A Coruña, Santiago, Vigo, Ferrol, Pontevedra, Ourense e moitos máis concellos galegos alzarán esta tarde a voz contra a violencia machista tras un novo caso, unha nova muller asasinada polo feito de selo. Esta mañá era a sede da Xunta o escenario dun minuto de silencio. O director xeral para a loita contra a violencia de xénero fai un chamado ás mulleres: que denuncien, que non perdan a esperanza porque a administración ten os recursos preparados para axudalas.

Para Maritza, de 49 anos, non chegaron a tempo. Hoxe o seu presunto agresor pasa a disposición xudicial, estamos pendentes da decisión do tribunal.

Mentres, na Coruña, xúlgase o caso doutra muller, Elisa Abruñedo, asasinada e violada hai máis dunha década. Xa puidemos escoitar os seus fillos, o testemuño das outras vítimas.

Confírmase que a muller morta na mañá de onte na Coruña é un novo caso de violencia machista. Así o dixo hoxe a Delegación de Goberno que informou de que a vítima estaba inscrita no sistema Vioxén e que estaba pendente de executar unha orde de afastamento do seu agresor.

Na política, o Consello da Xunta ven de aprobar recorrer ao Tribunal Constitucional o decreto de repartición de menores migrantes procedentes de Canarias e Ceuta. O argumento é que invade competencias autonómicas.

Inscrita no sistema de protección para as vítimas de violencia de xénero, no nivel de risco medio, e cunha orde de afastamento pendente de execución. Unhas medidas que chegan tarde para a última asasinada en Galicia, presuntamente a mans da súa parella. Aínda non hai confirmación oficial do Goberno como caso de violencia de xénero, pero investígase como tal.

Hoxe desde a política pídese unha reflexión común e actuacións á Xunta. O BNG fala directamente de emerxencia por violencia machista en Galicia xa que, ademais das dúas asasinadas, houbo outros intentos recentes de rematar coa vida de mulleres na nosa comunidade.