ཨ་རིའི་རླུང་འཕྲིན་ཁང་གི་ཐེངས་འདིའི་ཀུན་གླེང་གསར་འགྱུར་ནང་༧གོང་ས་མཆོག་གིས་༢༠༢༡ ཕྱི་ལུགས་ལོ་གསར་ལ་འཚམས་འཕྲིན་བསྩལ་བ་དང་། འཛམ་གླིང་གང་སར་ཕྱི་ལོ་༢༠༢༠ སྐྱེལ་མ་དང་ལོ་གསར་བསུ་མ་བྱས་པ། བཙན་བྱོལ་བོད་མིའི་བཀའ་སྤྱི་གཉིས་ཀྱི་སྔོན་འགྲོའི་འོས་བསྡུ་ལ་སྟ་གོན་དང་། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་སྣེས་འོས་བསྡུ་དང་ལོ་གསར་སྐབས་གཟབ་ནན་བྱེད་དགོས་པའི་འབོད་སྐུལ་བརྒྱབ་པ། དབྱིན་ཇིའི་གཞུང་གིས་ཏོག་དབྱིབས་ནད་དུག་གི་འགོག་ཁབ་ལ་ཆོག་མཆན་གནང་བ་དང་། ཨ་རིའི་མངའ་སྡེ་ཇོར་ཇི་ཡའི་ནང་གྲོས་ཚོགས་གོང་མའི་འཐུས་མིའི་འོས་བསྡུ་འཕར་མར་གྲ་སྒྲིག་གནང་བཞིན་པ། རྒྱ་ནག་ནི་བསྐྱར་དུ་འཛམ་གླིང་སྟེང་གི་གསར་འགོད་པར་དམ་དྲག་བྱེད་མཁན་གྱི་རྒྱལ་ཁབ་ཏུ་གྱུར་ཡོད་པ་བཅས་ཡོད། ཐེངས་འདིའི་ཀུན་གླེང་ལས་རིམ་དུ་ཚེ་རིང་དབང་མོ་ལགས་ཀྱིས་ཚེ་བརྟན་དབང་ཕྱུག་ལགས་ལ་ཕྱི་ལོ་༢༠༢༠ ནང་གི་ཨ་རི་དང་རྒྱ་ནག་གི་ཕྱི་འབྲེལ་དང་དཀའ་ངལ་ཐད་བཅར་འདྲི་བྱས་པ་དང་། ང་ལ་སྤྱི་འཐུས་ཀྱི་འོས་འཕེན་རོགས་ཞེས་པའི་ལེའུ་བདུན་པའི་ནང་ལྷོ་བྱང་ཨ་རིའི་སྤྱི་འཐུས་ལ་ལངས་མཁན་གསུམ་དང་། ཡུ་རོབ་ཀྱི་སྤྱི་འཐུས་ལ་ལངས་མཁན་གསུམ། དེ་བཞིན་དབུས་གཙང་གི་སྤྱི་འཐུས་འོས་མིར་ལངས་མཁན་གཅིག་བཅས་ངོ་སྤྲོད་བྱས་ཡོད།།

ཨ་རིའི་རླུང་འཕྲིན་ཁང་གི་ཐེངས་འདིའི་ཀུན་གླེང་གསར་འགྱུར་ནང་༧གོང་ས་མཆོག་གིས་དྲ་ལམ་བརྒྱུད་བྱང་ཨ་རིའི་བོད་མི་རྣམས་ལ་བཀའ་སློབ་དང་གསུང་ཆོས་གནང་བ་དང་། བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་གཞི་ལ་སྲིད་འཛིན་གྱིས་མཚན་རྟགས་བཀོད་ནས་ཁྲིམས་ཡིག་ཆགས་པ། རྒྱ་ནག་གིས་ཏོག་དབྱིབས་ནད་དུག་ཁྱབ་ཚད་ཀྱི་གནས་ཚུལ་སྤེལ་མཁན་དང་ཧོང་ཀོང་གི་དམངས་གཙོ་བ་དོན་གཉེར་བ་ཁག་ཅིག་ཁྲིམས་ལ་སྦྱར་བ། ཨུ་རུ་སུའི་ནང་ཏོག་ནད་འགོག་ཁབ་རྒྱག་འགོ་ཚུགས་པ་དང་། ༢༠༢༠ ལོ་ནི་ཐེ་ལན་ཌི་ལ་མཚོན་ན་ནད་ཡམས་དང་རྔམ་སྟོན་ཁྲོམ་སྐོར་གྱི་ལོ་ཞིག་ཆགས་པ་སོགས་ཡོད། ཐེངས་འདིའི་ཀུན་གླེང་ལས་རིམ་དུ་བསོད་ནམས་གཡང་འཛོམས་ལགས་ཀྱིས་བཀྲས་མཐོང་བསྟན་འཛིན་རྣམ་རྒྱལ་ལགས་ལ་ཨ་རིའི་གྲོས་ཚོགས་ཀྱི་གྲོས་ཆོད་དང་ཁྲིམས་འཆར་གཏན་འབེབས་གོ་རིམ་དང་། མཐའ་མར་ཁྲིམས་ཡིག་ཆགས་རྗེས་ཀྱི་ཕན་ནུས་སོགས་ཀྱི་ཐད་བགྲོ་གླེང་ཞུས་ཡོད། དེ་བཞིན་དུ་དེ་རིང་གི་ང་ལ་སྤྱི་འཐུས་ཀྱི་འོས་འཕེན་རོགས་ཞེས་པའི་ལེ་ཚན་གྱི་ཚན་པ་དྲུག་པ་རུ་༢༠༢༡ ལོའི་སྤྱི་འཐུས་ཀྱི་འོས་མིར་ལངས་མཁན་བཅུ་ཐམ་པ་ངོ་སྤྲོད་བྱས་ཡོད་པས་དུས་ཐོག་གསན་གཟིགས་གནང་བར་ཞུ།།

ཨ་རིའི་རླུང་འཕྲིན་ཁང་གི་ཐེངས་འདིའི་ཀུན་གླེང་གསར་འགྱུར་ནང་འཛམ་གླིང་གང་སར་ཡེ་ཤུའི་འཁྲུངས་སྐར་ཉིན་མོ་སྲུང་བརྩི་དང་། སྲིད་འཛིན་ཊམ་གྱིས་ཨ་རིའི་གྲོས་ཚོགས་ཀྱིས་གཏན་འབེབ་གནང་བའི་ཁྲིམས་གཞི་ལ་མོས་མཐུན་བྱེད་ཀྱིན་མེད་པ། བཞུགས་སྒར་དྷ་རམ་ས་ལར་སྔོན་འགྲོའི་འོས་བསྡུའི་ཆེད་འོས་ཤོག་འཕེན་ས་གསར་པ་གསུམ་ཁ་སྣོན་བྱ་རྒྱུ་ཡིན་པ་དང་། རྒྱ་ནག་གཞུང་གིས་ཨ་ལེ་བྷ་བྷ་ཚོང་ལས་ལ་ཞིབ་བཤེར། འཛམ་གླིང་ས་དབུས་རྒྱ་མཚོ་ཁུལ་དུ་རྒྱ་ནག་གིས་ཤུགས་རྐྱེན་འཇོག་ཐབས་བྱེད་བཞིན་པ་སོགས་ཀྱི་གསར་འགྱུར་ཡོད། ཐེངས་འདིའི་ཀུན་གླེང་ལས་རིམ་དུ་བསྟན་འཛིན་བཟང་མོ་ལགས་ཀྱིས་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་ལགས་ལ་༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་ལས་རིམ་བསྐྱང་ཕྱོགས་ཐད་བཅར་འདྲི་བྱས་པ་དང་། ང་ལ་སྤྱི་འཐུས་ཀྱི་འོས་འཕེན་རོགས་ཞེས་པའི་ལེའུ་ལྔ་བའི་ནང་དབུས་གཙང་སྤྱི་འཐུས་ལ་ལངས་མཁན་ལྔ་དང་། ཡུ་རོབ་དང་མདོ་སྨད་ཀྱི་སྤྱི་འཐུས་ལ་ལངས་མཁན་རེ་ངོ་སྤྲོད་བྱས་ཡོད།

ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་ཨ་རིའི་གྲོས་ཚོགས་ཀྱིས་༢༠༢༠ བོད་དོན་སྲིད་ཇུས་དང་རྒྱབ་སྐྱོར་ཁྲིམས་གཞི་གཏན་འབེབ་གནང་བར་སྲིད་སྐྱོང་བློ་བཟང་སེངྒེས་གྲོས་ཚོགས་མདུན་དུ་གསར་སྤེལ་ཚོགས་འདུ་བསྐོང་བ་དང་། ཨ་རིའི་ནང་ཏོག་ནད་ངལ་སེལ་གྱི་ཁྲིམས་གཞི་གྲོས་ཚོགས་ཀྱིས་སྲིད་འཛིན་ལ་བཏང་བ། ཨ་རིའི་གཞུང་གིས་རྒྱ་ནག་གི་དཔོན་རིགས་ཁག་ཅིག་ལ་ཐོངས་མཆན་དོ་དམ་བྱ་རྒྱུ་དང་། དབྱིན་ཇིའི་ནང་གི་རྒྱུད་འགྱུར་བའི་ཏོག་ནད་ཀྱིས་ཁྱིམ་མཚེས་རྒྱལ་ཁབ་མང་པོར་སེམས་ཁྲལ་བསླངས་པ། རྒྱ་གར་གྱི་རྒྱལ་ས་ལྡི་ལིར་རྒྱུན་ལྡན་གྱི་རྣམ་པ་ཞིག་མངོན་བཞིན་པའི་གསར་འགྱུར་ཡོད། ཐེངས་འདིའི་ཀུན་གླེང་དུ་རྡོ་རྗེ་ཚེ་བརྟན་ལགས་ཀྱིས་སྲིད་སྐྱོང་བློ་བཟང་སེངྒེ་ལ་ཨ་རིའི་གྲོས་ཚོགས་གོང་འོག་གཉིས་ཀྱིས་༢༠༢༠་ལོའི་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་གཞི་གཏན་འབེབས་བྱུང་བའི་གནད་འགག་དང་གྲུབ་འབྲས་སོགས་ཀྱི་ཐད་བགྲོ་གླེང་བྱས་པ་དང་། བསོད་ནམས་གཡང་འཛོམས་ལགས་ཀྱིས་རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་འགན་འཛིན་གཞོན་པ་བསྟན་ཆོས་རྒྱ་མཚོ་ལགས་ལ་རྒྱལ་སྤྱིའི་སྟེང་རྒྱ་ནག་གི་དྲིལ་བསྒྲགས་འགོག་ཐབས་ཀྱི་ལས་འགུལ་དང་གྲུབ་འབྲས་སོགས་ཀྱི་ཐད་བགྲོ་གླེང་བྱས་ཡོད།།

ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་བཞུགས་སྒར་དུ་གཞུང་སྒེར་གཉིས་ནས་སླེབས་ལ་ཉེ་བའི་འོས་བསྡུར་གྲ་སྒྲིག་བྱེད་བཞིན་པ་དང་། ལོ་འདིར་གསར་འགོད་པ་བཙོན་འཇུག་གི་ཟིན་ཐོ་བསྐྲུན་ཞིང་རྒྱ་ནག་ནི་བསྐྱར་དུ་གསར་འགྱུར་རང་དབང་ལ་སྡང་ཤོས་དེ་ཆགས་པ། ཨོ་སི་ཀྲོ་ལི་ཡ་དང་རྒྱ་ནག་གཉིས་ཀྱིས་ཚོང་འབྲེལ་ཐད་ཀྱི་རྩོད་རྙོག་སེལ་ཐབས་དང་། ཨ་རིའི་མངའ་སྡེ་ཇོར་ཇི་ཡའི་ནང་གི་གྲོས་ཚོགས་གོང་མའི་འཐུས་མིའི་འོས་བསྡུའི་གནད་འགག་སོགས་ཀྱི་གསར་འགྱུར་ཡོད། དེ་རིང་གི