Í Hismi vikunnar förum við yfir hugsanlega ríkisábyrgð til Wow, vesen Boing og óútreiknanlegan flugbransa, mikla ályktun frá okkar besta fólki á Tene, stórar fréttir sem bárust í Litla-Stokkhólmi í vikunni og tyggjó.

Í ljósi fordæmalausra aðstæðna í þjóðfélaginu er blásið til Neyðar-Hismis, því fimmta á þremur árum. Fáum Magnús Hrafn Magnússon lögmann til að rýna í stöðuna og hvað sé að gerast í Landsrétti og svo kemur Andrés Jónsson í seinni hluta þáttarins og kryfur pólitísku stöðuna eftir að dómsmálaráðherra sagði af sér. 

Sólmundur Hólm skemmtikraftur og viðskiptafræðingur af endurskoðunarbraut er gestur þáttarins og rýnir með Árna og Grétari í stöðu Wow og hve langt sé í að Skúli Mogensen verði kominn á gamlan ryðgaðan LandRover, gjaldþrot Sólningar, ABBA-showið á milliþingi Viðreisnar, hina vel ættuðu Hatara-drengi og margt fleira. 

Gunnar Dofri Ólafsson lögfræðingur Viðskiptaráðs er gestur Hismisins í þessari vikunni. Farið er yfir verkföllin, kosningabíl Eflingar og hvort lykill að lausn sé samhent átak helstu skyndibitastaða landsins með tvöfaldri Megaviku strax í kjölfar undirritunar nýrra kjarasamninga. Rætt er um manninn sem þóttist vera lögreglumaður, handtók fólk og fór með upp á Hverfisgötuna, auk þess sem afmæli bjórsins er rætt og hvaða bjóra Íslendingar, þar á meðal flugumsjónarmaðurinn í Grímsey, voru að vinna með 1. mars 1989.

Í Hismi vikunnar förum við yfir yfirvofandi verkföll og viðbrögð verkalýshreyfingarinnar við tilboði ríkisstjórnarinnar sem lagt var fram á dögunum. Þarf fína fólkið í atvinnulífinu að ganga í verkin ef til verkfalla kemur og hvernig mun það ganga? Þá ræðum við fingrasetningu, uppgang sósíalisma hjá aldamótakynslóðinni og ákvörðun Kristjáns Þórs Júlíussonar að opna landið fyrir ógerilsneyddri mjólk.

Í Hismi vikunnar ræða Árni og Grétar þessa miklu fréttaviku sem er að líða og ræðum vandaða yfirlýsingu frá forsvarsmönnum Menn í Vinnu ehf., förum yfir mál Procar bílaleigunar ásamt því að rýna í harðorða aðsenda grein í Mogga um áramótaþátt Vikunnar á RÚV, strangheiðarlega rútuferð XD um landið, hversu sannfærandi það er þegar Jamie Oliver er farinn að elda heiðarlegan mat og loks hið hraðvirka réttarkerfi Færeyja sem dæmir menn á mánudegi fyrir hnefahögg helgarinnar. 

Jakob Birgisson uppistandari er gestur þáttarins að þessu sinni og Grétar hringir inn, að þessu sinni frá Amsterdam. Farið er yfir það offramboð af hneykslismálum sem eru í gangi núna, allt frá Páli Óskari til Pírata með viðkomu hjá Páli Vilhjálmssyni á Moggablogginu, Siðferðisgáttina og uppgrip hjá siðfræðingum um þessar mundir, hlaðvarp þingmanna og hvort fleiri þingmenn þurfi ekki að fara að koma sér upp hlaðvarpi. Ný keiluhöll fyrir hipstera, maður sem kyrkti fjallaljón og hvernig sé best að bera sig að í frumskóginum ef kyrkislanga ræðst á þig. 

Jóhann Alfreð Kristinsson sest í settið með Árna í dag og Grétar er með stutt innslag frá skíðaferð sinni í Austurríkjum. Förum yfir pálmatrésmálið og glæsilegt yfirfaraskegg Hjálmars Sveinssonar, Seðlabankann, formannsslaginn í KSÍ, hugmyndir um að steypa upp í Miklubrautina, hvernig Simmi Vill er orðinn hot take kóngur landsins og söknuðinn eftir gamla níðsterka plastpokanum sem allt þoldi. 

Hismið er á alþjóðlegum nótum í dag þar sem Grétar er í leiðinlegasta hluta LA, Anaheim og fer yfir málin í gegnum síma. Ræðum um endurkomu Miðflokksmanna og hverju Lilja Alfreðsdóttir hefur hvíslað í eyra Gunnars Braga í þingsalnum og hvort ekki þurfi að fara að vinna með varalestur í sjónvarpsfréttum til að greina betur hvað sagt er. Förum yfir endurkomu Heimastjórnarinnar, velgengnisskyrtur Ingva Hrafns, peak-miðaldra móment Árna á dögunum og menn sem teikna útlínur á verkfærin sín í bílskúrnum. 

Hekla Elísabet Aðalsteinsdóttir er gestur Hismisins þessa vikuna og ræðir meðal annars áhrifavalda, raunveruleikasjónvarp og pizzu ást. Þá rýnum við í uppáhaldsmat þingmanna, og hvort eitthvað komi á óvart í þeim efnum.