La maledizion dei nanet, ‘na fazenda propio trista, che assa al saor da sacolet te la gola, anca an zerto magon. Se vede la cativeria de la iente, se capis che ‘l diàol al è senpre pronto a ciapar le anime, anca se, ogni tant, salta fora la bontà e ‘l sacrifizio, specialmente da zerte sante femene. Se capis anca come che se vivea in quei tenpi duri, de miseria.

Al sfortunà fiol del re l’è ‘na storia piena de dolceze, de sentimento, con doi tosat che se inamora, ma la è trista, la fa gner ‘l magon, parché la finis propio malamente e, co se la à sentida, toca ‘ndar tel let col grop te ‘l col. Anca ‘sta storia la insegna che la vita la è dura e che toca tirar avanti meio che se pol.

Al fabro de Borgo Pra l’è ‘na aventura bela, capitada proprio qua atorno a Belun zinque-sie zento ani fa, co comandea ancora i veneziani. A l’è senpre in mez ‘na femenata bela, ma cativa come la peste, capriziosa fin tel oss. L’è anca dei bravi e boni tosatei che, spes e volentieri, i è meio dei grandi. La storia la fenis polito.

La fontanéta de le montagne del sol la conta ‘na bela aventura tocada ai tosatei che i ‘ndea a cior su fragole (o iàsene e fonghi - no me pense pi -) entro par le val, in fondo al Mis, ‘nde che l’è le montagne del sol. Salta fora senpre ‘na fata bona che la se ció a cor ‘sti pupi desgraziadi e la ghe asa qualcossa de bel che ghe fa ben a tuta la iente.

Al piegorèr Prieto la conta in che maniera l’è nasest al nome de la montagna sora Belun, quela pi alta de tute, che adess i ghe ciama Schiara; inveze al so nome vero a l’è Prieta, par ricordar al piegorér ch ‘l avea also rosc de fede propio la atorno, anche se ‘l girea an s’ciant dapartut, do par le nostre val, anca sot al Visentin. ‘Na bela storia…

Al prete de Quantin l’è propio ‘n fato capità doi-tre secoli fa, ‘na storia che i contea dapartut, parché la era sucessa davero, anca se, col temp, i lo ha slongada e conzada con qualche donta de massa. La fa capir che l’è tanta iente bona, ma anca tanta de cativa a ‘sto mondo e, ogni tant, salta fora qualche sant, come ‘l prete de Quantin.

La canpana de Mel la era ‘na roba unica in tut al mondo, parché, co la sonea, la fea scanpar le neole negre, quele che portea la tenpesta e cossì al racolt ‘l era salvà, sia ‘l forment che la ua. Ma riva senpre ‘diàol a far disastri e ‘l se fa iutar anca da le strighe. Anca sta olta al ghen ciapa ‘na carga e l’ ghe toca scanpar co la coda bassa.

San Martin e ‘l pont del diàol l’è ‘na famosa e vècia storia che la conta de quando San Martin al è gnest da la Francia par veder Belun e par benedir la iente de ‘sti posti qua. Ma la conta anche de i pont che ‘l diàl al era bon de far come nessun al mondo, senpre co la idea de ciapar pi anime che ‘l podea par portar do te l’inferno.

La vera storia de le Dolomiti la conta de come che le Dolomiti, da brute e negre, le è deventade bele, lustre e piene de stele alpine par merito de ‘n popolo de omenét gnesti da lontan che i à filà i rai de la luna co ‘l fus e la corleta e de ‘n principe e ‘na principessa gnesta do da la luna par star qua.

Le nòze de Fiorelìn la parla de ‘na bela e brava tosata che la stea vizin a Castion. La era bona come ‘l pan, la avea al cor te le man e no la olea veder nessun che stesse mal, gnanca le bestiete pi brute e picenine, gnanca i fastuc de erba o i bis de la tera. Sta storia qua la insegna a esser boni e a olerghe ben a tuti.