Hormónar

Í þessum þætti Hormóna verður reiðin skoðuð. Hvað er reiði? Hvenær er hún góð? Hvenær er hún slæm? Hverjar eru helstu birtingamyndir hennar? Tilfinningin verður skoðuð með hjálp fræðimanna, sálfræðinga, listamanna og prests.

Í þessum þætti Hormóna verður móðurhlutverkið og hið svokallaða móðureðli skoðað nánar. Hvað er það að vera mamma? Hvernig er að vera mamma? Hvað gerist í heilanum er á meðgöngu stendur, og raunar eftir fæðingu líka? Hvað er síðan þessi tilfinning barnaþrá?

Í þessum þætti Hormóna verður í fyrsta sinn einblínt á eiginleg hormón. Hvað vitum við í raun og veru um adrenalín? Adrenalíngarðurinn verður sóttur heim, spjallað verður við lífeðlisfræðing og adrenalínfíkla og konu sem lifði af hættulega árás - mögulega þökk sé adrenalíni.

Allt frá tímum Platóns, og sennilega lengur, hafa heimspekingar velt fyrir sér spurningunni um tilgang lífsins. Spurningin er tímalaus, og hún er gjörsamlega án staðsetningar. Í þessum þætti Hormóna er tilgangurinn skoðaður. Tilgangur alls, tilgangur lífsins, tilgangsleitin. Ásamt því að skoða ríkjandi kenningar og birtingamyndir tilgangsins í menningu okkar og sögu, er tilgangurinn skoðaður með ólíkum aðilum samfélagsins.

Hvað er heimþrá? Er heimþrá eitthvað sem að hrjáir aðeins ung börn eða er heimþrá tilfinning sem fylgir okkur alla ævi? Hvar er heima? Það virðist vanalega vera þannig að fólk kalli aðeins einn stað heima. En er hægt að líta á fleiri en einn stað sem heima? Hvað þýðir „Home is where the heart is?'' eða „Heima er best, heima er kært, heima er þar sem hjartað er?''. Í þessum þætti Hormóna er heimþráin m.a. skoðuð með sálfræðingi, fanga og íslendingum sem búa erlendis.

Fyrsti þáttur Hormóna er tileinkaður röddinni en spurt er hvaða hlutverki gegna raddir í lífi okkar? Umsjón: Anna Gyða Sigurgísladóttir.