大半个号头前头就录好个音频，一直抽勿出空剪辑。好伐，其实是搞老师难板想偷点懒，嘿嘿！
搿期搭小搞聊聊幼儿园里个趣事。也呒没啥个主题，反正老规矩，阿拉瞎聊聊，㑚就瞎听听。开心就好！

BGM:
GMR - FC - 马戏团 - STAGE_1
超级玛丽 - 纯音乐版
背景音乐、2、超级玛丽 - Fc - 游戏音乐 水下关
冒险岛 Fc 游戏 经典红白机游戏音乐
游戏原声 - fc《松鼠大作战》第1关bgm
GMR - FC 影子传说 主题曲
忍者龙剑传 - bgm
陈栋 - 气球大战

《小猪唏哩呼噜》
　第七集、月牙能又想干坏事体咾
　　唏哩呼噜一听，快点第二趟跑出去掘蚯蚓。伊总共掘了三趟，终于拿三只小物事喂饱了。搿记伊拉就变了快快乐乐，开开心心。三个人蹲了一道打打闹闹。侬拉我个耳朵，我扯侬个脚。伊拉还时勿时跑过来帮小猪猡瞎乌搞。咬伊一口鼻头就跑。还拿伊扑了一只仰面朝天。不过啊，伊拉现在侪咬的老轻个，一眼也勿痛。就是有点痒飕飕，痒飕飕。小猪猡嘻嘻哈哈个笑，也跑过去咬伊拉。白相了一歇歇呢，唏哩呼噜讲:
“哎，㑚倒侪吃饱了。我肚皮还饿辣盖唻。好了，覅帮我捣蛋了，我也要吃饭了。”
伊就准备去啃埃块样子怪里怪气个山芋。
　　呒没想到伊刚刚咬牢埃块怪里怪气个山芋，就听到头浪向有的只声音传过来:
“侬好侬好！再会再会！”
小猪猡头一抬，哦，是八哥小姐从开辣盖个房门飞进来。伊一落下来，就拼命个去啄埃块山芋。小猪猡倒开心了，“哎，还是有欢喜吃搿物事个嘛！好好好拨侬吃伐！祝侬好胃口！”
八哥小姐一边“侬好再会！侬好再会！”搿能介答应，一边就辣埃免费搭穷啄八啄，穷啄八啄。
一歇歇功夫，搿块怪里怪气个山芋就拨八哥小姐吃光咾。搿个辰光伊停下来，用伊个翅膀揩揩嘴巴。伊帮唏哩呼噜讲:
“谢谢侬啦，唏哩呼噜先生！侬帮了我一只大忙！”
小猪猡一记头呆脱咾，伊戆脱咾！伊戆了半日天再讲:
“原原原原原...原来侬回答的讲闲话啊！”
八哥小姐开心个讲:“看样子我是真个会得讲闲话了！搿侪是因为吃了侬搿只‘一吃就想的起来山芋’，我本来就会得讲闲话个呀。
有的一天，我拨人家捉了跑了，伊拉拿我拴了一根架子高头。有客人来就让我讲‘侬好’，客人走个辰光就让我讲‘再会’。我帮伊拉讲我是一只自由个鸟。后头伊拉又用一根铁链子拿我锁起来。还逼牢我讲我勿欢喜个闲话。我讲，搿勿大好伐。伊拉就勿高兴了。讲‘侬搿只八哥哪能介啰嗦个啦！以后，只要我讲个勿是‘侬好再会’伊拉就冲牢我叫‘讨厌！’以后再哇啦哇啦瞎叫，就勿拨侬吃饭！就搿能介，我天天讲‘侬好再会’，拿别个闲话侪忘记脱了。后头我天天偷偷个啄埃天小链条。啄啊啄，啄啊啄。终于有的一天，我拿埃条链条啄断脱了。后头我就逃出来了，但是我差勿多也就成了一个哑嘴。有人讲拨我听，有的一种草药，样子老怪个。像长了交交关关勃落头个山芋。搿种药就叫‘一吃就想的起来山芋。’特别个有用。但是搿种药老少个。外加还埋了老深个烂泥里向。葛唠我寻了交交关关辰光也寻勿着。刚刚看到侬吃个好像就是搿种药。我讲拨侬听侬又听勿懂。我一急就抢下来了。真对勿起侬！”
