Í Konsert í kvöld byrjum við á því að fara austur í Berufjörð á tónleika með Lay Low. En í seinni hluta þáttarins förum við á tónleika með bandaríska blúsgítarleikaranum Stevie Ray Vaughan sem er búinn að vera látinn í næstum 30 ár. Hjónin á bóndabænum Karlsstöðum í Berufirði, þau Berglin Hasler og Svavar Pétur Eysteinsson (líka þekktur sem Prins Póló þegar hann er með gítar framan á sér og kórónu á höfðinu) reka veitingahúsið og tónleikastaðinn Havarí heima á Karlsstöðum, og hafa staðið fyrir tónleikaröðinni Sumar í Havarí undanfarin 2 sumur. Tónleikarnir hafa verið teknir upp og við ætlum að útvarpa sumum þeirra í Konsert í vetur og byrjum á Lay Low frá fyrra sumri. Hún spilaði í Havarí 30. Júní í fyrrasumar. Þetta er ansi skemmtilegt hjá þeim Berglindi og Svavari en þau starfrækja allt í senn; gistiheimili, tónleikastað, matstofu, snakkgerð og menningarstarfsemi ýmiskonar undir merki Havarí.