Njótið sendingina

Hon er serliga kend frá 70ara og 80ara rokki, men hon er eisini brúkt í poppi og øðrum tónleikasjangrum, eyðkenda neytabjøllan ella cowbell'in.

Ein heilur tími við tónleiki, so onkursvegna verður borin fram av neytabjølluni. Her er tónleikur við The Beatles, Guns'n Roses, Rage Agains The Machine, LCD Soundsystem, Prince og monum øðrum

Njótið sendingina, tónleikin og lívið.

Tað var reggae fyri alt kringvarpsgjaldið, tá LEITISSTEIN halgaði ein heilan tíma til serligu tónleikasjangruna úr Jamaica.

Reggae hevur sín uppruna í Jamaica í sekstiárunum og spretti burtur úr Ska tónleikinum, sum eisini er úr Jamaica. Miðskeiðis í sekstiárunum eggjaðu framleiðararnir Duke Reid og Coxsone Dodd tónleikarar í Jamaica at seta tempoið á Ska tónleikinum niður, og tað bleiv fyrst til Rocksteady tónleikastílin, sum síðan bleiv til reggae. Men Reggae ber eisini brá av Rhythm and blues, jazz, calypso og so siðbundna mento tónleikinum.

Í fyrra tímanum er tónleikurin blandaður. Nýggjur og gamal og alt annað.

Í seinna tímanum spæli eg tríggjar sangir við fýra ymiskum bólkum, Editors, Elbow, Rival Sons og Big Thief (bara tveir komu við, tíverri)

Njótið sendingina.

Uni Leitisstein Hansen er vertur

Hópin av góðum og fjølbroyttum tónleiki.

Øll kenna framúrskarandi tulkingina hjá Jeff Buckley av "Hallelujah" hjá Leonard Cohen. Men fá vita, at sangurin er á einastu plátuni, Jeff Buckley náddi at geva út, áðrenn hann druknaði í 1997 einans 30 ára gamal.

23. august í ár vóru tað 25 ár síðani "Grace" varð útgivin, og tað verður hátíðarhildið í Leitisstein, har eg spæli alla útgávuna og hugleiði um "Grace" og ikki minst Jeff Buckley.

Charles Bradley, sáli, Sharon Jones, sála, Lee Fields og ikki minst Amy Winehouse, sála, eru nøkur av sterku funk, R&B og soul nøvnunum, sum hava givið tónleik út á serliga plátufelagnum Daptone Records úr Brooklyn, New York.

Daptone Records, Daptone Studio og húsaorkestur, The Dap Kings, halda til í einum skirvisligum húsum. Men hóast tað, so eru nakrar av bestu soul, funk og jazz útgávunum upptiknar har, eitt nú "Back To Black" hjá Amy Winehouse.

Daptone Records var tema í seinna tímanum av sendingini mánakvøldið.

Fyrri tími av sendingini 7. oktober 2019 var á tremur við nógvum nýggjum tónleiki.