　　小猪猡高兴了:“哎搿忒好了呀！我正好想听侬讲闲话唻！真勿明白侬个‘侬好再会’是啥个意思呀！我勿懂呀！我反正也用勿着吃啥个药个。”
　　八哥小姐讲:“但是看样子侬个肚皮还老饿个。呒没关系，哎面搭，有的一棵老大个树。结满了红通通个果子。走，我去摘拨侬吃。”
伊拉走出木头个小房子，八哥小姐飞起来，伊帮唏哩呼噜引路。伊拉老快个就寻到了一棵老大个果树。八哥小姐辣辣树顶高头摘下来最大最红个一只果子掼拨小猪猡。小猪猡接到了，就“吧嗒吧嗒”吃下去了，后头八哥小姐又摘了交交关关果子厾拨伊。一歇歇功夫，小猪猡个肚皮就“噔噔蹬蹬”鼓起来咾。伊辣辣树下头喊:“够了够了我吃饱了！”
辣末生头，八哥小姐像拨人家打了一枪一样哦，笔笔直个落下来。伊快要接近地面个辰光再拿翅膀展开。轻轻个跳了地高头，迓迓较个帮小猪猡讲：“侬覅响哦，我看到月牙熊先生又从远个地方过来了。”伊拉两家头又马上钻进了深深个草丛里向。一动也不敢动。
过脱一歇歇，伊拉听到"嚓、嚓、嚓"有的一阵草响个声音，声音越来越近。后来草勿响了，一只又粗又哑个喖咙讲：“哼，小猪猡有啥个好吃。人家讲个也伐一定是真个。臭八哥末就更加覅吃了，一塌刮子呒没几两肉，还要拔毛，烦也烦煞脱了。搿搭有得介许多红彤彤个果子，就吃搿伐！还好减肥！”
接下来，伊拉就听到哥树拨摇的唻“哐哐哐”就想刮老大个风一样，四周围还响起来一大片“噼里啪啦，噼里啪啦”个声音。好像落冰雹一样哦。有的一粒果子“咚”一记正好敲到小猪猡个鼻头高头，哦哟痛的唻伊差点叫出来哦，伊豪稍捂牢嘴巴摒咾。
月牙熊先生拾起一粒果子，塞进伊个大嘴巴里向，伊聊了两口，全部吐出来了“呸呸呸！”。
“介难吃！又酸又苦，还涩嘴巴！勿来三，我还是要寻点好吃个物事。”停脱一歇歇，伊又讲:“嗯？搿地方好像离狼先生屋里向勿远了嘛？伊个三只小囝又长大了勿少伐？”月牙熊先生讲到搿搭，“咕咚”咽了一口馋吐水，“嗯，大狼先生勿像伊拉太太介凶。还好，狼太太已经死脱了。不过，埃只赤佬勿晓得从啥地方弄的来一把枪。我一到伊拉屋里向门口头，伊就用埃只物事对牢我。真戳气！但是伊但是老欢喜带牢埃把物事到处跑。有可能搿歇点勿辣屋里向。对！我去看看较！伊个三个小囝虽然勿像小猪猡介壮，不过肉肯定也老嫩个！还有的三只唻！”
又是一阵“嚓，嚓，嚓”个声音，响声越来越远了。　

