Við fengum að heyra 8. og síðasta þáttinn í smáþáttaröðinni Heimur ostanna, þar sem ostaáhugamaðurinn Svavar Halldórsson hefur í fylgd ostasérfræðingsins Eynýjar Sigurðardóttur, leitt hlustendur um ævintýraheima ostanna. Í þessum síðasta þætti fóru þau Svavar og Eirný yfir bragðbætta osta af öllu tagi. Hvað má og hvað má ekki? Þau hugsuðu líka til jólanna í þessum síðasta þætti í bili. Alla þættina átta af Heimi ostanna má nálgast í hlaðvarpsútgáfu á vef RÚV og helstu hlaðvarpsveitum.

Í dag fengum við svo 7.þátt í smáþáttaröðinni Heimur ostanna, þar sem Svavar Halldórsson og Eirný Sigurðardóttir leiða hlustendur um ævintýraheima ostanna. Í dag töluðu þau um gráðosta sem er kannski viðeigandi því margir líta á þá sem jólaosta og jólin nálgast óneitanlega.

6. þáttur í smáþáttaröðinni Heimur ostanna var í þættinum i dag. Þau Svavar Halldórsson ostaáhugamaður og Eirný Sigurðardóttir, ostasérfræðingur, leiða hlustendur um ævintýraheim ostanna. Í dag flökkuðu þau um í tíma og rúmi. Rómverskir hermenn, fyrsta mjólkursamlag heimsins og Ísland um aldamótin 1900 er meðal þess sem þau fóru yfir í þætti dagsins. Grana stíll, Parmiggiano, Cheddar og Emmenthaler eru meðal þeirra heimsþekktu ostategunda sem bar á góma.

Í dag var 5.þáttur í smáþáttaröðinni Heimur ostanna. Þar sem þau Svavar Halldórsson og Eirný Sigurðardóttir, ostasérfræðingur, leiða hlustendur um undraveröld ostanna. Í dag töluðu þau Svavar og Eirný um rauðkýttisosta. Þetta er kannski sá flokkur osta sem er einna minnst þekktur á Íslandi. Hvaðan þeir koma, hvað einkennir þá og hvernig er best að njóta þeirra?

Í dag fengum við fjórða þáttinn í smáþáttaröðinni Heimur ostanna, í dag fjölluðu þau Svavar Halldórsson og Eirný Sigurðardóttir um Camenbert, Brie og aðra hvítmygluosta. Hvaðan þeir koma, hvað einkennir þá og hvernig er best að njóta þeirra?. Ostaunnendur og sælkerar leggið við hlustir.

Smáþáttaröðin Heimur ostanna var á sínum stað í dag þar sem þau Svavar Halldórsson og Eirný Sigurðardóttir leiða okkur inní undraveröld ostanna. Ostur er ekki bara ostur, eins og við höfum heyrt í undanförnum tveimur þáttum. Í þessum þriðja þætti tala þau um ferska osta, hvaða ostar falla inn í þann flokk, hvað einkennir þá, hvernig þeir eru búnir til og hvað er best að drekka með þeim.

Við fengum í dag annan þáttinn í smáþáttaröðinni Heimur ostanna, í umsjón matgæðingsins Svavars Halldórssonar og ostasérfræðingsins Eirnýjar Sigurðardóttur þar sem þau leiða hlustendur um undraveröld ostanna. Í öðrum þætti tala þau um mjólk sem að sjálfsögðu er undirstaða allrar ostagerðar í heiminum. Kúamjólk, geitamjólk, sauðamjólk og kaplamjólk. Hvað er líkt og hvað er ólíkt? Hvaða máli skiptir mjólkin við að skapa leyndardóma ostanna?

Heimur ostanna eru skemmtileg smáþáttaröð í umsjá ostaáhugafólksins Svavars Halldórssonar og Eirnýjar Sigurðardóttur. Þar leiða þau hlustendur um undraveröld ostanna. Í þessum fyrsta þætti fara þau Svavar og Eirný yfir upphaf ostagerðar, söguna og mismunandi aðferðir. Móngólskar hersveitir, gómsæt gerjun, skyr, osta-sæla og ávanabindandi eiginleikar er meðal þess sem þau drepa á í þessum fyrsta þætti.