta‘uta‘u atu e laulaufaiva uma lava o Iesu Keriso o le Ali‘i lava ia, ‘ia i‘u ai i le vi‘iga o le Atua le Tamā.”

‭‭

Faitauga - Tusi Paia: Mareko 16:17-18

O le faatoilalo o lona uiga o le manumalo i se tulaga, ona faaaoga lea o le pule. I le Kenese 39:1-6, na aumai Iosefa i le fale o Potifara o se pologa. Peitai, o faamanuiaga a le Atua na saunia le ala mo ia, ma na tuuina atu e Potifara ia te ia e pule i mea uma sa i lona fale. Na iu ane Iosefa i le falepuipui ina ua pepelo le toalua o Potifara e faasagatau ia te ia, peitai, na ia pulea foi mea uma i totonu o le falepuipui (Kenese 39:20-23). Ma na taunuu lava Iosefa i le avea ma taitai iloga i Aikupito, e lona lua ia Farao. Fai mai le Kenese 41:42-44 “Ona tō ‘ese ai lea e Farao lana mama i lona lima, ‘ua tu‘u mai i le lima o Iosefa, ‘ua fa‘a‘ofu fo‘i ‘iā te ia i ‘ofu ‘ie vavae ma fa‘aasoa fo‘i i le filifili auro i lona ua. ‘Ua na fa‘ati‘eti‘e fo‘i ‘iā te ia i le lua o ona nofoa fa‘ata‘avalevale, ‘ona latou ‘alalaga lea i ona luma, “Ifo ia.” ‘Ua na tu‘u atu fo‘i ‘iā te ia le pule i le nu‘u uma o Aikupito. ‘Ua fai mai fo‘i Farao ‘iā Iosefa, “O a‘u o Farao, e lē si‘i e se tasi lona lima po o lona vae e aunoa ma oe i le nu‘u uma o Aikupito.”

‭‭

E tusa ai ma le Filipi 2:9-11, e mafai ona e pulea mea e tutupu ma mea i lou siomaga ona o le suafa o Iesu. E faapena foi, e pei ona tusia i le Mareko 16:17-18 “E mulimuli atu fo‘i nei fa‘ailoga i ē fa‘atuatua; e tutuli e i latou temoni i lo‘u igoa; e tautalatala i latou i gagana fou; e fetāgofi i latou i gata; ‘āfai fo‘i latou te inu i se mea e oti ai, latou te lē afaina ai lava; e fa‘ae‘e atu fo‘i o latou lima i luga o ē mama‘i, ma fa‘amālōlōina i latou.”

‭‭

Afai o oe o se fanau a le Atua, e iai lou avanoa i le suafa o Iesu Keriso, ma o lona uiga, e tatau ona e faaaoga le pule, e lē mafai ona taofia oe. I le Galuega 5:17-29, ao iai Peteru ma lana autau i le falepuipui, na afio mai le agelu a le Atua i le po ma faasaolotoina i latou. Ina ua saisai Peteru ma toe tuuina foi i le falepuipui i le Galuega 12:1-17, na galue atu le Atua ma faasaoloto ia te ia. 

Le au pele e, o lou talaaga e faasolo pea ina siitia le lelei pe afai o loo avea pea Iesu Keriso ma ou Faaola. Fai mai le Faataoto 4:18 “A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la.” O lona uiga, tusa poo a mea ua faia e le tiapolo, o lou olaga e sili atu i le asō i lō ananafi. Talitonu i le suafa o Iesu ma lou loto atoa ma faaaoga lona suafa e faatoilaloina soo se tulaga lē lelei i lou olaga. O le ala lea e te savali ai ma le pule ma e leai se mea e taofia oe. O le suafa o Iesu o se auupega e faatoilalo ma maua ai le pule i le lalolagi nei, i le suafa o Iesu, Amene. 

‭‭