爬山虎是怎样爬墙的

你问我答:
爬山虎具有哪两样功能
A.调节空气
B.减少噪声
C.吸附有害物质

BGM:
Various Artists - As Long As There's Music
甘仕良 - 留言

《小猪唏哩呼噜》
第六集、三只小物事
　　小猪猡看到埃只大块头伸出另外一只脚爪要去拉八哥小姐个羽毛，快点从草丛里向钻出来，跑到月牙熊个面前，伊讲:“侬好，侬搿能介骗八哥小姐老勿应该哦。还有，我叫唏哩呼噜，勿叫‘肉球球’！”
　　月牙熊高兴个讲："啊！初次见面，请多关照！我是月牙熊先生。小猪猡唏哩呼噜？噢，久仰久仰！老早就听讲小猪猡个肉又壮又嫩，味道邪气好。近腔把辰光我就吃了眼啥呢，有的干乎乎个树叶子、酸叽叽个野果子，吃得火气也大了嘛，我老早就想认得小猪猡先生了！呵呵！"
　　唏哩呼噜讲："谢谢侬个夸奖！葛末侬就拿八哥小姐放脱伐！"
　　月牙熊拍拍肚皮："勿搭界！我肚皮介大唻，同时拿㑚两家头装进去，一眼问题也呒没！"
　　讲好，伊就拿自家的嘴巴张了老老老老大，想拿八哥小姐塞进去。
　　小猪猡一看，吓煞了，喊了一声："哎！祝侬好胃口，再会噢！"
　　讲好，伊别转屁股就跑。
　　但是伊好像奔了忒急了，一记头撞了一块大石头高头，“咚”一记，掼了地浪向。
　　月牙熊先生一看，拿拨伊捏了昏过去个八哥小姐掼了地高头，直接扑到小猪猡面前。
　　小猪猡一动也不动，看样子是撞了晕过去了。月牙能拿他翻转来看看。
　　小猪猡两只眼睛闭了老老紧。
　　月牙熊得意个讲："嘿嘿！从来也呒没啥人好从我手心里逃脱，何况就凭侬搿能介一只介戆个小猪猡！好，葛末我就先吃侬！"
　　就辣搿辰光，伊听到背后头“扑落啪啦”，“扑落啪啦”个响，月牙熊先生别过头去，正好看到八哥小姐辣草地浪向拼命个拍翅膀。
　　"哈，飞勿起来了伐？"月牙熊高兴个讲，"我讲过啥人也逃勿脱。我要拿㑚一道装进肚皮，我只要讲到，就一定能够办到！"
　　伊走过去，弯腰想去拾八哥小姐。呒没想到八哥小姐一甩翅膀，跳出去好远，他扑了只空。
　　八哥小姐搿一跳呢大概也用光了力道，又一头栽了地浪向，爬也爬勿起来。月牙熊先生以为搿趟总归好拿伊捉牢了，又跑上去捉伊，呒没想到，八哥小姐一急，又跳出去好几步。
　　就搿能介每趟眼看看要捉牢个辰光，八哥小姐侪跳出去好几步，月牙熊先生越追越远。最后伊光火咾，用尽全力，“嗷呜”一记朝前头一扑。欧，八哥小姐反而老轻松个飞起来了伊讲，辣辣天浪朝牢伊叫：
　　"侬好侬好！再见再见！"
　　月牙熊先生气得唻阿潽阿潽："好啊，侬搿只死货色，原来侬是装出来啊！侬做功哪能介好啊！咳！勿对！"
　　他豪稍跑回大石头挨面搭，但是埃只撞昏脱个小猪猡连影子也呒没唻！
　　唏哩呼噜假装拨撞昏脱个辰光，实际上心里向老吓个。不过啊，伊假使勿搿能介做呢，埃只黑擦擦个大块头留就要拿八哥小姐塞辣嘴巴里去了。看到八哥小姐辣辣地高头蹦蹦跳跳，伊也老急個。后头看到伊一记头飞起来咾，唏哩呼噜快点哦一头钻了草丛里，呒没命个朝前头穷逃。
　　伊搿能逃末，月牙熊先生是肯定捉勿着伊了，但是啊，伊也更加寻勿着回去个路了。
　　小猪猡跑了老远，停下来，东看看西张张，看到前头个小树林里向好像有的间木头小房子。咳！又可能房子个主人会得讲拨伊听回去个路哪能走法。
