Haukur Ingvarsson verðlaunaljóðskáld er uppalinn í Hafnarfirði þar sem hann hlaut bókmenntauppeldi frá gamalli nágrannakonu sinni. Hauki er afar umhugað um náttúruvernd en í ljóðabók hans Vistarverur, sem hlaut rífandi viðtökur í síðasta jólabókaflóði, dregur hann upp dystópíska mynd af framtíðarsamfélagi þar sem stutt er á milli hláturs og hryllings. Hann á tvo unga syni og segir að hann grípi stundum skelfing þegar hann leyfir sér að velta fyrir sér hvaða framtíð bíði þeirra. Hann er að leggja lokahönd á doktorsverkefni sitt um áhrif bandaríska skáldsagnahöfundarins William Faulkner á Íslandi og segist trúa á ævintýrin.

Halla Margrét Jóhannesdóttir leikkona fór í íþróttakennaranám eftir að hún útskrifaðist úr Menntaskólanum í Reykjavík. Hún er forfallinn ABBA aðdáandi og tók nýlega lagið á sviði í ABBA safninu í Stokkhólmi fyrir engan nema sjálfa sig og gáttaðan starfsmann safnsins. Hún er miðjubarn, ljóðskáld og gjörningalistamaður og er um þessar mundir að setja saman ritlistarnámskeið fyrir áhugasama byrjendur í skapandi skrifum.

Umsjón: Júlía Margrét Einarsdóttir