OPEN HEAVENS

MATALA LE LAGI MO LE ASO SA 1 FEPUARI 2026

(tusia e Pastor EA Adeboye)

Manatu Autu: Galuega e faia pe a faatigaina e temoni (Dealing with demonic repression)

Tauloto Tusi Paia: Isaia 49:24-25 “E faoa ‘ea le vete a‘i lē ‘ua malosi? pe lavea‘iina ‘ea le tāfeaga a lē ‘ua amiotonu? Auā o lo‘o fa‘apea ‘ona fetalai mai o le ALI‘I, E faoa lava le tāfeaga a lē ‘ua malosi, e lavea‘iina fo‘i le vete a lē mata‘utia; ‘Ou te finau atu fo‘i a‘u i ē ‘ua finau atu ‘iā te oe, ‘ou te fa‘aolaina fo‘i au tama.”

‭‭

Faitauga - Tusi Paia: Faamasino 6:1-6

A faatigaina ma oomi i lalo se tagata, e tietie le tiapolo i luga o lea tagata ma oomi i lalo. O se tagata sauaina e tumau i le mea e tasi ao le tagata e faatigaina, e faasolosolo ina alu i tua. E le gata e taofia e le tiapolo le tagata mai le siitia , ae na te faaumatia le fua o galuega a lea tagata. 

I le faitauga mai le Tusi Paia o le asō, na faatigā le fanauga a Isaraelu i le Atua, ona lafoai lea e le Atua o i latou i le au Mitiana mo le 7 tausaga. E faataga e le au Mitiana Isaraelu e totō ma vaavaai faatoaga, ae a oo i le taimi o seleselega, e o mai toatele le au Mitiana ma ave uma fua o seleselega. A faatigaina e le tiapolo se tagata, e na te taitaina lea tagata e galue malosi mo se faamoemoega, ona osofaia lea ma iu ai ina leaga atu le iuga i lo le amataga o lea tagata. 

O le faatigaina e faaumatia galuega uma a lea tagata ia siitia ma tupu o ia. O nisi tagata e maua tupe e tele, peitai e latou te leiloa poo a mea o aoga ai. E foliga o loo iai ni pūpū i latou taga e tei a ua uma atu le tamaoaiga. Tusa pe tele a latou tupe, e matua tele foi aitalafu. A’o ou laitiiti, na iai se mea na tupu i lo matou nuu. O se tagata mauoa na ia faaaogaina ana tupe e ave faamalosi ai se fanua a se tasi tagata. Na fai mai le tagata e ona le fanua, ‘e leai se mea o iai, e ui e leai sa’u tupe e finauina ai le mataupu i le faamasinoga, sei tatou vaavaai pea poo fea e iu iai’. Na amata loa ona fau le fale e le tamaloa mauoa i luga o le fanua, ae leai ma se upu a le tagata e ona le fanua. O le aso na ato ai le fale, na alu le tagata e ona le fanua ma tuu vai faataulaitu i totonu o le fale, ma e oo atu i le aso na sosoo ai, ua amata taetaei uma le simā o le fale. Na matua leaga le simā ua oo ina toe taei sima ma tala i lalo le fale. Na toe taumafai foi le mauoa e toe fai le fale peitai o le faafitauli lava e tasi. Na iu ane i le tele o tupe ua alu ae lei ausia le faamoemoega. 

Le au pele e, afai o faatigaina oe e le tiapolo, ou te folafola atu i le asō, pe o oe le mafuaaga o loo oomi ai oe i lalo pe leai, o le tausaga lenei o le iupeli. Ou te tatalo i le afi mai le Atua e paū atu ma faasaolotoina oe mai soo se mea o faatigaina ai, i le suafa o Iesu. O le faamoemoega a le Atua mo oe o le siitia mai le mamalu i le mamalu, ma o lou tofi lena, i le suafa o Iesu. 

Tatalo

Tamā, faamolemole, ia avea le afi mai ia te oe e faaumatia soo se auala o faatigaina ai a’u ma lo’u olaga, i le suafa o Iesu, Amene.