　　他跑到边浪向，就听到房子里向传出来好几声“叽里咕噜”，“叽里咕噜”个声音：
　　"肚皮饿！"
　　"我要吃物事！"
　　"我要饿煞啦！"
　　唏哩呼噜小心翼翼个推开门，房间里向有的三只小物事，搿三只物事骷榔头侪老大，耳朵老尖个，伊拉抱辣一道，穷哭八哭哦。
　　小猪猡问自家："我是应该快点寻回去个路，还是应该帮伊拉寻点物事吃呢？"
　　接下来，他回答自家："当然应该帮伊拉寻点物事吃咾，因为肚皮饿比寻勿着路还要罪过！"
　　伊寻到了一片空地，用伊个小鼻头，闻来闻去。后头又用嘴巴辣辣地浪向拱发拱发。拱了一歇歇辰光，他从烂泥里挖出一块有的好几只勃落头个山芋来。
　　小猪猡自家也饿了。伊并勿牢咬了一口，哇，嘴里里向甜蜜蜜酸叽叽，汁水牢多哦。嗯，搿只物事蛮好吃个！
　　小猪猡乃就抱牢搿只老怪个山芋，回到房子里向。伊拿搿只山芋，摆了三只小物事面前。三个小物事乃就不再哇哇叫了，侪围块那块带角的白薯，拼仔老命个用鼻头闻。小猪猡讲拨伊拉听：
“搿拨㑚哦，㑚覅客气，快点吃。吃好肚皮就勿饿了！"
　　但是搿三只小物事啥人侪勿吃。伊拉侪拿耳朵竖起仔，呆剥落厾个看牢小猪猡。
　　小猪猡讲："㑚哪能介戆个啦，搿物事老好吃！我吃过唻，㑚看，就像我搿能吃！"
　　伊又咬了老一大口，"呱嗒呱嗒"辣埃面搭嚼发嚼发。看上去味道是老好个呀！
　　三只小物事又轧上来穷闻，有的一个还伸出小舌头，舔了一舔，但是啊伊拉就是勿吃。
　　"哎呀，乃哪能办啦？"唏哩呼噜心里想，"看样子伊拉还呒没学会哪能吃物事，搞勿好伊拉还呒没断奶唻，乃哪能办啦？我又呒没奶拨伊拉吃个咾！伊拉妈妈跑到啥地方去啦？"
　　就辣搿辰光，有的一只小物事绕到了伊个背后头，用舌头舔了舔小猪猡个小尾巴。唏哩呼噜觉着老痒个，并勿牢“嘿嘿嘿”笑起来了:“侬覅瞎污搞，我最怕痒唻！”
　　呒没想到三只小物事一道扑过来，侪跳辣伊身浪向，对牢伊穷发嗲唻。唏哩呼噜心里向倒也蛮开心个，嗯，搿三只小鬼头啊小管小，倒也蛮精乖个。伊拉肯定晓得我辣辣帮伊拉寻物事吃，葛唠对我老友好个。　　但是，辣末生头伊觉着屁股浪向好像拨啥人凿了一刀，痛的唻要命。伊豪稍别过头去看，有的只小物事咬牢伊个屁股勿放哦，皮也拨伊拉的老老长。就辣搿辰光，另外一只小物事一口头叼牢伊个小尾巴，“啊呜”一口，像煞要拿伊个尾巴也要咬断脱了。唏哩呼噜一记头叫起来:“哎！㑚哪能咬人啦！痛痛痛！”接下来伊也光火了，“㑚㑚㑚搞啥个百叶结啦？白相也勿好搿能呒轻头个呀！㑚想拿我咬煞脱啊？”
　　三只小物事吓的唻快点缩回去，跍了一抓堆罪过八腊个朝牢伊叫：
　　"肚皮饿呀！"
　　"我要吃物事！"
　　"饿煞脱啦！"
　　唏哩呼噜一拍自家个脑袋："噢，我晓得了！"
　　他帮伊拉讲："㑚要吃虫虫对伐？㑚看我个小尾巴像虫虫，对勿对？㑚早点讲呀！好！㑚等好！"
　　小猪猡又跑到外头去，寻了一块老潮湿个烂泥地，又用伊个嘴巴拱发拱发，拱出来好几根又长又粗个蚯蚓。伊拿搿眼蚯蚓，拿拨三只小物事。
　　搿三只小物事哦，马上就扑上来，，有的一只叼起一条蚯蚓就跑，另外两只快点上去抢。小猪笑嘻嘻个讲："㑚覅抢伊个，搿搭还有的交关唻！"
　　三只小物事老快就拿伊挖出来个大蚯蚓全部吃光了。伊拉一边舔牢嘴巴，还讲:“还要吃！还要吃！”

