Mir meldet ois nach 3 Wuche ändlich wieder zrugg mit villne neue Anekdote um Chopfverletzige, Falaffel & Netzkabel! Zum Teil no bizeli verkateret, totmüed & au scho wieder total gstresst vom Studi-Alltag gnüssed mir de Ustusch das Mal vode Salo ihrem Balkon us - total authentisch Dank Motorfahrzügbsitzer mit Minderwertigkeitskomplex.

Di hütigi Folg isch zwar churz & knackig, doch sie hets in sich. Mir werded deep & philosophiered über d'Zuekunft. Aber au banali Themene und unagnehmi Situatione bim poschde mit Selfscan oder s'Fasse vo neue Fahrzüg im Militär dörfed nöd fehle. Zudem verzelled mir, welli berüehmti Person mir ide Stadt ahtroffe hend - Tune in!

Sooo, hüt isch de grossi Tag cho – d’Jana het di erscht Wuche vom Militärdienst als Rekrut ide Schwizer Armee überlebt! Ide hütige Folg laht d’Jana d’Chatz usem Sack und packt us, wies ihre ide erschte Wuche als Rekrut ergange isch. Au d’Salome het e ufregendi Ziit mit ihrne Prüefige hinter sich. Wenn du wüsse wetsch, was es mit Spirale und Kommunikation uf sich het, was d’Jana bereits jetzt vo ihrem Material verlore het und welli Klischees wo mer vom Militär (und Fraue, wo is Militär gönd) ghört, stimmed oder nöd – das erfahrsch du jetzt. Tune in!

Nois Jahrzähnt, nois Glück! Zum Jahreswechsel besprechemer oises 2019, denn vill Fründe und mitunter au mir händ im vergangene Jahr Entscheidige troffe, wo oise Läbensweg für di nechste Jahr werded präge. Es durzognigs Jahr mit villne Höche und Tüüfene isch das liebe 2019 gsi. Tune in und los ois zue wiemer alles nomal Revue passiere lönd - und zu guter letzt, all oisne Hörer und Follower natürlich no es belateds Guets Nois!

Egal ob im Fuessballclub, Turnverein oder im Gschäft: Wiehnachtsässe sind essenziell und momentan so aktuell wie de Glüehwiikater nachem Wiehnachtsmärt oder s gruusige Dezember-Wätter verrusse. Mir reded hüt über s Mysterium vom bsoffnige Chef, pläuderlet chli usem Nähchästli und d Jana verzellt vo ihrem Wiehnachtsässe am vergangene Wucheend. Zum Schluss resumiered mir no oises Spotify Rewind 2019 und leaked oisi Guilty Pleasures was Musig ahgaht - Losed ine und findet use ob ihr de gliche Meinig sind wie mir und ob gwüssi Sache genau so ablaufed bi oiem Wiehnachtsässe. Mir bedanked ois schomal jetzt fürs Ihschalte und ushalte!

Mir händ de Narre am Podcaste gfrässe und sind in Plauderluune. Hüt lömmer di vergangeni Wuche revue passiere. Es gaht um Prüefigsstress im Studium, Druckerinsle und gruusigi Ihrichtige im Büro und e langersehnti Bournemouth-Reunion. Mir sinniered über d’Situtation vo junge Erwachsene ufem Arbetsmärt und verzelled vomene Konzert, wo ganz andersch use cho isch, als mir erwartet händ. Lönd oi überrasche und losed ine!