Igande honetan, maiatzak 7, erabakitze eskubidearen aldeko beste olatu bat izango da Euskal Herrian. Orain arteko olaturik masiboena, gainera. Debabarrena, Durangaldea, Lea-Artibai, Uribe Butroe, Uribe Kosta eta Urola Kosta eskualdeetan nahiz Zeanuri, Zubieta, Lasarte-Oria, Usurbil, Legutio, Urkabustaiz eta Orozko herrietan galdeketak egingo dituzte igandean, Gure Esku Dagok antolatuta.

Donostiako Gros auzoko Kortxoenea gaztetxearen eraisketa salatzeko protestetan atxiloturiko bi gazte epaitu dituzte gaur, Gipuzkoa hiriburuan. Zehazki, Ategorrieta kalean eserialdia egiteagatik, urtebeteko espetxe zigor eskaerari aurre egin behar izan diote bi auziperatuek eta hori salatzeko elkarretaratzea egin dute goizean dozenaka lagunek epaitegi atarian.

Azoken tartean garaiko eta bertako produktuen ohiko errepasoa egin dugu Lierni Elortzarekin. Larreen irekiera aipatzearekin batera produktu berriak nabarmendu ditugu: Azkoititik iritsitako lehen tomateak, tipula gorria eta borraja, baita marrubiak ere. Piper, aza landareen garaia ere badela esan digu Elortzak eta landare aromatikoei ere egin diegu leku.

Olatukoopeko lagunekin egiten dugun Ekonomia Sozial Eraldatzaileari buruzko tartean gaur Elika kooperatiba ezagutu dugu, Jon Etxebestek aurkeztu digu. Barazkiak ekoizten dituen egitasmoa 2016 amaieran jarri zuten martxan Oiartzunen, egun bi langile ditu eta berrogei bazkide inguru.

Amaitu zen Korrika baina aurrera jarraitzen du AEKren lanak, helduen euskalduntzeak, alegia. Askok AEK Korrikarekin lotzen badute ere oinarrian euskara irakasleak dira eta horretan lan egiten dute urte osoan. Egiten duten lan horri aurpegiak jartzea garrantzitsua jotzen dute eta horregatik abiatu zuten AEK jendea egitasmoa. Aurten Leo Turiño aurkeztu digute.

Asteko argazkiak atalean maiatzaren lehenari begira jarri gaitu Irantzu Pastor argazkilariak. Zehazki, Estambul, Atenas, Pakistan eta Kubako argazki bana ekarri digu eta horiek aipatu ditugu. Argi dago, munduan barna langile borroka bizirik dagoela.

Lectura  critica diaria de la prensa estatal con el periodista Martin Garitano.

Euskal zinea existitzen ez zela esaten zen garaietan bera jada ari zen egiten. 1985ean Kalabaza tripontzia marrazki bizidunetako lehen euskal film luzea egin zuen eta ondotik etorri ziren beste hainbat. 66 urte zituela zendu zen pasa den ostiralean Juanba Berasategi. Haren ibilbideari eta pertsonari begira jarri gara Euskadiko Filmategiko Jon Lopezekin eta Joserra Senperena musikariarekin.

Ostiralean hasiko da Arrigorriagan XXII. Nazioarteko Clown eta Pailazoen Jaialdia. Igandea bitarte 11 ikuskizun eta bestez gozatzeko aukera izango da, guztiak dohainik gainera. Herriko hiru gune bihurtuko dira eskenatoki: udaletxe plaza, frontoia eta kiroldegia. Amagoia Garaizabal Armesto jaialdiko zuzendari eta udaleko kultur teknikariak eman dizkigu xehetasunak.

Euskal Herriaren burujabetza feminista lortzeko feminismotik inzidentzia politikoa izatea ezinbestekotzat jotzen du Bilgune Feministak eta horregatik, botere(tze) feministan oinarrituko dira larunbat honetan Berriozarren izango diren Emakume* Abertzaleon VII. Topaketa Feministak. Ospakizunetik ere izango du, hamabost urte bete baititu talde feminista honek. Bertako hiru belaunaldi batu ditugu: Kakun Guarrotxena, Miren Aranguren eta Naia Torrealdai.