为什么植物的叶子大多是绿色的

你问我答:
叶子飘落，一般是哪一面着地
A.正面
B.反面
C.不确定

BGM:
The Piano Guys - The Mission How Great Thou Art
The Piano Guys - Ants Marching Ode to Joy

《小猪唏哩呼噜》
　　第五集、好心个八哥小姐 
　　小猪猡唏哩呼噜呆了一歇歇，一记头开心起来了：
　　"乃末搿趟，呒没人会得吃我唻，哦哟啐啐！，假使伊拉拿我吃脱，阿拉妈妈肯定要哭煞脱个！"
　　小猪猡又看了看手里向搿把枪。
　　好像狼先生老欢喜搿样物事个，应该还拨他。
　　小猪猡拿枪摆辣草地浪向，就走了。
　　但是伊刚刚走了呒没几步，又停下来讲：
　　"这好像勿大好！要是拨别人家看到，捡了跑了哪能办啊？"
　　伊又跑回去拿枪抱起来，又拿伊囥到灌木丛里向去了："乃末就好，啥人也看不到！嘿嘿！"
　　唏哩呼噜对自己个办法相当满意。不过伊忘记脱了，搿能介一来末，狼先生也寻不着了呀。
　　唏哩呼噜要回到屋里向去，但是勿认得回去个路。
　　伊问自己："寻勿到路个时候，应该哪能办啦？"
　　伊经常搿能介自家问自家，搿个辰光，总归会的有一个老聪明老聪明个唏哩呼噜回答伊个问题。
　　接下来，伊回答讲："应该寻人问问路！"
　　就辣这辰光，齐巧有的只黑不溜秋个鸟，“啪嗒啪嗒”落到边浪个一棵树高头。还没等唏哩呼噜先开口问，搿只黑不溜秋个鸟倒先帮伊打招呼了："侬好！"
　　小猪猡豪稍讲："侬好呀！我是唏哩呼噜。侬叫啥个名字啊？"
　　搿只黑鸟讲："再会！"
　　“咦！”小猪猡自家辣辣讲："搿只名字哪能介刮三个啦？  不过好记倒是蛮好记个。"他又问：
　　"再会小姐，请问：去动物村哪能走啊？"
　　黑鸟讲："侬好！"
　　小猪猡说："侬好侬好！我是说，我迷路了，想回到村子里向去，应该走嚡里条路呢？"
　　黑鸟讲："再会！"
　　咳！好像搿只黑鸟讲的"再会"勿是伊个名字嘛？她说了"再会"之后并呒没要飞走个意思，就搿能介笡牢头颈，朝牢唏哩呼噜看法看法。
　　唏哩呼噜心里向想：咦！搿只黑鸟大概是戆大哦。伊哪能只会的讲"侬好"、"再会"个啦？
　　小猪猡正打算好好较问问清爽，埃只鸟辣末生头从树浪向一记头冲下来哦，嘴巴里向还勿停个讲“侬好再会，侬好再会！”
　　搿只鸟还用翅膀拼仔老命拍伊个背脊，还用介尖介尖个嘴巴啄唏哩呼噜个小耳朵，像只疯子一样哦。
　　唏哩呼噜吓煞脱唻，“哎！做啥啦！做啥啦！神经病打人喽！哎哟哇！”伊豪稍钻到草丛里向去。
　　搿只黑鸟又飞回树枝浪向，朝牢下头喊：
　　"侬好！"
　　小猪猡心里气煞脱咾，好侬只魂啊，啄了我介痛！搿只鸟肯定是只神经病！
　　他迓迓较从草丛里向拿头探出去看。原来，黑鸟搿趟是跟人家打招呼。有的一只黑擦擦个大块头正从树林子里向"哗啦哗啦"走出来。埃只大块头哦，着了一身黑衣裳，胸口头还画了只白颜色个月亮。
　　搿只大块头抬头朝牢树顶，粗声粗气个讲："哈，原来是八哥小姐！侬好。你立了介高，阿是看到了啥个好吃物事啊？侬讲拨我听，我捉过来，也可以分拨侬一点。”
　　黑鸟说："再会！"
　　大块头吼吼吼笑起来了："哎呀，我讲八哥小姐，侬哪能老是搿两句闲话啦？我记得老底子侬只小嘴巴勿是老会得翻个嘛！现在哪能就挺下来身浪向。 "
　　黑擦擦个大块头呒没讲下去，因为伊本来是要讲"就挺下来身浪向个肉味道还勿错！"。
　　八哥小姐好像老喜欢人家讲伊个口才老好个，伊高兴个讲：
　　"侬好！侬好！侬好！"
　　正好搿个辰光有几只马蜂"嗡嗡"飞过来。搿只大块头辣末生头“哐”一记掼辣地浪向，哭出乌拉个叫起来了："唉哟，唉哟，勿得了！啥物事叮了我个背脊高头啊？哎！又叮我屁股了！救命啊！快救命啊！"
　　伊一边叫，一边还拼命个拿手伸到背后头去：
　　"哎是马蜂，要死快了介大只马蜂，哦哟，啄了我痛煞脱啦！"
　　八哥小姐一看也急煞脱了。她叫了一声"侬好"，翅膀一甩，就从树顶高头冲下来，想啄脱老模子背脊高头个马蜂。
　　但是啊啥人侪呒没想到，大块头背脊高头根本就呒没啥个马蜂好伐。伊动作一记头变了老活络哦，“嘿！”一记头转过身，“啪”一记，一只大头耳光就拿八哥小姐打了掼了地高头。
　　大块头一记头冲过去一把就拿八哥小姐捏了脚爪里向，哈哈大笑:
　　"哈哈哈！上我老当了伐？就㑚八哥聪明，当阿拉月牙熊侪是阿缺西啊？我老里八早看到唻，侬立辣树顶浪向看到我迓迓较摸过来，侬就讲拨埃只圆不隆冬個肉球球听，让伊快点逃脱，侬当我洋盘阿是啊？讲拨侬听，呒没啥了勿起个，肉球球逃脱了，我就拿侬个毛拔光，拿侬当点心吃脱！哈哈哈！"