་དྲ་སྣང་གི་བོད་དུ་རྒྱལ་བ་རིན་པོ་ཆེའི་བོད་ཡིག་གི་དྲ་ཚིགས་གསར་བསྒྱུར་བྱས་པའི་ཁྱད་ཆོས་ངོ་སྤྲོད་དང་། དྲ་ཐོག་ཚིག་མཛོད། སྔ་འགྱུར་རིག་མཛོད་སོགས་ཀྱི་དྲ་ཚིགས་བསྟན་ཡོད། ཐེངས་འདིའི་ཀུན་གླེང་ལས་རིམ་དུ་ཚེ་རིང་དབང་མོ་ལགས་ཀྱིས་ཇོན་སི་ཧོབ་ཀིན་གཙུག་ལག་མཐོ་སློབ་ཀྱི་སྨན་པ་དཀོན་མཆོག་རྡོ་རྗེ་ལགས་དང་ལྷན་ཏོག་དབྱིབས་ནད་དུག་གི་སྔོན་འགོག་སྨན་ཁབ་ཀྱི་བདེ་འཇགས་དང་ནུས་པ། འཛམ་གླིང་གང་སར་བཟོ་སྐྲུན་བྱེད་བཞིན་པའི་འགོག་ཁབ་ཐད་བགྲོ་གླེང་ཞུས་ཡོད། དེ་བཞིན་དུ་ཐེངས་འདིའི་ང་ལ་སྤྱི་འཐུས་ཀྱི་འོས་འཕེན་རོགས་ཞེས་པའི་ལེའུ་བཞི་བའི་ནང་༢༠༢༡ ལོའི་བོད་མི་མང་སྤྱི་འཐུས་འོས་མིར་ལངས་མཁན་བརྒྱད་ངོ་སྤྲོད་ཞུས་ཡོད།

ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་དུ་༧གོང་ས་མཆོག་གིས་རྒྱ་གར་གྱི་གཞོན་སྐྱེས་རྣམས་ལ་རྒྱ་གར་གྱི་གནའ་བོའི་རིག་གནས་རྒྱུན་སྐྱོང་བྱ་དགོས་པའི་བཀའ་སློབ་གནང་བ་དང་། ཨ་རིའི་འོས་འདེམས་འཐུས་ཚོགས་ཀྱིས་ཇཱོ་བྷ་ཌན་ནི་སྲིད་འཛིན་འོས་འདེམས་ཁྲོད་རྒྱལ་ཁ་ཐོབ་མཁན་ཡིན་པ་བསྒྲགས་པ། ཨ་རི་དང་དབྱིན་ཡུལ་དུ་ཏོག་དབྱིབས་འགོག་ཁབ་རྒྱག་འགོ་ཚུགས་པ་དང་། རྒྱ་གར་གྱི་སིག་དགོན་པས་ངོ་རྒོལ་བྱེད་མཁན་གྱི་ཞིང་ལས་པ་སོགས་ལ་ཟས་སྦྱིན་གནང་བཞིན་པ་སོགས་ཡོད། ཐེངས་འདིའི་ཀུན་གླེང་དུ་ཚེ་རིང་སྐྱིད་ལགས་ཀྱིས་བཀྲས་མཐོང་བསྟན་འཛིན་རྣམ་རྒྱལ་ལགས་ལ་ཨ་རིའི་འོས་འདེམས་འཐུས་ཚོགས་ཀྱི་བྱེད་ལས་ཐད་བཅར་འདྲི་ཞུས་ཡོད་ཅིང་། བསྟན་འཛིན་ནོར་བཟང་ལགས་ཀྱིས་སྤྱི་འཐུས་བློ་བཟང་ཡེ་ཤེས་དང་གསར་འགོད་པ་རྒན་གྲས་བློ་བཟང་དབང་རྒྱལ་གཉིས་དང་ལྷན་༢༠༢༡ ལོའི་སྲིད་སྤྱི་གཉིས་ཀྱི་འོས་མིར་ལངས་མཁན་འཚང་ཁ་ཤིག་ཤིག་ཡིན་པའི་རྒྱུ་རྐྱེན་དང་མཚོན་དོན་ཐད་གླེང་མོལ་ཞུས་ཡོད།།

