Hüt zu Gast: Onur - so vielfältig wie en Regeboge. Vilicht kennet ihr ihn vo Social Media unter dem Name ONYOUMUA. Er isch Content Creator für MAC Cosmetics, als Mah nöd de gängist Bruef, vorallem nöd mit türkische Wurzle. Hinderem Strahle ih sim Gsicht steckt au e Gschicht vo Hürde, vo viel Hass, Vorurteil aber genau soviel Muet und Tatedrang - sich selber chöne zsie! Alles was uf Social Media glänzt, het au sini Schattesite. Onur beantwortet all eui Frage, sehr persönlich und echt. Freuet eu uf e tüüfi Folg.

Sie isch Lehrerin und Mediepädagogin,(wtf ts that?) WELCOME AMRA - Redemer doch! Sind alli Streber vo früehner, hüt Lehrer? Wie findsch euses Schuelsystem, was chönt me verbessere? Was het sich veränderet ide Schuel, wo du Schüelerin gsie bisch im Verglich zu etz wo du Lehrerin bisch? Zudem mega spannendi Gschichte wo Amra als Lehrerin erlebt het und Themene us de Kinderpsychologie wo mir besprechet. Au viel Frage us de Community cho- wo wie immer, all beantwortet worde sind!

Chiara verzellt hüt über ihre Job. Sie isch Kinder- und Jugendpsychologin. Was sind Hürde, Sunne- & Schattesite ih ihrem Bruef. Wichtigi Frage bzgl. Erzihig sind vo eu cho wo sie eu gern beantwortet het. Wie ischs früehner gsie, wies ischs hüt? Mir packet paar Storys us de Psychiatrie us und öppis lerne chasch dezue au no.

Millionär werde, wer will das nöd? Es paar gönd defür au de illegal weg. Enis verzellt vo sim Lebe und sim Traum Millionär zwerde. Het ers gschafft und was hets defür brucht? Alles was e gueti Gschicht brucht: Drama, Kriminalität, viel Geld, türi Autos und e grossi Wendi ih sim Lebe. Isch er happy gsie und was isch ufm Weg kaputt gange? Wür ers wieder so mache und was het er us dem ganze glernt?

Willkomme bim neue Format: Jetzt Diskutieret Mir. Es git kei Tabu Themene. WICHTIG: Loset das Intro, de isch Matchentscheidend. Mir redet über Übergwicht, Pädophilie, LGBTQ, Psyche, Feminismus und alles was eus so in Sinn cho isch wo aktuell ide Gsellschaft kursiert und grosse Platz ihnimmt. Viel Spass 

Alle guten Dinge sind drei, herzlich wilkomme Mike! Mir redet über eusi Fründschaft, wo mittlerwile scho 13 Jahr verhebet. Grosses Thema ih dere Folg, was sind eusere meinig nah d`Grundbaustei für e Fründschaft und weli Wert und No-Goes bi Fründschafte gsehnd mir. Wenn merksch, dass en Kolleg keine wahre Kolleg isch? Söll me ehrlich und direkt sie oder ufd Schnure hocke und Gfühl vom gegeüber nöd verletze?

Kei Folg isch so sehr vo eu gwünscht worde wie die! De Sam endlich bi Jetzt Redet Mir! Die Folg heisst zurecht Klartext, wil da nüt in Watte ihpackt isch und es wird RAW,DIREKT & EHRLICH kommuniziert, ohni Rücksicht uf Verlüst. Spannendi Themene wie: Sis Mindset, The Road to Blackbelt, de Verlust vo de Muetter, die hütig Generation und viel gsellschaftskritischi Themene. “Muess ich mich als Secondo entscheide zwüschet Karrieremensch oder Krasse Siech oder gits au anderi Optione?“ Au vo de Community isch en riese Fragekatalog zemmecho wele mir au selbstverständlich und gern abgarbeitet hend. 

Hüt zu Gast de Miro, en Kolleg woni vom Kampfsport kenne. Er isch Selbstständig und het e klari Meinig wieso er sich dezue entschide het. Usserdem schafft er bim FC Züri als Krafttrainer. De Miro isch bekannt für sini direkti Art, so isch er au im Podcast. Gsellschaftskritisch, offe und ohni Samthändsche. Zudem klärt er eus uf über einigi Fitnessmythe. ENJOY

Linus zu Gast bi JRM! De Brüeder isch erst 18, macht sini Lehr als Koch und het nebetbi no sin Kleiderlabel ufd Bei gstellt: 2 Face! Mir redet drüber wies dezue cho isch und verglichet chli eusi Generatione. E superschöni Lebens- und Denkenswiis het er. Au Themene wo gwünscht worde sind vo eu sind ahgsproche worde.

Knappi 2h Gspröch mitm EAZ. Theme-Hopping vom feinste. Vom Ihstieg ih die Musikszene, zu prägende Gschichte wo de EAZ gformt hend bis zunere Horrorgschicht wo er het müesse erlebe. Mir redet über ALLES, de EAZ packt us: Liebi, Familie, Gschichte us de Kindheit und vieles meh - eifach geile Deeptalk. Lernet ihn besser kenne und findet use wer hinder dem erfolgriche Künstler steckt. Abgschlosse hemer natürlich mit de Frage us de Community. E sehr schöni Folg worde, schaltet unbedingt ih!