Le gender pay gap, la desfarënzia de paiamënt danter ëi y ëres a paritè de laur è te Südtirol incër al 17%, tl' Uniun Europea al 15%, tla Talia al 10%. Insciö sarà ince la ponsiun trö' mëindra. La gauja prinzipala è che la maternitè comporta por massa tröpes ëres imposcibilitè de laorè inant coche denant, part-time y rinunzies tla cariera. Na mentalitè y cultura ciamò in pert patriarcala sforza les ëres à surantò la gran pert dl pëis dl laur te ciasa y cun i mituns. Le talënt dles ëres ne vëgn nia ciamò incentivè assà por se fà inant ti laurs inovatifs tl ciamp scientifich y tecnologich olache i paiamënc è plö alc. Intervista cun Edith Ploner, intendënta y dirijënta dl dipartimënt scora y cultura ladina.

Gerda Videsott, coordinëia le Master de Design por mituns y mitans tl’Université de Grafica y Ert da Balsan. De ci che ara nen va tl modü podëise descorí te chësc program.

Program de Sara Frenner

N ocajion del Dì internazionèl del lengaz mère ai 21 de firé a Roma vegn sport l pest leterèr internazionèl "Tacita Muta" per la mendranzes de lengaz. Tel 2022 l pest aessa cognù esser sorandat a la dotora Rut Bernardi ma per via de la restrizions de la pandemìa la festa é vegnuda sburlèda a chest an olache vegn adum l pest del 2023 sorandat a Antonello Colledanchise per l’alghereisc -catalan. Del valor de chest pest e de coche é jita la festa en rejonon con Rut Bernardi, conduzion Anna Mazzel

Ai prumes de firé l grop de robotica "Gome neve" de la Scola Ladina de Fascia con l projet scientifich CESLA l'à vent a Mestre la fasa de calificazion per l nord-est de la Tèlia te la competizion internazionèla "First Lego Leage '23". L'auter grop de robotica de la Scola Ladina de Fascia "Gome veie" l'à vent enveze l pest per la inovazions de enjegneria che i à cernù de meter en doura ti robot. Rejonon de la enrescides fates, de cheles en esser e de la valuta de chisc projec de robotica porté dant dai scolees con l dozent Thomas Zulian. Conduzion Cinzia Pistoia

“Ski – pray – celebrate” ie l evënt che l SKJ de Sëlva y S.Cristina mët a ji a Oies tla Val Badia. Ma ciuna ie pa l’atività dla grupa via per l ann y ciuni i fins che chisc jëuni se tol dant? Ntervista cun Linda Perathoner, sëurastanta dla grupa SKJ de Sëlva. Conduzion Leo Senoner

Le toch teatral “FANES” scrit da Anna Gschnitzer y acompagné dales musighes de Musikbanda Franui, nes vëgn presenté te chësc program, dal joblere conesciü y aprijé a livel internazional, Lukas Spisser. Program de Sara Frenner

Per i 60 egn de atività del boletin "Nosha jent" del Grop Ladin da Moena en domenia ai 12 de firè vegn prejentà n nef portal olache se podarà aer azes debant a l'archivie digital del boletin a scomenzèr col prum numer vegnù fora da Nadèl 1963. En rejonon con Fabio Chiocchetti del Grop Ladin da Moena, conduzion Anna Mazzel

Te chesta puntata de Ladinia Live, con Paolo Verra, jon a curiosèr vindedò la coltrines de la mascherèdes del Grop de la mèscres de Dèlba e Penia. conduzion Cinzia Pistoia

Sce an ascuta pro bun, aldun datrai i lëgns che baia. Chësta cuntia nes condüj ti pra sot Pütia, olache al vir n lersc y n peció. Sce spizorëis les orëdles, gnëise sura te chësc program, ci che ai se cunta.

N program de Sara Frenner

Le miscionar combonian padre Giuseppe Detomaso è mort a Adis Abeba tl Etiopia ai 13 de jenà 2023. Nasciü a La Plì de Fodom le 31/01/1942, consagrè pro y do la formaziun da miscionar pro l' ordin di miscionars combonians dal 1972 inant, por plö de 50 agn, al operè tl' Etiopia olach i miscionars combonians laora nia ma tl ciamp religius mo ince sanitar y de svilup sozio-economich.

Cun estrac audio tuc da le film-documentar realisè tl 2022 ( mostrè da Rai Ladinia ) dal studio de produziun Penn de ciastel de Wolfgang y Hannes Penn sön la personalitè y l' aziun de padre Bepe Detomaso tles misciuns, n record dl miscionar ladin, sëgn supulì a Hawassa tl' Etiopia, tres bëgnurü da süa jënt a Fodom ola che al gnè tres zoruch gian y da süa jënt tl' Africa che ti urò bun y al ti urò bun a d'ëi. N program de Alessandro Dapunt.