OPEN HEAVENS

MATALA LE LAGI MO LE ASO GAFUA 23 2026

(tusia e Pastor EA Adeboye)

Manatu Autu: I le filemu ma le faatuatua (In quietness and confidence).

Tauloto Tusi Paia: Isaia 30:15 “Auā o lo‘o fa‘apea ‘ona fetalai mai o le Ali‘i le ATUA, o le Pa‘ia o Isaraelu: O lē liliu mai ma le filemū e fa‘aolaina ai ‘outou, o le filemū ma le fa‘atuatua o lo ‘outou malosi lea; a ‘ua ‘outou lē mafafai.”

Faitauga - Tusi Paia: Salamo 112:1-9

A e fetaiai ma tagata e talia soo se ituaiga osofaiga e aunoa ma le tali pe tau atu, tusa pe o loo iai le malosiaga iai latou e tali ma tau atu ai, e tatau ona e faaeteete i lou faatigā iai latou. O ia tagata e loto maualalo, ma a latou tuuina atu tagata o loo osofaia i latou i le Atua, e sili atu i tagata o loo osofai atu ona faatoese ma saili e toe faia se faaleleiga i se taimi vave. Aua foi o le Atua e mafai ona faamalolo ma faasaoloto, e mafai foi ona ia fasioti ma faaumatia. A tau atu le Atua mo se tagata, o soo se tagata o loo tetee i lea tagata o le Atua, o le a lē mafai ona ia tālia le taui. 

Sa iai se tinā aeto na ia tulia lana tama aeto e sue mai se meaai. Ao saili meaai, na vaai atu le tamai aeto e se pato ma lana toloai, na lele atu ma ave se tamai pato i lona tinā. Na fesili atu iai lona tina poo le a le mea a le tinā a le tamai pato na faia. Ae tali le tamai aeto e leai sana mea na faia. Na faateia le tinā aeto ma fai i lana tama aeto e alu e toe faafoi le tamai pato i lona tinā ae saili seisi meaai. Na alu le tamai aeto ma toe faafoi le tamai pato i lona tina, na tilotilo atu le tinā ae leai sana mea na faia. Mulimuli ane ua vaai atu le tamai aeto i le matuamoa ma lana toloai, ona ia avea lea o se tamai moa. Ina ua foi atu le tamai aeto i lona tina, na fesili poo le a mea na faia e le matuamoa. Fai mai le tamai aeto, ‘na matuā ita ma faasagatau mai’. Fai mai le tina aeto, tatou aai loa. Ina ua maea na aai na fesili le tamai aeto pe aisea na toe faafoi ai le tama a le tinā o le tamai pato ae latou aia le tama a le matuamoa. Na tali le tinā aeto, ‘na faia e le matuamoa le mea e mafai ona faia, peitai o le pato e lei faasagatau mai, ua ia tuuina atu i le Atua, ma e lē lava le telē o le vanimonimo e tatou te lalafi ai mai le Atua’. 

Le au pele e, ia e filemu i soo se taimi e te feagai ai ma se tulaga lē lelei, ae faatuatua ma le filemu i le Atua, o se auala lea e te ola manumalo ai. I le Salamo 46:10, o loo poloaia oe e le Atua, ia filemu ma iloa o ia o le Atua. A e teena le tau faafefe mai a le tiapolo ma ana mailei ae filemu pea ma faatuatua i le Atua, o lona mana e mafai ona liliuina soo se tulaga lē lelei o loo feagai ma oe i le lelei. Aua e te toilalo i le fefe, faatuatua ma le filemu i le Atua. O le fuafuaga sili e manumalo ai i soo se tulaga faigata, o le ole atu i le Atua mo le fesoasoani, ona e filemu lelei ma faatalitali i lona galue mai, i le suafa o Iesu, Amene.