Gurketruppe

D Summerpause neigt sich scho langsam am Endi zue: Guet zwei Wuche vor Saisonstart bespreched de Raphi, David und Tim was ide letzte Wuche bi ihrne Verein so alles passiert isch. Mer reded über Transfers, Testspiel, neui Trainer und hässlichi Liibli. Super League isch zrugg!

Nachem GC-Sieg gege Aarau ide Barrage isch klar: Die drüü Zürcher Verein hend überlebt und spilled au nechst Jahr erstklassig! Idere Episode luegemer uf d Saison und d Barrage zrugg, bespreched euses ZH All Star Team und mached bereits en erste chline Usblick uf die neui Spielziit.

Danke a alli wo eus i eusere erste Saison begleitet hend – und uf e neui, hoffentlich erfolgricheri Saison für eusi Zürcher Clubs!

Nach de 38. und letzte Rundi isch eis schomal klar: Winti blibt dobe! Dank eme 2:0 Sieg gege Sion derfed sich die Rotwiise uf de Schützi fiire lah und dreihed e Ehrerundi unter tosendem Applaus. (No) kei Ehrerundi sondern e Extrarundi het GC vor sich: Au sie günned s letzte Spiel geg St. Galle mit 2:0 und sichered sich so de Barrage-Platz und s Duell gege Aarau. De FCZ hets de beide Zürcher Konkurrente fast no vermiest, verlüreds doch in Yverdon mit 2:3. Für d Waadtländer bringt alles nüt: Yverdon isch dune. TGW gaht id Extrarundi.

11:45 Yverdon vs FC Zürich

22:20 FC Winterthur vs FC Sion

37:14 Grasshopper Club Zürich vs FC St. Gallen

Alles parat fürs grosse Finale: Nachere bittere 1:4 Niederlag geg de FCZ trotz gueter Leistig het sich Winti nöd unterkriege lah. Geg de direkti Konkurrent us Yverdon schaffts Rotwiis i letzter Sekunde no zumene ganz wichtige 2:2. Au GC het geg Yverdon unter de Wuche wichtigi Pünkt gholt und het d Neueburger grad mit 5:0 heigschickt. In Sion denn wieder s gwohnte Bild: 1:2 geg d Walliser. Somit isch alles agrichtet fürs grosse Finale: Die drü Abstiegskonkurrente trennet grad emal 1 Punkt.

De FCZ wo wiiterhin wenig z günne oder z verlüre het sorgt defür eimal meh für Spektaktel: Bide Penalty-Party in St. Galle münd sich d Zürcher am Schluss aber mit 2:3 gschlage ge.

Timestamps:

07:06 – FC Zürich vs FC Winterthur

19:18 – Grasshopper Club Zürich vs Yverdon Sport FC

27:31 – FC Winterthur vs Yverdon Sport FC

44:21 – FC Sion vs Grasshopper Club Zürich

58:18 – FC St. Gallen vs FC Zürich

Was St. Galle für Winti isch, isch GC für de FCZ im Derby: Trotz vill Kritik, Unrueh und em Rutsch unter de Strich, isch de Derbysieg für de FCZ ein Leichtes: Grad mit 3:0 chunt GC drunder – da hilft au de neui Heilsbringer Alain Sutter nüüt. Winti reist mit drüü Sieg und ganz vill Selbstvertraue zu ihrem Lieblingsgegner uf St. Galle. Da bringt selbst en früeh Rückstand niemert in Rot-Wiis us de Rueh und d Eulachstädter holed sich am Schluss en wichtige und düütliche 4:1 Sieg.

12:52 FCZ - GCZ

44:43 FCSG - Winterthur

Vor wenige Wuche isch de FCW praktisch scho abgstige. Nacheme wiitere kapitale Sieg gege de Direktkonkurrent GC cha de David jetzt aber zurecht sege "Ich ha immer dra glaubt!". I dere Episode fiirt er d Uferstehig vo Winti, de Tim hebt sich mit de Verpflichtig vom Alain Sutter am nächste Strohhalm fest und de Raphi cha Malenovic und co langsam nüme ghöre – sin FCZ verlürt au in Sion mit 2:1, debi lauft doch alles genau nach Plan?

9:16 FC Winterthur vs. GCZ

48:12 FC Sion vs. FCZ

Es Osterwucheend voller Drama: Im Keller-Kracher schaffts de Burkart em Hammel es Ei im Goal zverstecke und sicheret em FCW so es frohs Fest uf de Heifahrt. Nöd vode Schoggi-Siite bi GC zeigt sich de Neo-Captain Morandi wo zerst en Penalty verschüsst und sich denn no mit de Fans aleiht – alles offe im Abstiegskampf. Zude Loser-Gruppe gsellt sich im letzte Moment au no de FCZ: Nach de 5:0-Demüetigung bim FCL staht YB am Ostermentig wieder uf, besiegt d Zürcher mit 2:1 und schickt Moniz und co id Relegationsgruppe. Aber hey: + 2 Derbies für eus!

9:02 FC Winterthur vs. Grasshopper Club Zürich

53:52 BSC Young Boys vs. FC Zürich

Balsam für die gschundene Winti- und GC-Seele: Die beide Chellerchinder schlönd zrugg. Winti schaffts ohni en Schuss ufs Goal ihri Fründe us Lausanne zbesiege, während GC mit Köpfchen und Oldie Schürpf en kapitale Sieg in Yverdon ifahrt. Nur zwei Stund später wird d "U21" vom FCZ vom Shaqiri, Otele und co im heimische Letzi vermöblet und müend sich mitem 0:4 no glücklich schätze. Happy David, happy Tim, konsternierte Raphi – vercherti Wält!

9:20 Grasshopper Club Zürich – Yverdon Sport

30:46 FC Winterthur – FC Lausanne-Sport

47:35 FC Zürich – FC Basel

Hunting Season ide Super League: Drü Pünkt im Winti-Köcher sind d Billanz nachem 2:1-Sieg im Wallis und trotzdem isch de David zfridner mit em 0:0 im Kantonsderby.

De FCZ holt geg es Sanches-loses Lausanne in letzter Sekunde no en Punkt, genau die glich Büüti gihts in Winterthur zhole: 0:0.

Nachem miserable Derbyuftritt wird GC au in Basel mit 2:1 abgschosse. Umso überraschender griift d Bojang-Falle gege Luzern: En Hattrick vom «Limmat Ronaldo» beruhiged am Tim sini Nerve.

Nach de Natipause mit zwei Testspiel gahts ide SL langsam aber sicher i die entscheidendi Phase: De Raphi und de Tim hend sich gmeinsam s Zürcher Derby gönnt und brichtet vom Stadion-Bsuech. Eine vo beidne isch verhalte happy, de ander setzt im Podcast zume Rant ah. Und de David denkt sich nur, "es gaht im Fall no schlimmer" nachdem sin FCW au gege Basel kei wiiteri Pünkt cha ifahre. Fazit: Mer hend zwei Barometer uf 10.