Kosmos 94.1

Die Namibiese Weerdiens waarsku dat hittegolf-toestande na verwagting tot oor die komende naweek sal voortduur, met temperature wat in sommige gebiede reeds tussen 36 en 42 grade Celsius bereik het. Albertina Anderson sê die weer-modelle dui daarop dat die hitte verder sal toeneem namate die naweek nader kom. Die publiek word gemaan om genoeg water te drink, strawwe buitelugaktiwiteite gedurende die warmste ure te vermy en veral na bejaardes, babas, en troeteldiere om te sien.

Arbeidskenner Herbert Jauch sê die werkloosheidskrisis kan nie opgelos word deur van gegradueerdes te verwag om werkskeppers te word nie. Hy voer aan dat die oplossing lê in die transformasie van ’n ekonomie wat nie daarin slaag om genoeg werkgeleenthede met ordentlike vergoeding te skep nie. Sy opmerkings volg ná ’n oproep deur die minister van onderwys, Sanet Steenkamp, vir nouer samewerking tussen universiteite en die sakesektor. Jauch het aan Kosmos 94.1 Nuus gesê entrepreneurskap alleen kan nie industrialisasie, ’n sterker vervaardigingsektor en doelgerigte staatsbelegging vervang nie.

In jou finansiële nuus vanoggend: Duur brandstof, stygende inflasie, belastinginkomste wat onder druk is en bek-en-klouseer is groot uitdagings wat finansminister Ericah Shafudah in haar hersiene mediumtermynbegroting moet takel, wat sy vanmiddag in die parlement indien. KosmosKapitaal praat met Cirrus Capital-ontleder Pandu Shaduka oor hul verwagtinge.

Landbouminister Inge Zaamwani sê ministeriebeamptes sal veesiektebeheerposte inspekteer om die behoefte aan bykomende voertuigontsmettingsfasiliteite te bepaal te midde van die bek-en-klouseer-uitbreking. Sy het dié onderneming in die Nasionale Vergadering gegee nadat Affirmative Repositioning-LP Fredrick Shitana kommer uitgespreek het dat voertuie deur kontrolepunte kan beweeg sonder om ontsmet te word. Die minister het verduidelik dat bestaande fasiliteite hoofsaaklik ontwerp is vir voertuie wat van noord na suid reis. Dit laat vrae ontstaan oor voldoende ontsmettingsdekking vir verkeer in albei rigtings. Zaamwani sê die uitbreiding van die fasiliteite sal van beskikbare hulpbronne afhang, aangesien die ministerie se begroting nie voldoende is om in al sy behoeftes te voorsien nie.

Kry die nuus soos dit breek.

Luister na vandag se boodskap met Ds. Johan Els

Rusland is in beginsel gereed om samesprekings met Amerika en Oekraïne oor die beëindiging van die oorlog in Oekraïne te hervat, volgens Yuri Ushakov, 'n senior assistent van Russiese president Vladimir Putin. Hy het gepraat nadat Putin Amerikaanse president Donald Trump se spesiale gesant, Steve Witkoff, in Sint Petersburg ontmoet het. Oekraïense president Volodymyr Zelensky en sy Europese bondgenote dring aan op 'n onmiddellike hervatting van die samesprekings wat in Februarie opgeskort is, en Ushakov sê 'n nuwe ronde kan volgende maand gehou word, moontlik in Abu Dhabi. Die voormalige Russiese diplomaat Yuri Lindre het uit Moskou met Kosmos 94.1 Nuus gepraat.

Die DA sê die regering het vinniger en meer ambisieuse ekonomiese hervormings nodig om groei te bevorder en werksgeleenthede te skep. Die party verwelkom die Nasionale Tesourie se planne om staatskuld te stabiliseer, maar die ekonomiese groeivoorspelling van 1,2-persent is te laag om 'n betekenisvolle verskil aan werkloosheid te maak. Kingsley Wakelin van die DA doen 'n beroep op hervormings in die elektrisiteit-, hawe- en spoorwegsektore, sowel as op die vermindering van burokratiese rompslomp, om beleggings te lok:

Gedruk vir tyd? Rond en bont die hele dag? Kosmos 94.1 Nuus bring vir jou die dag se sportnuus. Plaaslik. In die streek. Internasionaal. Gratis en in Afrikaans. ‘n Samevatting, in minute. Jy kan nie sê jy het nie geweet nie. Elke weeksaand om sewe.

Kry die nuus soos dit breek.