Við heyrum tvo frábæra konserta í Konsert vikunnar, byrjum á Iceland Airwaves núna í nóvember og heyrum í Hjaltalín í Listasafninu, og förum svo á Sweden Rock sumarið 2016 og heyrum í hinni frábæru sænsku hljómsveit; The Hellacopters. Hjaltalín hefur um árabil verið ein vinsælasta og dáðast hljómsveit okkar Íslendinga. Sveitin sendi frá sér tvö lög á síðasta ári. Baronesse kom fyrst í janúar, fyrsta nýja lagið frá Hjaltalín í 3 ár, og svo kom Love from 99 síðasta sumar. Það átti líka að koma út stór plata í haust, en henni var slegið á frest fram til vors 2020. Rætur Hjaltalín liggja næstum 15 ár aftur í tímann til MH þar sem sveitin var stofnuð og plötur sveitarinnar eru fjórar talsins: ??2007: Sleepdrunk Seasons ??2009: Terminal ??2012: Enter 4 ??2014: Days of Gray (Original Motion Picture Soundtrack) Hjaltalín var ein af hljómsveitunum sem spiluðu á Tónaflóði Rásar 2 á Arnarhóli í ágúst, og svo hélt sveitin tvenna tónleika í Eldborg í Hörpu í september, en það gerði Hjaltalín síðast 2014. Og svo spilaði Hjaltalín á Airwaves í Listsafninu, og þeir tónleikar voru teknir upp fyrir Rás 2. Þar spiluðu þau nýju lögin Love from 99 og Baronesse, og svo eitt sem er óútkomið; Needles and pins. Þá skiptum við um gír og allar græjur, förum yfir til Svíþjóðar, klæðum okkur í rokkbomsur og leðurjakka og hækkum í mögnurunum upp í 11, og hlustum á tónleika með sænsku rokksveitinni Hellacopters á Sweden Rock 2016. Hellacopters er "garage"-rokkband sem var stofnað árið 1994 af þeim Nicke Anderson sem syngur og spilar á gítar, Andreas Tyrone "Dregen" Svensson gítarleikara, bassaleikaranum Kenny Håkansson og trommaranum Robert Eriksson.