In monument dal rock tudestg celebrescha in bel anniversari radund.Enconuschent è el daventà ils emprims onns 70 cun figuras musicalas sco Rudi Ratlos, Elly Pirelli u Johnny Controletti. Ma el ha er gì muments penserus sco «Wozu sind Kriege da» u «Horizont». Il merit cardinal da Udo Lindenberg è l'introducziun d'in tudestg schlavà e malziplà en la musica da rock tudestga. Sco er in pitschen stumpel d'avischinaziun tranter vest ed ost. In redudir a chaschun da ses 70avel anniversari.

Dus monuments dal pop britannic celebreschan anniversaris radunds.In è enconuschent per sia vusch tremulanta e ses folk psichedelic, l'auter è in dals gronds bluesunz alvs cun carriera muventada, l'in ha dechantà l'insla «Atlantis», l'auter in famus bordell da New Orleans, l'in ha 70, l'auter 75 onns. Cun auters pleds: In'entir'ura cun Donovan ed Eric Burdon, en «Las perlas» dal Radio Rumantsch.Redacziun: Benedetto Vigne

Ils 4 da quest avrigl ha Francesco de Gregori cumplenì ses 65avel anniversari.El vala sco in dals pli cumplexs e poetics tranter ils cantautori classics. En sia fonografia da oramai passa 45 onns figureschan chanzuns d'amur sco «Niente da capire», allegorias socialas sco «Titanic» u satiras politicas sco «Adelante adelante». Las perlas mussan in panorama musical a chaschun dal 65avel anniversari da Francesco de Gregori.Redacziun: Benedetto Vigne

Ils 12 d'avrigl ha Herbert Grönemeyer cumplenì ses 60avel anniversari.Sia musica è festiva, sia poesia inventiva e sia cumparsa semper giuvenila - e tuttina ha Herbert Grönemeyer gia cuntanschì il 60avel anniversari. A questa chaschun ina confruntaziun da dus albums-clav da sia carriera, il «4630 Bochum» dal 1984 ed il recent «Dauernd jetzt» dal 2014. Cun inquala surpraisa tranteren.Redacziun: Benedetto Vigne

A Minneapolis è mort ils 21 d'avrigl il musicist Prince, a la vegliadetgna da be 57 onns.Cun Prince è mort ina da las figuras las pli marcantas da la musica pop. Sco paucs auters ha quest chantant, ghitarrist e producent american savì cumbinar erotica e tuns, e sia mixtura da funk, rock e jazz ha influenzà entiras generaziuns dapi ils onns '80. En «Las perlas» udin nus ina rimnada da ses pli gronds hits, alternond cun inquala truvaglia or da sia vasta discografia.Redacziun: Benedetto Vigne

Weitere Themen:

- Las perlas dals 07-06-2013 - Prince

In infarct dal tscharvè ha chaschunà la mort prematura dal musicist tudestg da jazz e pop Roger Cicero, ils 24 da mars passà.Sco figl dal jazzist rumen-tudestg Eugen Cicero aveva Roger Cicero giudì ina scolaziun profunda da jazz. Suenter diversas cumparsas en ensembles respectivs ha Cicero lantschà l'onn 2006 ina carriera da solist, sa concentrond sin ina chanzun tudestga tranter swing e pop. Ils titels da ses albums revelan ina tempra umoristica che gioga cun il cumbat dals genders: «Männersachen», «Beziehungsweise», «Artgerecht». Ultimamain ha Roger Cicero publitgà in album tribut a las chanzuns da Frank Sinatra. Durant la promoziun da quell'ovra è il musicist mort nunspetgadamain. En «La Perlas» in omagi exclusiv.Redacziun: Benedetto Vigne

Ils 8 da mars passà è mort il producent englais George Martin en la vegliadetgna da 90 onns. Martin è stà responsabel per la gronda part da las registraziuns dals Beatles.Ils Beatles èn stads ils clients principals dal producent George Martin. Ensemen cun els ha Martin concepì experiments tonals istorics, en chanzuns sco «Tomorrow Never Knows» ubain «Strawberry Fields Forever». Scolà sco orchestrader classic, aveva George Martin producì gia durant ils onns 50 musica da tuts geners per il label Parlophone.«Las perlas» revelan las diversas lavurs da Martin, en in panorama che tanscha enfin ils onns 70.Redacziun: Benedetto Vigne

Il fundatur dal Kölschrock chanta «Lebenslänglich» ...Wolfgang Niedecken, il renumà chantautur da Cologna, ha gist celebrà ses 65avel anniversari. Dacurt ha sia gruppa BAP publitgà il nov album «Lebenslänglich». D'udir parzialmain, alternond cun divers semperverds dals BAP, sco «Kristallnaach», «Verdamp lang her» ubain «Aff un zo».Redacziun: Benedetto Vigne

La musica che muventava il mund avant 50 onnsLa primavaira 1966 è stada ina stagiun da bleras scuvertas musicalas, ella ans ha purtà danov las Mamas e Papas, ils Lovin' Spoonful e la Nancy Sinatra. Ma ella ha er confermà ils Beach Boys, ils Rolling Stones ed ils Beatles. Ed il Adriano Celentano!Redacziun: Benedetto Vigne

Sia Furler - il ghostwriter musical da quests dis?Las ultimas emnas fa ella furore cun ses agen setavel album «This Is Acting». Ma la chantautura australiana Sia Furler alias Sia briglescha gia dapi onns sco autura per autras vuschs megaprominentas - per Beyoncé, Rihanna u Christina Aguilera. Ina chaschun per in bel purtret che cumpiglia er la gruppa tempriva da Sia, Zero 7.Redacziun: Benedetto Vigne