Mëtt Oktober gouf den éischten offizielle Bréif vum Poopst Leo XIV. publizéiert. Dat war laang erwaart ginn, well de Poopst mat programmatesche Aussoe bis elo éischter zeréckhalend war. Am Fräie Micro vun haut kommentéiert de Michel Pauly, Historiker a Mataarbechter vun der Zäitschrëft forum dat éischt Schreiwes vu Poopst Leo XIV. un d’Weltëffentlechkeet, dat et a sengen Ae verdéngt, dass och Net-Gleeweger sech dermat ausernee setzen.

D’Isabelle Schmoetten vum CID Fraen an Gender freet sech an hirem neie Fräie Mikro iwwert déi vill Bekenntnisser zum Feminismus.

Viru véierzéng Deeg ass zu Barcelona Mondiacult op en Enn gaangen, ee vun der UNESCO organiséierte Weltsommet iwwer d’Erausfuerderungen, déi sech an der haiteger Welt dem Kultursecteur stellen. D’Simone Beck, Presidentin vun der Lëtzebuerger UNESCO-Kommissioun erkläert, firwat esou eng Konferenz haut esou wichteg ass.

Bildschiermsucht, Beweegungsmangel, Panikattacken ... eis Jonk hu ganz vill Problemer. D’Schoulen hëllefen, dat versprécht de Minister. An ëmmer manner Elteren hëllefe mat, seet d’Judith Reicherzer, Responsabel fir mediepedagogesch Projeten am Lycée Aline Mayrisch an hirem Fräie Mikro.

Haaptbetraff sinn Auslänner, Mënsche mat nidderegem Ausbildungsniveau, Chômeuren, Elengerzéiend an déi Jonk. Zousätzlech verschäerft de Manktem un abordabele Wunnengen d'Situatioun an dreift ëmmer méi Leit op d'Strooss. Dozou de Fräie Mikro vun der Biergerrechtlerin ronderëm Froe vum Zesummeliewen, der Laura Zuccoli.

Mir schwätzen dacks vun decisive Momenter oder vu Kräizungen, wou sech eist perséinlecht oder eist gesellschaftlecht Schicksal entscheede géif: wa mir no lénks ginn, da komme mir an d’Paradäis, gi mir no riets, dann ass et d’Katastroph, déi op eis waart. Oder mir soen, mir missten d’Kéier kréien, fir datt alles gutt gëtt oder soss géif et ganz schlëmm kommen. Am Fräie Mikro proposéiert de Bob Reuter, President vun AHA Lëtzebuerg, dës Denkweis ze iwwerwannen.

An de Lëtzebuerger Kulturkreesser tauchen episodesch ëmmer erëm Diskussiounen op, wann Auteuren an Artiste mat Kulturkritiker unenee geroden. Meeschtens ass et e Stuerm am Waasserglas, well et dacks méi ëm den Ego vun de verschiddenen Protagoniste geet wéi ëm d‘Wierk selwer. Dozou e Fräie Mikro vum Journalist an Auteur Laurent Moyse

Nimools säi Gedrénks aus den Ae loossen op engem Festival, Concert oder an enger Bar - deen Tipp kenne wuel déi meeschte Meedercher a Fraen. Awer sech duerch laang Kleeder virun Attacke mat Sprëtze schützen an doheem de Kierper no Astéchplazen ofsichen - dat dierft deene meeschten nei sinn. Dës an aner Tippe liest een a Presseartikelen no de Meldunge vun Needle spiking op der Fête de la Musique Enn Juni a Frankräich. D’Isabelle Schmoetten vum CID | Fraen an Gender l befaasst sech mat dësem éischter neie Phenomeen an hirem Fräie Mikro.

Kaum ee Budgetsposte klëmmt am Moment esou séier wéi dee vun der Verteidegung. Déi onstabil Weltlag, bewaffnet Konflikter a politesch radikal Changementer forcéieren déi europäesch Länner hir Sécherheetspolitik ëmzedenken. Och Lëtzebuerg ass betraff a muss den Tempo beschleunegen. Dozou e Fräie Mikro vum Journalist an Auteur Laurent Moyse.