为什么含羞草会“害羞”

你问我答:
为什么含羞草不适宜放在室内
A.会释放出毒素
B.招惹蚊虫
C.有难闻的气味

BGM:
George Winston - Cast Your Fate To The Wind
George Winston - LongingLove
George Winston - Northern Plains

《小猪唏哩呼噜》
　　第四集、小猪猡拿狼先生吓了跑了
　　狼先生越跑越慢，两只鼻孔还"呼哧呼哧"像辣盖拉风箱。哼是哼的唻勿得了。小猪猡说：
　　"侬头浪向侪是汗嘛，吃力伐，侬拿我摆下来我自家走！"
　　狼先生拿伊摆下来，一边喘气一边讲：
　　"我真个是一眼力道也呒没了，否则啊，拖侬搿能介一只小物事算啥？我讲拨侬听哦，我有趟拖过一头模子比我还要大个小牛，侬相信伐？"
　　小猪猡跟牢狼先生朝前头走。
　　但是一想到自家就要拨吃脱了，唏哩呼噜心里总归有点吓咾咾，伊老担心个问：
　　"侬敢保证，用侬埃根木头棒棒头'砰'一记，咬的时候是勿会的疼了，对伐？"
　　狼先生嘿嘿嘿笑起来了："嘿嘿，侬只戆棺材，搿又勿是啥个'木头棒棒头'咾，讲拨侬听哦，搿是枪！嗯，有的一天乃，一个打猎的家伙迓了树后头用搿只物事瞄牢我。我一看伊正好末，也离我也蛮近，反正我也逃不掉了，我就朝牢伊“哇呜”一记头扑过去。
　　埃只家伙吓的唻一只跟头朝后头翻过去，手里向搿把枪也落脱唻。他爬起来哦赤仔脚穷奔八奔一歇歇功夫人影子也看勿到了伊讲。就搿能介，这只宝贝，嗨嗨，就归我唻！我讲拨侬听哦，搿里头，还装了好几颗子弹哦。我一扣扳机，喏，侬看，就搿只铁钩钩，子弹就'砰'一记头打出去。你还来勿及痛哦，就啥物事也不晓得了！"
　　小猪猡横看竖看，埃只物事确实不大像是木棒头。伊指牢一个亮晶晶的圆筒筒，问狼先生："侬讲个几只鸡蛋，就是从搿搭打出去啊？"
　　狼先生讲："哎哟，侬搿是浮尸勿是'鸡蛋'呀，是'子弹'。也勿是从搿搭打出去个，是从这根长个铁棒头顶前头个洞洞眼里向打出去个。搿只介漂亮个圆筒筒末是瞄准镜呀。开枪的时候哦，朝里头看，一看，远个物事就近了，打了覅忒准哦！好比我要打一只乌鸦，葛末我就让圆筒筒里向个黑颜色个十字对牢搿只乌鸦，对牢伊个骷榔头。我只要一扣下头个扳机，'砰'一记，子弹肯定打到乌鸦个头浪向！"
　　小猪猡豪稍朝周围看看，呼，还好周围并呒没啥个乌鸦。伊牢担心个。狼先生问：
