Intemmu l-ewwel staġun ta' Il-Ħass Mal-Bass bil-kbir bl-aktar crossover antiċipat u mistenni bil-ħerqa tas-sena!

Fl-episodju festiv tal-lum, Kurt u Sararah jitgeżwru  bix-xalel u l-iskufji u jferrgħu ċumnata sħuna sħuna biex jiddiskutu dak kollu marbut ma' żmien il-Milied. Jissemmew ukoll il-valuri Nsara vis-à-vis min jgħix bla saqaf fuq rasu, it-tifqigħa bla rażan tal-boutique hotels.

Fl-episodju tal-lum nirriflettu fuq suġġett mhux wisq festiv jew festeġġanti, jiġifieri l-mewġa tal-lemin estrem li ilha taħkem ix-xenarju politiku Ewropew dawn l-aħħar snin, fid-dawl ukoll ta' avvenimenti riċenti. B'interventi aktar leġġeri dwar min joqgħod iżid @official fil-handle tal-media soċjali u l-ħinijet tax-shipping minn ħwienet bħal ASOS.

Fl-episodju tal-lum, Kurt u Sarah jħarsu lura lejn il-vjaġġ awditorju tagħhom ta' din is-sena, minqux għal dejjem fl-istorja grazzi għal Spotify Wrapped. Eh, u l-Vengaboys ġejjin s'Għawdex!!

Fl-iqsar episodju ta' Il-Ħass Mal-Bass s'issa (għall-erwieħ), Kurt u Sarah jirriflettu fuq it-terrur akut ikkaġunat mit-teżijiet li qed jiktbu bħalissa, ipinġu diskussjoni ħelwa ħelwa fuq it-tattoos u l-implikazzjonijiet ta' meta titpinġa, u jilmentaw fil-qosor dwar il-Mercury Tower u l-qirda tas-siġar il-Mosta.

Fl-20 episodjuversarju ta' Il-Ħass Mal-Bass ningħaqdu mal-mistiedna speċjali ta' din il-ġimgħa, Erika Ellul, biex neskavaw l-eqdem qallut tal-bnedmin fossilizzat u nirriflettu fuq id-diversi perċezzjonijiet tagħna l-Maltin fil-konfront tal-mewt.

F'dan l-episodju mimli daqs bajda bil-crack ningħaqdu mal-mistieden ekstraspeċjali tagħna Yandrick Agius: semmiegħ akkanit tal-podcast u Baby Doll extraordinaire fil-Moulin Rouge. Nagħmlu naqra catch-up (u mayonnaise) bejnietna u nirriflettu mhux biss fuq l-14-il brudatina li ħejjielna Yandrick, iżda wkoll naqsmu perspettivi u perċezzjonijiet bħala Maltin li għexu fit-tul lil hinn mill-pajjiż.

Fl-episodju tal-lum nittawlu minn wara l-kwinti u nimirħu fuq taħdita dwar it-teatru u nolqtu xi perspettivi differenti marbutin mad-dinja tal-ispettaklu. B'interventi spettakolari daqstant dwar meta nużaw il-lirika fil-captions ta' Instagram, u għaliex aħna bħala soċjetà mġegħlin naħsbu li t-trabi tat-twelid huma ħlejqiet ħelwin.

Fl-episodju tal-lum, Kurt u Sarah jerġgħu lura fiż-żmien biex jirriflettu fuq iż-żmien li qattgħu l-postsekondarja, miżgħud b'esperjenzi ammirabbli daqskemm kienu kwistjonabbli. U la qed insemmu imbarazz kwistjonabbli, isiru wkoll dibattitu dwar il-validità tal-mayonnaise u lment rigward l-arja kundizzjonata ġewwa Spazju Kreattiv. 

Fl-episodju tal-waħx (litteralment u figurattivament) tal-lum, Kurt u Sarah jagħtu prietka ta' esperjenzi marbutin ma' lejlet Jum il-Qaddisin kollha. Jiġu diskussi wkoll il-bżonn li navżaw 'l-għassa bil-miġja ta' Ed Sheeran u l-istat massakrabbli tal-bankini fil-pajjiż.