မနာလိုစိတ်ဆိုတာဟာ သူတပါးက ကိုယ့်ထက်သာလွန်နေတာကို မကျေနပ်တဲ့ စိတ်ခံစားချက်မျိုးဖြစ်တယ်လို့ ယေဘုယျ အားဖြင့်အဓိပ္ပာယ်ဖွင့်ဆိုလို့ရပါတယ်။ ကိုယ်ရဲ့စိတ်ထဲမှာမိမိကိုယ်မိမိတပါးသူနဲ့နှိုင်းယှဥ်မိခြင်း၊ မိမိရဲ့အားနည်းချက်တွေကို တနုံ့နုံ့စိတ်ဓာတ်ကျမိနေခြင်း စတဲ့စိတ်များမှတဆင့် မနာလိုစိတ်တွေ စတင်ဖြစ်ပေါ်လာလေ့ရှိပါတယ်။   မနာလိုစိတ် ဖြစ်ပေါ်လာခြင်းဟာ သဘာဝတခုဖြစ်ပြီး အမြဲတမ်းမကောင်းဘူးရယ်လို့လည်း မဟုတ်ပါဘူး။ ဒါပေမယ့်မနာလိုစိတ် အပေါ်မှာ ထိန်းချုပ်မှုမရှိရင် ကောင်းကျိုးထက်ဆိုးကျိုးကပိုများသွားလေ့ရှိပါတယ်။ ဒီစိတ်ကိုပါဋ္ဌိလိုဆို “ ဣဿာ”လို့ ခေါ်ပါတယ်။ သူတစ်ပါးရဲ့ အောင်မြင်မှု တွေကို အသိအမှတ်မပြုနိုင်ခြင်းကနေလည်း ဣဿာ ဖြစ်သွားတတ်ပါတယ်။