jIv, tulwI' qangtlhIn

qonta' volter

mughta' DeSDu'

 

jem'IH 'IHDaq nenchoH jIv 'ej pa'vo' ghImlu'.

 

veSvalya'Daq, tunDertentIronIQ joH jem'IHDaq loDHom tu'lu'. qo'Daq ghaH naHHa' law' Hoch naHHa' puS. qa'Daj chIw porghDaj. QaQ noHmeH Ho'DoSDaj 'ej napchu' qa'Daj. meqmeyvammo' ghaHvaD jIv ponglu'. ghaH bopbogh joS tu'lu'. joH be'nI', loD yuDHa' je puq ghaH ja' jem'IH joH toy'wI' Deq. loD nay not neH be', Soch puq poH pojtaHvIS chuQun chaH SochmaH wa' 'emrIghDaj'e' neH 'e' toblaHmo' loD. quHDaj toblaHchu'be' Dachmo' ta.

       veSvalya'Daq tunDertentIronIQ joH HoSghaj law' latlh joH HochHom HoSghaj puS, Qorwagh, lojmIt je ghajmo' jem'IHDaj. vaS'a'DajDaq HuStaH no' DIr. yotlhDaj 'eSDaq qevlaH targhDaj 'utDI' 'ej po' Sargh tlhay'moHwI'Daj 'ej vengHom maqlegh ghaH lalDan qeSwI'Daj'e'. ghaHvaD joHwI' pong Hoch 'ej lut tlhaQ ja'DI' Hagh Hoch. SochmaH cheb ngI' be'nalDaj 'ej ngoDvammo' vuvqu'lu'. nur'a' 'aghtaHmo' 'ej juHDaj che'chu'mo' vuvqu'lu' je. qu'neyghon 'oH puqbe'Daj pong'e'. wa'maH Soch ben boghpu'. 'IH DIrDaj 'ej belmoH 'ej pI' 'ej ngel. vavchaj rurqu'law' loDnI'Daj, joH puqloD. juH qachchajDaq 'aqwI''a' ghaH panloS 'a'ghen'e'. ghojmoHtaHvIS qImqu' jIv, puq ngIjHa' ghaHmo' 'ej watlhmo' qa'Daj.

       qoHngeHbejDI'rujlalDanQeD QIj panloS. wanI' tu'lu'be'chugh, gher'ID tu'lu'be' batlh 'e' tob. DuHbogh qo' nIvDaq joH jem'IH 'IH law' Hoch 'IH puS 'ej joH be'nal nIv law' Hoch latlh joH be'nal nIv puS 'e' tob je.

       « jaS taHlaHbe' 'u' 'e' toblu'» jatlh. « ngoQ ghajmo' Hoch, ngoQ nIv ghajba' Hoch. neqratlh QutlhmeH ghIch luchenmoHlu' 'e' yItu' vaj neqratlh DIghaj. paSlogh tuQtaHmeH 'uSDu' luchenmoHlu'ba' vaj paSlogh wIghaj. lunanlu'meH 'ej jem'IH lumutlhlu'ta'meH nagh luchenmoHlu' vaj jem'IH 'IHqu' ghaj joHma'. juH qach nIv ghajnIS Sep joH'a' 'ej targh DIje'ta'DI' DISop vaj qaStaHvIS DIS naQ Ha'DIbaH wISop. vaj qoHpu' chaH nuv'e' jatlhDI' . jatlhnIS. »

       'Ij jIv qImchu'taHvIS 'ej Har jIvchu'taHvIS 'IHqu' qu'neyghon 'e' Harmo' 'ach not ghaHvaD jatlhmeH yap toDujDaj. ghojmeH mIwDaj vanmeH panloS, vay' QIj: joH ghaHchugh vay''e', vaj QuchmoHbogh ghu' nIv tIv 'ej qu'neyghon joH ghaHchugh vay''e', vaj QuchmoHbogh 'ej nIvbogh ghu' cha'DIch tIv 'ej Hoch jaj qu'neyghon leghlaHchugh vay', vaj QuchmoHbogh 'ej nIvbogh ghu' wejDIch tIv 'ej panloS pIn'a' QoylaHchugh vay', vaj QuchmoHbogh 'ej nIvbogh ghu' loSDIch tIv 'e' tob panloS. SepDaq panloS potlh law' Hoch latlh qangtlhIntej potlh puS vaj tera'Daq ghaH potlh law' Hoch latlh qangtlhIntej potlh puS.

       wa' jaj jem'IH retlhDaq, ngem machDaq yIttaH qu'neyghon. ngem machvaD yotlh ponglu'. yIttaHvIS lavDaq panloS legh. qu'neyghon SoS toy'wI'vaD HapQeD QIjlaw'lI' panloS ngongtaHvIS. run be'. Doq 'ach wovbe' jIbDaj. 'IH 'ej motlh jot. QeD tIvqu'mo' qu'neyghon joH, ngongtaH 'ej ngoghqa'taH chaH 'e' bejqu' tlhuHbe'taHvIS. 'a'ghenDaj meqmeH laH yap bej. wanI'mey 'ej gher'IDDaj leghtaH. tlhe' qu'neyghon 'ej yItqa' Qubqu'taHvIS. SovwI' ghaH neH je. jIv meq yap ghaHlaH 'ej meqDaj yap ghaHlaH je 'e' jal.

       jem'IH cheghtaHvIS qu'neyghon, jIv ghom 'ej DoqchoH qevpobDu'Daj. DoqchoH je jIv qevpobDu'. van bIttaHvIS 'ej ghaHvaD Dap jatlh. jaj veb rInDI' megh tlhoy' ru' 'em lughoS qu'neyghon jIv je raS lelHa'lu'taHvIS. 'IqnaH tlhImHomDaj chagh qu'neyghon. 'oH woH jIv 'ej chuntaHvIS ghaH ghopDaj 'uch. joH Qup ghop chop chuntaHvIS 'ej nongqu'taHvIS 'ej jemqu'taHvIS 'ej Soy'Ha'qu'taHvIS. Hotchuq nujchaj. poSqu'choH mInDu'chaj. jelchoH qIvDu'chaj. ghopchaj SeHbe'choH. tlhoy' ru' juS tunDertentIronIQ joH 'ej wanI'vam, gher'IDvam je leghDI' jem'IHvo' jIv ghIm Sa'HutDaj pupqu'taHvIS. vulchoH qu'neyghon. vulHa'DI' moq SoSDaj, joH be'nal, '