Дар Тоҷикистон ҳамагӣ дар панҷ моҳи ахир расо 9 рӯзноманигор ва блогерони ҷавон ба чинояткорӣ муттаҳам шудаанд. Қисме аз онҳо аллакай бо ҷурмҳои гуногун аз 7 то 10 сол зиндонӣ гардида, боқимонда интизори ҳукми худ ҳастанд.

Бояд гуфт, оғози дастгиршавиҳо ба давраи эътирозҳои оммавӣ дар Хоруғ рост омада, аксари рӯзноманигорон ва блогерони боздоштшуда тибқи моддаи 307-и Кодекси ҷиноии Тоҷикистон айбдор гардидаанд. Моддаи мазкур барои ташкили иттиҳодияҳои экстремистӣ ва даъвати оммавӣ ба фаъолияти экстремистӣ то 15 соли маҳрумият аз озодиро пешбинӣ мекунад.

Аммо, ба гуфтаи коршиносон, баъзе аз блогерон ва рӯзноманигоронеро, ки ҳоли ҳозир интизори ҳукми худ ҳастанд, шояд ҳатто то 20 сол аз озодӣ маҳрум кунанд, чун дар парвандаҳояшон моддаҳои зиёд зикр шудаанд.

Як қатор созмонҳои дохиливу байналмилалӣ ин ҳолатро саркубшавии рӯшоди озодандешон дар Тоҷикистон номида, ҳукмҳои содиршударо шадидан интиқод кардаанд.

Ва аммо, бояд гуфт, подкасти имрӯзаи мо на дар бораи ҳамкасбони паси панҷара рафтаи мо асту на дар дар бобати ҳукми онҳо. Мо тайи чанд дақиқа ҳамагӣ мехоҳем дар мисоли як-ду тан маҳбуси қаблӣ вазъи зиндонҳои кишварро нишон диҳем ва аз рӯйи нақли онҳо бифаҳмем, ки чӣ қисмате метавонад рӯзноманигорон ва блогерони маҳкумшудаи тоҷикро дар оянда интизор бошад.

Подкастро бароятон ман, Ситорабону Киромова, омода кардаам.