Niersiektes bekruip jou so ongesiens dat jy een week nog kan tennis speel, en die volgende week dialise benodig. Weet jy of jou niere goed funksioneer? Weet jy vir seker daar is geen bloed of proteïne in jou urine nie? As jou niere ingee en jy kry nie 'n nieroorplanting nie, is jou lewensverwagting op dialise (as jy 'n dialiseprogram haal of kan bekostig) net drie tot vyf jaar.

Nadat 'n nuwe insulienkombinasie as behandeling vir diabetes onlangs in Suid-Afrika bekend gestel is, fokus ons op die behandeling van tipe 1 en tipe 2 diabetes.

Het jy geweet mens kry twee verskillende soorte bosluisbytkoorse in Suid-Afrika? En dat dit verskil van bosluiskoors in honde? En dat dit juis die piepklein bosluisie is wat so gevaarlik kan wees, en veral in die lente en vroeë somer?

Los maar die slang-teengif by die huis – as jy dit verkeerd gebruik kan dit jou doodmaak! En moenie kinders wat paraffien of motbolle ingeneem het, laat braak nie. Wees versigtig vir TwoStep – 'n teelepel vol kan noodlottig wees vir 'n grootmens. En 10 gram Panado's kan drie dae later tot lewerskade en dood lei. Kom luister na die en ander feite oor gifstowwe en vergiftiging.

As jy gedink het talle houe teen die kop (selfs die wat nie harsingskudding veroorsaak nie) nie tot breinskade lei nie, dink weer. Nuwe mediese bewyse toon dat vele ligte houe of stampe teen die kop inderdaad skade aan die brein veroorsaak. Marí Hudson praat met 'n neuroloog oor die nuwe mediese bewyse van breinskade.

Vir baie jare het ons gedink as iemand wat fisiek siek is en ook depressief voel, dit maar bloot verbygaande emosies is. Nou weet psigiaters dat by veral hartsiekte, borskanker en verskeie ander fisieke siektes, depressie of angstigheid inderdaad deel is van die fisieke siekte, en uit dieselfde biochemiese veranderings ontspring en dus ook behandel moet word as deel van die volledige behandeling van die fisieke siekte.

Die hartpionier Chris Barnard is aan hierdie siekte dood. En Ryk Neethling, Roland Schoeman en Schalk Burger Junior is van die bekendes wat hieraan ly. Marí Hudson praat oor asma, die longprobleem wat steeds lewens eis en lewenskwaliteit kan inboet as dit nie baie goed beheer word nie.

Is moedersmelk werklik so 'n wonderbaarlike voedingstof soos wat almal dink dit is? Is borsvoeding werklik so fantasties en onontbeerlik as wat dit aangeprys word? Indien wel, waarom? Marí Hudson gesels met 'n dieetkundige om die vrae te antwoord.

Baie vroue sukkel met blaasprobleme, en 'n vorige program oor die onderwerp het baie reaksie gelok. Daarom saai ons weer die program van ons gesprek met twee spesialiste op die gebied uit. Hulle sê daar is altyd nog iets wat gedoen kan word as 'n eerste operasie vir 'n lek-blaas of prolaps by vroue later nie meer werk nie.

Hoogtesiekte of lugdruksiekte word bespreek na aanleiding van die dood van twee Suid-Afrikaners, een op Kilimanjaro en een op Everest. Wat gebeur met die brein en liggaam? Op watter hoogte kan dinge skeef loop? Hoe moet mens klim om voldoende te akklimatiseer? Waarom kan die Tjerpas Everest op en af klim sonder probleme?