དེ་རིང་གི་ཀུན་གླེང་གསར་འགྱུར་ནང་༧གོང་ས་མཆོག་གིས་དགའ་ལྡན་ལྔ་མཆོད་ཉིན་བསྟན་འགྲོའི་དོན་དུ་ཡུན་རིང་འཚོ་བཞུགས་གནང་བ་དང་། བཞུགས་སྒར་དུ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་གནང་ནས་ལོ་༣༡ འཁོར་བའི་དུས་དྲན་སྲུང་བརྩི། འཛམ་གླིང་བཟའ་འབྲུ་ལས་འཆར་ལ་ད་ལོའི་ནོ་བྷེལ་ཞི་བདེའི་གཟེངས་རྟགས་ཕུལ་བ། དབྱིན་ཡུལ་དུ་ཏོག་དབྱིབས་རིམས་ནད་ཀྱི་འགོག་ཁབ་རྒྱག་འགོ་ཚུགས་པ། ཨ་རིའི་སྲིད་འཛིན་འོས་བསྡུའི་ཁྲོད་ཀྱི་འོས་འདེམས་འཐུས་ཚོགས་ཀྱི་འོས་ཤོག་ཁ་གྲངས་གཏན་ལ་འབེབ་འཆར་ཡོད་པ་སོགས་ཡོད། ཐེངས་འདིའི་དྲ་སྣང་གི་བོད་དུ་པར་རིས་དང་ལོ་རྒྱུས་སྦྱར་བའི་ཕྱག་དཔེ་མངགས་ཉོ་བྱེད་ས་དང་། ༼ལམ་ཡིག་༽ དྲ་རྒྱའི་རིག་གནས་ཀྱི་བང་མཛོད། ཞང་བོད་དཔེ་ཁང་ཆེན་མོ། ༼རང་ཐར་༽ རྩོམ་རིག་དྲ་བ་སོགས་ངོ་སྤྲོད་བྱས་ཡོད། ཐེངས་འདིའི་ཀུན་གླེང་དུ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་ཀྱི་དུས་དྲན་དང་འབྲེལ་གོང་ས་སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་དགོངས་འགྲེལ་དང་། དེ་རིང་གི་ང་ལ་སྤྱི་འཐུས་ཀྱི་འོས་འཕེན་རོགས་ཞེས་པའི་ལེ་ཚན་ནང་དབུས་གཙང་སྤྱི་འཐུས་ལ་ལངས་མཁན་ལྔ་དང་མདོ་སྨད་སྤྱི་འཐུས་འོས་མིར་ལངས་མཁན་གཉིས་ངོ་སྤྲོད་བྱས་ཡོད།།

ཨ་རིའི་རླུང་འཕྲིན་ཁང་གི་ཐེངས་འདིའི་ཀུན་གླེང་གསར་འགྱུར་ནང་༧གོང་ས་མཆོག་གིས་འགྲོ་བ་མིའི་འཚོ་རྟེན་དང་བྱམས་བརྩེའི་སྐོར་དྲ་ལམ་དུ་བཀའ་མོལ་གནང་བ་དང་། པཎ་ཆེན་དགེ་འདུན་ཆོས་ཀྱི་ཉི་མ་བཙལ་བ་ཞེས་པའི་དཔེ་དེབ་དབུ་འབྱེད་དང་ཡང་སྤྲུལ་ཁོང་གི་གནས་སྟངས། དེ་བཞིན་ཨ་རིའི་གཞུང་གསར་པའི་ནང་བུད་མེད་འགོ་ཁྲིད་མང་པོ་ཞིག་སླེབས་པ་དང་། ལོ་རྗེས་མའི་ཁྲི་སྟོན་མཛད་སྒོ་མང་ཆེ་བའང་དྲ་ལམ་དུ་གོ་སྒྲིག་བྱ་སྲིད་པ། ཧོང་ཀོང་གི་འགྲོ་བ་མིའི་ཐོབ་ཐང་དང་ཐེ་ཝན་ལ་གོ་མཚོན་བཙོངས་པའི་ཐད་ཨ་རི་དང་རྒྱ་ནག་བར་ཕན་ཚུན་ཉེས་ཆད་གཅོད་རེས་བྱེད་བཞིན་པ་སོགས་ཀྱི་གསར་འགྱུར་ཡོད། དེ་རིང་གི་ཀུན་གླེང་དུ་༢༠༢༡ ལོའི་སྲིད་སྐྱོང་གི་འོས་མིར་ལངས་མཁན་སྤེན་པ་ཚེ་རིང་ལགས་ལ་བཅར་འདྲི་ཞུས་པ་དང་། འདས་པའི་བདུན་ཕྲག་གཅིག་གཉིས་རིང་ཨ་རིས་རྒྱ་ནག་གི་ཐོག་ཏུ་ལག་བསྟར་བྱས་པའི་སྲིད་ཇུས་ཁག་ལ་དབྱེ་ཞིབ་བྱས་ཡོད།།

ཨ་རིའི་རླུང་འཕྲིན་ཁང་གི་ཀུན་གླེང་ལས་རིམ་ལ་འཁོར་སྐར་བརྒྱུད་ནས་བལྟ་ཉན་བྱེད་ཐུབ་པ་མ་ཟད། དྲ་རྒྱ་བརྒྱུད་ནས་ཀྱང་དུས་ཐོག་ཏུ་བལྟ་ཉན་བྱེད་ཐུབ་པ་དང༌། བདུན་ཕྲག་རེའི་གཟའ་ལྷག་པ་དང་པ་སངས་ནམ་ཡིན་ལ་འཛམ་གླིང་གཅིག་གྱུར་གྱི་ཆུ་ཚོད་༡༤་ནས་༡༥་བར་ཏེ་བོད་ནང་གི་དགོང་མོའི་ཆུ་ཚོད་༡༠་ནས་༡༡་བར་ཀུན་གླེང་ཐད་གཏོང་ཞུ་བ་ཡིན། བོད་དང་རྒྱ་ནག་ནས་རྒྱ་ནག་གི་ཨང་གྲངས་༤༠༠ ༡༢༠ ༨༩༢༥ དང་། ཨ་རི་དང་རྒྱལ་ཁབ་གཞན་ནས་༡ ༢༠༢ ༢༠༥ ༠༤༠༠ ་ལ་ཁ་པར་བཏང་སྟེ་ཀུན་གླེང་ལས་རིམ་ནང་དྲི་བ་འགོད་པའམ་བསམ་ཚུལ་བརྗོད་ཆོག ཀུན་གླེང་ལས་རིམ་དུ་མཇལ་ཡོང་།།

ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་ཨ་རིའི་འདེམས་ཐོན་སྲིད་འཛིན་བྷ་ཌན་གྱིས་ལས་སྣེ་གལ་ཆེན་ཁག་ཅིག་མིང་འདོན་བྱས་པ་དང་། བོད་ཀྱི་སྨན་རྩིས་ཁང་གིས་ཨ་རིའི་ནེའུ་ཡོག་ཏུ་ཡན་ལག་ལས་ཁུངས་སྒོ་ཕྱེ་བ། ཨེ་ཧྥེའོ་ཕེ་ཡའི་ཟིང་འཁྲུག་ཁྲོད་ཀྱི་སྐྱབས་བཅོལ་བའི་གནས་སྟངས། རྒྱ་ནག་དང་ཨོ་སི་ཀྲོ་ལི་ཡས་ཕན་ཚུན་ལ་སྐྱོན་བརྗོད། པ་ཀི་སི་ཐན་གྱི་དམིགས་བསལ་ས་ཁུལ། ཧོང་ཀོང་དུ་དམངས་གཙོ་དོན་གཉེར་བ་གསུམ་ལ་ཁྲིམས་ཐག་བཅད་པ་སོགས་ཡོད། ཐེངས་འདིའི་ཀུན་གླེང་དུ་སྲིད་སྐྱོང་འོས་མིར་ལངས་མཁན་ཨཅཱརྱ་ཡེ་ཤེས་ཕུན་ཚོགས་ལ་བཅར་འདྲི་ཞུས་པ་དང་། འཛམ་གླིང་སྟེང་གི་སྐད་གྲགས་ཆེ་བའི་གྷི་རེ་མེ་གཟེངས་རྟགས་ལ་མིང་འདོན་བྱས་པའི་བསྟན་འཛིན་ཆོས་རྒྱལ་ལགས་ཀྱི་གླུ་དབྱངས་བར་དོ་ཞེས་པའི་ཐད་བགྲོ་གླེང་བྱས་ཡོད།།