　　"我讲稀里糊涂，侬辣寻啥物事啊？"
　　小猪猡讲："错脱唻，人家又勿叫'稀里糊涂'，我叫唏哩呼噜，因为我吃物事声音老响个！'唏哩呼噜、唏哩呼噜'！"
　　狼先生讲："哦好好好，随便了，'唏哩呼噜'就'唏哩呼噜'，喂，我讲唏哩呼噜，侬是不是想寻一只乌鸦试试看？"
　　小猪猡马上回答："谢谢侬一家门哦，我勿要试！侬个搿只物事，一眼也勿好白相！"
　　狼先生搿人乃，顶顶讨厌人家讲伊个物事勿灵。伊勿服气个讲:
　　"咦侬搿只寿棺材试末又呒没试过，侬哪能晓得勿好白相个乃？"
　　伊举起枪，瞄牢前面个灌木丛讲：
　　"侬看，要是侬勿用瞄准镜，你只好看到一摊绿茵茵个草。但是哦假使侬往瞄准镜里看，侬就好看到一片一片个树叶子，老清爽哦，哎看到伐，还有一颗红颜色个大草莓！我乃末要是开枪哦，保证好拿伊打飞脱！"
　　小猪猡朝牢灌木丛埃面搭看，啥红颜色个物事也呒没看到。伊讲：
　　"埃个地方根本就呒没啥个'草莓'好伐！侬覅瞎讲八讲！"
　　狼先生得意洋洋地说："欧，看勿出了伐？侬过来！"
　　他拿枪摆辣小猪猡个手里："好！现在你再朝搿个圆筒筒里看看较！"
　　唏哩呼噜端起枪，穷看八看。圆筒筒里向只有几片老大的树叶子。
　　狼先生急吼拉吼个讲："哎，侬只戆大啊，方向勿对！我指拨你看！"
　　他奔到灌木丛前面，寻到了埃颗红草莓，指牢伊讲：
　　"喏！你看搿搭！喏喏喏！辣搿搭！看到伐！"
　　小猪猡移动枪口，仍旧呒没寻着草莓呀，但是伊高兴个讲：
　　"哈，狼先生，我看到侬了，哦，瞎大！瞎清爽！搿只圆筒筒里向有只黑颜色个十字，正好辣辣侬两只眼睛当中！"
　　狼先生一记头"我的妈呀"快点跳开，朝牢小猪猡穷叫：
　　"侬瞎搞啥个百叶结啊！"
　　看到枪口又跟牢伊个身体转过来咾，乃末狼先生吓得唻脚骨也软脱唻。伊大叫一声：
　　"侬搿只坏料！"
　　挨下来伊就一头钻到灌木丛里向，拼仔老命个逃脱了。
　　唏哩呼噜放下枪一看，狼先生已经逃得唻人影子也呒没喽，只听见灌木丛里向"哗啦哗啦"穷响八响。他觉着老莫名个，伊问自己："咦？伊哪能跑脱啦？"
　　看看手里个枪，伊又追上去喊：
　　"狼先生，覅跑！喏！拨侬枪！"
　　狼先生辣辣老远个地方，听到小猪猡辣喊"狼先生，覅跑，喏！拨侬一枪"，哦哟，也勿晓得啥地方来个力道，搿只狼跑得唻更加快了。

