OPEN HEAVENS

MATALA LE LAGI MO LE ASO TOONAI 31 IANUARI 2026

(tusia e Pastor EA Adeboye)

Manatu Autu: Galuega e faia i sauaga a temoni (Dealing with demonic oppression)

Tauloto Tusi Paia: Faamasino 6:9 “Na ‘ou lavea‘iina ‘outou nai le lima o Aikupito, ai lima lava o i latou uma ē na fa‘asauā ‘iā te ‘outou, ma ‘ou tulia i latou i o ‘outou luma; na ‘ou avatu fo‘i lo latou lau‘ele‘ele mo ‘outou.”

‭‭

Faitauga - Tusi Paia: Esoto 1:7-14

O le faasaolotoga e le gata e mo i latou ua faaletonu mafaufau ae faapea i latou o loo ulufia e temoni. E mafai ona ulufia se tagata e temoni ae foliga e pei a ona masani ai. I le Mareko 1:23-27, fai mai na alu atu se tamaloa ma se agaga leaga i totonu o le malumalu. E leiloa pe na foliga tutusa ma isi seia oo ina afio atu Iesu. Ina ua vaai atu ia Iesu, o le temoni i totonu ua amata ona liu mai, ona tuli esea lea o ia mai lea tagata. Ou te folafola atu o soo se malosiaga temoni o loo faalavelave ia te oe, ia tuliesea i le asō i le suafa o Iesu. 

O le tiapolo ma ana temoni, e faalavelave i tagata i le tele o auala, o se tasi o ia auala o le sauaga. Fai mai se tasi tamaitai, e faalogo atu e pei o se mea o loo ia tauaveina i lona ulu, o se mea e mamafa pei o le taga araisa, seia faasaolotoina o ia e le Atua. O le faataitaiga lena o le sauaga. O le sauaina o le taofia lea o se tagata poo se mea mai le tulai mai. O lona uiga o le taofia o se tagata poo se mea mai le siitia. E oo i faifeau e mafai ona sauaina e le tiapolo. I lea tulaga, e iai faifeau e matua lelei lauga, masani i le anapogi, tatalo e le aunoa ma suesue ma le filiga i le Tusi Paia peitai e tumau i le tulaga e tasi latou galuega e leai se tuputupu ae. Peitai a oo mai le faasolotoga a le Atua, e amata loa ona fua lelei mai a latou galuega. 

I le faitauga mai le Tusi Paia o le asō, na faatonu e Farao ona tagata e fai ma le poto le fanauga a Isaraelu ona e le manao e faatupuina i latou. Na latou sauaina i latou i auala eseese ina ia taofia le faatupuina. I le tele o tausaga talu ai, sa iai se alii e pule ma ulu i se vaega na faia sana faaiuga ia taofia le siitia o se alii talavou o loo pule ai. Na tago lenei alii pule i le faila o le alii talavoū ma ua nānā ma a o’o i le taimi e iloilo ai galuega ma totogi, e lē maua lana faila. E lei leva ae tuuina atu le ola o le alii talavou ia Iesu, mulimuli ane, ua tupu se fouvale i le malo e le malosi tau fitafita, ma na aafia uma ai galuega faigaluega i le atunuu. Ua faamalosia ona faamaloloina le alii ulu lea o le vaega ma ua tofia se tagata fou i lea tulaga maualuga. Na sau le pule fou ma suesue uma i faila o tagata faigaluega ma iloa ai o loo iai faila a tagata uma ae misi lava na o le alii talavou lea. Ua latou saili uma i le ofisa ma maua ai le faila a lenei talavaou i le mea na nana ai e le pule tuai. Ua iloa e le pule fou, ua fa tausaga e lei siitia le totogi e ui i lona faamaoni ma le filiga, ona ia faaluaina lea o lana siitaga.

Le au pele e, ou te tatalo mo oe, ia paū mai le afi o le Atua e susunuina soo se malosiaga e ono sauaina oe ma taofia lou manuia, i le suafa a Iesu, Amene.