Hy dra gebreide truie wat Suid-Afrika se geliefde snorman laat lyk asof hy uit ‘n 1970’s modetydskrif geklim het. Hy speel rolbal op kompeterende vlak, en van sy lekkerste geselskap vind hy in vriende wat so oud soos RSG is - 85 jaar. Schalk Bezuidenhout benader sy finansies soos hy rolbal benader – versigtig en berekend. Hy het vinnig agtergekom daar is reëls wat nagekom moet word soos in enige sportsoort, en dat die spel nie so eenvoudig is as om net ‘n bal te rol nie. Alhoewel hy baie van sy geld op sy honde spandeer, fokus hy ten alle tye daarop om slim te bestee, te begroot en te spaar - veral vir sy oudag.