《小猪唏哩呼噜》
　　第三集、勿是荡秋千?
　　小猪猡唏哩呼噜做了一只梦，梦到自家辣辣荡秋千。荡来，荡去，荡来，荡去，瞎好白相呀，就是好像头颈搿搭有眼痒兮兮嘛，好像有几只毛毛虫辣辣高头爬来爬去。他拿只骷榔头甩发甩发，想拿毛毛虫甩脱，啥人晓得毛毛虫开始咬伊了，咬的唻伊痛煞脱了。伊只好拿眼乌珠睁开来看唻，一看，咦？天亮了伊讲，但是伊呒没睏辣床浪向，反而是辣辣荒郊野外。绿颜色個草地正从伊个身体下头“嗖嗖嗖”个飞掠过去。
　　"有眼像荡秋千嘛，但是勿大像辣辣做梦呀  "小猪猡讲，"搿桩事体蛮怪个嘛！"
　　小猪猡想看看自家拨挂辣啥个地方，呆呆较只头颈别也别勿过去。不过还算好，太阳一歇歇功夫就露出半边红面孔来，辣辣地浪向映出一条又细又长的影子。他看出来，原来啊，自己是拨一只大物事叼辣盖，埃只大物事末跑的唻飞快。葛末伊就问埃个大物事唻：
　　"请问，侬是啥人呀？"
　　"杭！"埃只大物事回答。
　　"杭先生，早浪向好！我叫唏哩呼噜  "
　　埃个大物事拿他摆辣地高头，一边喘气一边讲：
　　"是&`&狼&`&，不是&`&杭&`&！随便你叫什么名字，但是我呢，最戳气个就是人家拿我个名字叫错脱！"
　　小猪猡不好意思个讲："对不起，狼先生，我呒没听清楚  您拿我带到此里块地方做啥啦？阿拉妈妈要骂个。伊勿许我离开门口头忒远个。"
　　狼先生不生气了。伊讲："你放心。这趟啊，我保证㑚妈妈骂不着侬了。"
　　小猪猡讲："呀，侬覅看阿拉妈妈平常脾气老好哦，要是我忒皮，惹了伊光火哦，乃末伊就要用大耳朵请我吃耳光，用小尾巴请我吃鞭子。啥人劝也呒没用！
　　狼先生说："侬迓到我小人个肚皮里向去，㑚妈妈就请勿着侬吃鞭子了！"
　　小猪猡觉着惊讶个："啊？㑚小人个肚皮有介大啊？"
　　狼先生讲："一只肚皮末当然装勿牢個呀，但是拿侬分开来装到我三个小人肚皮里去！勿是就好了嘛！"
　　小猪猡吓了一大跳："啊？㑚要拿我吃脱啊？"
　　狼先生说："哦哟，否则你当仔我拿侬拖了介远，是触祭饱呒没事体做啊？"
　　乃搿记小猪猡吓的唻魂灵头也呒没了："埃天我帮阿八头姐姐一道白相，伊发急了，咬了我一口，老痛哦！㑚还要一口一口拿我吃脱，我覅痛煞脱啊！"
　　狼先生讲："我可以照顾侬一记，"他拍拍手里向个枪，"我先用搿只物事对牢侬&`&砰&`&一记，你就啥个也勿晓得了，哪能咬侪勿会的痛了。虽然讲乃，搿能介对付侬搿只小物事末，罪过也是蛮罪过个。但是我个三个小囝也有的好几天呒没吃过物事唻，总勿见得让伊拉侪饿煞脱咾？"
　　搿倒也是个。妈妈开饭假使讲晏脱一个钟头哦，伊个肚皮就会得"咕噜咕噜"穷叫八叫，难过的唻要死。好几天勿吃物事搿哪能来三啦？小猪猡觉着埃个三只狼宝宝哪能介作孽。伊讲："葛末快点让阿拉妈妈帮伊拉烧眼粥，阿拉妈妈烧个山芋粥老好吃个，又香又甜！"
　　狼先生心里向想：搿只小猪猡哪能介戆个啦！要是阿拉狼也吃啥个"山芋粥"末，我还用的的着介远跑过来捉伊伐啦！
　　他不想再帮搿只小物事浪费时间，点点头讲："侬的良心倒是蛮好个。不过要是再回去，等㑚姆妈烧好粥再送到我屋里，阿拉小人肯定侪要饿死脱了！"
　　小猪猡唏哩呼噜叹了一口气讲："哎！要是搿能介末，葛末就让伊拉拿我吃脱伐。死一个总归比死三个好一眼。"
　　他搿能一讲末，狼先生反倒有眼难为情了。他假知假呆咳嗽两声，气呼呼个讲："烦唻！侬阿是存心让我心里想殟塞，对伐？侬哪能搿副氽头势啊！你勿是应该哇啦哇啦，穷苦八哭嘛：&`&倷覅吃我呀！倷覅吃我呀！&`&再勿来三，侬逃好唻！ "
　　小猪猡说："我大概吃饱喽。侬奔了介快，我根本逃勿脱个好伐。"
　　狼先生说："算了算了，呒没功夫帮侬讲废闲话了！"
　　他叼牢唏哩呼噜的头颈，又跑起来了。唏哩呼噜心想：
　　"哎，我老早就晓得了，搿根本就勿是荡秋千好伐。荡秋千根本就勿是搿能介样子个！ "

仙人掌的叶子在哪里

我问你答：
下列哪项不是仙人掌的特点
A.能吸附灰尘
B.夜间能释放氧气
C.吸收噪声

BGM:Yiruma - One Day Diary