Jingpho - “Words of Life”.3gp //
1 KORINHTU 13 - Tsaw Ra Ai Myit1Ngai gaw masha ni a ga hte lamu kasa ni a ga amyu myu hpe chye tsun rai ti mung, tsaw ra myit n rawng yang gaw, mahku rawng ai sumseng hte, ngoi gara ai shupsheng sha ngai tai nga nngai. 2Ngai myihtoi chye htoi ai hte sung ai lam yawng mayawng, chye chyang ai hpaji amyu myu hkum nga ai hte bum hpe jasit kau lu hkra re ai makam masham rawng ti mung, tsaw ra myit n rawng yang gaw, ngai hpa n rai nga nngai. 3Ngai lu ai nye a arai yawng hte hpe ngai gam kau nna nye a hkum hpe nat kau na matu ap kau rai ti mung, tsaw ra ai myit n rawng yang gaw, ngai hta hpa akyu nga na n rai.4Tsaw ra ai myit gaw myit galu kaba nga ai; matsan dum lama nga ai; manawn masham n nga ai, grang shakawng ai ga n tsun ai; gumrawng gumtawng n rai ai; 5tsaw ra ai myit gaw n shawp n kap ai amu n galaw ai, tinang a akyu n tam ai, sinpawt lahtet n nga ai, mara n tam nga ai. 6Tsaw ra ai myit gaw n ding n man n hkru n kaja ai hta n kabu ai sha, dai tengman ai hta kabu gara nga ai. 7Tsaw ra ai myit gaw galoi mung asum n hkam ai, galoi mung kam sham nga ai, galoi mung myit mada nga ai, galoi mung hkam sharang nga ai. 8Tsaw ra ai myit gaw galoi mung htak mat chye ai n rai; myihtoi chye htoi ai lam rai yang gaw, hkoi mat na ra ai; ga amyu myu chye tsun ai lam rai yang gaw, sim mat na ra ai; chye chyang ai lam rai yang gaw lai mat wa na ra ai. 9Hpa majaw nga yang, anhte a machye machyang chyeju kumhpa ni mung, Wenyi shung ya ai hte myihtoi ga hku hkaw tsun ai atsam ni mung hkum tsup ai n rai, daw chyen sha rai nga ai; 10Rai ti mung, dai hkum tsup re ai du sa wa jang gaw, daw chyen re ai gaw hkoi mat na ra ai. 11Ngai ma kaji naw rai nga yang, nye a tsun shaga ai lam, myit hta hkam sha ai lam ni, myit mang ai lam yawng gaw ma kaji zawn rai nga ai; ya ngai salang wa jang she ma kaji a lailen ni yawng hpe shinggan kau ni ai. 12Ya anhte mu lu ai gaw, jamna kaw dan pru ai sumla ni hpe mu ai zawn n dan n leng ai hku sha mu ga ai. Hpang de anhte myi man chyaw mu lu na ga ai. Ya ngai chye ai gaw daw chyen mi sha rai nga ai; dai shaloi e, Karai Kasang ngai hpe chye chyang ai zawn, tsep kawp ngai mung chye chyang na ring ngai.13Ya chyawm gaw makam masham, myit mada ai hte tsaw ra ai myit ngu ai ndai hte masum nga ai, rai ti mung, dai hte hta grau kaba ai gaw tsaw ra ai myit rai nga ai.
